ނުކުޅެދުންތެރިކަން ހުންނަ ފަރާތްތައް ވަޒީފާގެ މާހައުލުގައި ޝާމިލުކުރުމާ ގުޅޭގޮތުން ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)ގެ މުވައްޒަފުންނަށް އަމާޒުކޮށްގެން ތަމްރީނު ސެޝަނެއް ބާއްވައިފިއެވެ.
އާރްޑީސީން މިއަދު ހާމަކުރި ގޮތުގައި، މި ތަމްރީނު ސެޝަނަކީ ޖެންޑާ މިނިސްޓްރީއާއި އާރްޑީސީއާ ދެމެދު ވެފައިވާ އެއްބަސްވުމެއްގެގެ ދަށުން، ޚާއްސަ އެހީއަށް ބޭނުންވާ ފަރާތްތަކަށް އަމާޒުކޮށްގެން ކުރިއަށްގެންދާ އިންޓާންޝިޕް ޕްރޮގްރާމުގެ ބައެކެވެ.
މި ތަމްރީނު ސެޝަން އަމާޒުކޮށްފައިވަނީ ޚާއްސަ އެހީއަށް ބޭނުންވާ މީހުން ނެގި ޑިޕާޓްމަންޓްތަކުގެ ސީނިއާ މުވައްޒަފުންނަށް ކަމަށް އާރްޑީސީން ބުނެފައިވެއެވެ.
މިއަދުގެ ސެޝަންގައި މައިގަނޑު ގޮތެއްގައި އަލިއަޅުވާލާފައިވަނީ ނުކުޅެދުންތެރިކަން ހުންނަ ކުދިންނަށް އެހީތެރިވެދިނުމުގެ ގޮތްތަކާއި، އޮފީސް މާހައުލުގައި އެ ކުދިންނަށް އެހީތެރިވެދެވޭނެ އެކި ގޮތްތަކުގެ މައްޗަށެވެ.
މި ޕްރޮގްރާމަކީ ނުކުޅެދުންތެރިކަން ހުންނަ ފަރާތްތަކަށް ވަޒީފާގެ ފުރުސަތުތައް ފަހިކޮށްދިނުމަށް އާރްޑީސީން ކުރަމުންދާ މަސައްކަތުގެ ތެރެއިން ހިންގި ޚާއްސަ ޕްރޮގްރާމެކެވެ. މި މަސައްކަތުގެ ތެރެއިން އެފަދަ ފަރާތްތަކަށް މަސައްކަތުގެ މާހައުލުގައި ހަމަހަމަ ފުރުސަތުތަކެއް ލިބިގެންދާނެ ކަމަށް އުންމީދުކުރެވެއެވެ.