ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއާއި އެމަނިކުފާނުގެ އަނބިކަނބަލުން މެޑަމް ސާޖިދާ މުޙައްމަދު މިއަދު ސިންގަޕޫރުގެ އިންސްޓިޓިއުޓް އޮފް ޓެކްނިކަލް އެޑިއުކޭޝަން (އައި.ޓީ.އީ) އަށް ޒިޔާރަތްކުރައްވައިފިއެވެ.
މި ޒިޔާރަތުގައި ރައީސުލްޖުމްހޫރިއްޔާއަށާއި އަރިހުގައި ވަޑައިގެންނެވި ބޭފުޅުންނަށް މަރުޙަބާ ދެންނެވީ އިންސްޓިޓިއުޓްގެ ޑެޕިއުޓީ ޗީފް އެގްޒެކެޓިވް އޮފިސަރ ޑރ. ގޮއް މޮންގް ސޮންގްއާއި އެތަނުގެ އިސްވެރިންނެވެ. ޒިޔާރަތުގައި އިންސްޓިޓިއުޓްގެ މަޢުލޫމާތު ހިއްސާކުރެއްވުމާއެކު، އެ އިންސްޓިޓިއުޓްގެ 30 ވަނަ އަހަރީދުވަހާ ގުޅިގެން ތައްޔާރުކޮށްފައިވާ ޚާއްސަ ޕްރެޒެންޓޭޝަން ފޮތެއް ރައީސުލްޖުމްހޫރިއްޔާއަށް ހަދިޔާ ކުރެއްވިއެވެ.
އައި.ޓީ.އީގައި ހިންގާ ތިން ސްކޫލްގެ ތެރޭގައި ސްކޫލް އޮފް ޑިޒައިން އެންޑް މީޑިއާ، ސްކޫލް އޮފް ބިޒްނަސް އެންޑް ސަރވިސަސް އަދި ސްކޫލް އޮފް އިންޖިނިއަރިންގ ހިމެނެއެވެ. މިގޮތުން ސްކޫލް އޮފް ޑިޒައިން އެންޑް މީޑިއާގައި ޑިޖިޓަލް އެނިމޭޝަން، ވީޑިއޯ ޕްރޮޑަކްޝަން އަދި މީޑިއާ ކޮމިއުނިކޭޝަން އެންޑް ޑިޖިޓަލް މާކެޓިންގ ފަދަ ކޯސްތައް ކުރިއަށްގެންދެއެވެ.
އިންސްޓިޓިއުޓްގެ ސްކޫލް އޮފް ބިޒްނަސް އެންޑް ސަރވިސަސްގައި ކޮމިއުނިޓީ ޑެވެލޮޕްމަންޓާއި އިވެންޓް މެނޭޖްމަންޓް ފަދަ ކޯސްތައް ހިންގާއިރު، ސްކޫލް އޮފް އިންޖިނިއަރިންގައި އެއަރކްރާފްޓް ޓެކްނީޝަނުން ތަމްރީނު ކުރުން ފަދަ ކޯސްތައް ކުރިއަށްގެންދެއެވެ.
ފާހަގަކޮށްލެވޭ ކަމެއްގެ ގޮތުގައި، މި ދަތުރުފުޅުގައި ރާއްޖެއާއި ސިންގަޕޫރާ ދެމެދު ގުޅުން ބަދަހިކުރުމަށް އެކުލަވާލެވުނު އެއްބަސްވުންތަކުގެ ތެރޭގައި މަތީ ތަޢުލީމުގެ ފުރުޞަތުތައް ފަހިކޮށްދިނުމަށް އައި.ޓީ.އީއާއެކު ވެސް އެއްބަސްވުމެއް ވަނީ އެކުލަވާލާފައެވެ.