ރާއްޖެއިން ބޭރުގައި ދިރިއުޅޭ ދިވެހިންނަށް ފޮރިން ލިމިޓް ޕޯޓަލްގައި ރެޖިސްޓަރކޮށްގެން 750 ޑޮލަރާ ހަމައަށް އޭޓީއެމްއިން ފައިސާ ނެގޭނެކަމަށް ބޭންކް އޮފް މޯލްޑިވްސް (ބީއެމްއެލް) އިން މިއަދު ހާމަކޮށްފިއެވެ.
މި މަހުގެ 1 ވަނަ ދުވަހުން ފެށިގެން ޢަމަލުކުރަން ފަށާފައިވާ އައު އުސޫލުގެ ދަށުން، ރާއްޖެއިން ބޭރުގައި ދިވެހި ރުފިޔާ ކާޑުތައް މެދުވެރިކޮށް އޭޓީއެމްއިން ނެގޭނެ މިންވަރު ވަނީ 125 ޑޮލަރަށް ދަށްކޮށްފައެވެ. އަދި ކޮންމެ މުޢާމަލާތަކަށް 10 ޑޮލަރުގެ ފީއެއް ނެގުމަށް ވަނީ ހަމަޖައްސާފައެވެ.
ބީއެމްއެލްއިން ހާމަކުރި ގޮތުގައި، ރާއްޖެއިން ބޭރުގައި ދިރިއުޅޭ ދިވެހިންނަށް 750 ޑޮލަރުގެ ލިމިޓް ބޭނުންވާނަމަ، ބޭންކުގެ ފޮރިން ލިމިޓް ޕޯޓަލްގައި ރެޖިސްޓަރކުރެވޭނެއެވެ. މި ލިމިޓްގެ ދަށުން ކާޑުތަކުން ފައިސާ ނެގުމާއި ޕީއޯއެސް މެދުވެރިކޮށް މުޢާމަލާތްކުރުމުގެ ފުރުސަތު ލިބިގެންދާނެއެވެ.
ކިޔަވާ ދަރިވަރުންނަށް ޚާއްސަ އިނާޔަތްތައް
ކިޔަވާ ދަރިވަރުންނަށް ކަނޑައަޅާފައިވާ 1,200 ޑޮލަރުގެ ލިމިޓަށް އެއްވެސް ބަދަލެއް ނާންނާނެ ކަމަށް ބޭންކުން ހާމަކޮށްފައިވެއެވެ. އަދި އައު އުސޫލުގެ ދަށުން ނަގާ ފީތަކުން ކިޔަވާ ދަރިވަރުން އިސްތިސްނާވާނެއެވެ. މި ލިމިޓް ހޯދުމަށް ސްޓޫޑެންޓް ޕޯޓަލް މެދުވެރިކޮށް އެޕްލައިކުރެވޭނެ ކަމަށާއި، ބޭރުގައި އިންޓާންޝިޕް ހަދާ ދަރިވަރުންނަށްވެސް މި ލިމިޓް ލިބޭނެއެވެ.
ޑެބިޓް ކާޑު ލިމިޓަށް އައި ބަދަލު
އައު އުސޫލުގެ ދަށުން ދިވެހި ރުފިޔާގެ ޑެބިޓް ކާޑު ލިމިޓް ވަނީ 500 ޑޮލަރަށް އިތުރުކޮށްފައެވެ. ނަމަވެސް ދިވެހި ވިޔަފާރިކުރާ ބައެއް ސައިޓުތަކުން 30 އިންސައްތައާ ހަމައަށް ފީއެއް ނެގުމަށް ވަނީ ނިންމާފައެވެ. މި ފީ ނަގާނީ ހަމައެކަނި ދިވެހި ރުފިޔާ ޑެބިޓް ކާޑުންނެވެ.
ބީއެމްއެލްގެ ތަފާސްހިސާބުތަކުން ދައްކާ ގޮތުގައި މަހެއްގެ މައްޗަށް 45 މިލިއަން ޑޮލަރު އެކި ވިޔަފާރިތަކަށް ރާއްޖެއިން ބޭރަށް ފޮނުވައެވެ. މީގެ ތެރެއިން 75 އިންސައްތަ ދަނީ އޮންލައިން ޝޮޕިންގ ސައިޓުތަކަށެވެ. މިގޮތުން ޓެމޫއަށް އެކަނިވެސް މަހަކު 7 މިލިއަން ޑޮލަރު ބޭރުކުރެވޭ ކަމަށް ބޭންކުން ވަނީ ފާހަގަކޮށްފައެވެ.