ދުނިޔޭގެ އެކި ބައްރުތަކުން 32 ޓީމް ވާދަކުރި ފީފާ ކުލަބް ވޯލްޑްކަޕް ކުއާޓާފައިނަލަށް ޓީމުތައް ހޮވައިފިއެވެ.
އެގޮތުން ކުއަޓާފައިނަލަށް ހޮވިފައިވަނީ ޔޫރަޕް 5 ޓީމާއި، ދެކުނު އެމެރިކާބައްރުން 2 ޓީމާއި، އޭސިއާއިން 1 ޓީމެވެ.
ޔޫރަޕުން ހޮވިފައިވާ ޓީމްތަކަކީ، ފީފާ ކުލަބް ވޯލްޑްކަޕް ވެސް އަދި ޔޫރަޕިއަން ޗެމްޕިއަންސް ލީގުވެސް އެންމެ ގިނައި ކާމިޔާބުކޮށްފައިވާ ރެއާލް މެޑްރިޑާއި، ޗެމްޕިއަންސް ލީގުގެ އެންމެފަހުގެ ޗެމްޕިއަން ޕީއެސްޖީއާއި، 3 ވަނައަށް ޗެމްޕިއަންސް ލީގު އެންމެ ގިނައިން ކާމިޔާބުކުރި ބެޔާންމިއުނިކާއި، ބޮރޯޝިއާ ޑޯޓްމަންޑާއި، ޗެލްސީއެވެ. ދެކުނު އެމެރިކާއިން ކުއާޓާއަށް ދަތުރުކުރީ ބްރެޒިލްގެ ގަދަ ދެބާރުކަމަށްވާ ޕެލްމެއިރާސްއާއި، ފުލުމިންސޭއެވެ.
އޭޝިއާއިން ކުއާޓާރއަށް ހޮވިފައިވަނީ، ސައުދީ ލީގުގެ ގަދަ ބާރެއްކަމަށްވާ އަލްހިލާލެވެ. މި މުބާރާތުގައި އަދި މިހާތަނަށް އެއްވެސް މެޗަކުން ބަލިނުވެ ކުރިޔަށްދާ ޓީމްތަކުގެ ތެރޭގައި ރެއާލްމެޑްރިޑާއި، ބޮރޯޝިއާޑޯޓްމަންޑާއި، ޕެލްމެއިރާސްއާއި، ފުލުމެންސީއާއި، އަލްހިލާލު ހިމެނެއެވެ.