އައްޑޫސިޓީ ހިތަދޫގައި ކަފިހުރަސް މަތިން ހިނގާފައި މަގު ހުރަސް ކުރި އުމުރުންދުވަސްވީ މީހެއްގެ ގައިގައި ބާރު ސްޕީޑުގައި ދުއްވަމުން ދިޔަ ސައިކަލަކުން ޖެހި ނުރައްކާތެރި އެކްސިޑެންޓެއް ހިނގައިފިއެވެ.
މި އެކްސިޑެންޓް ހިނގި ވަގުތު ނަގާފައިވާ ވީޑިއޯއެއް މިހާރު ދަނީ މީސްމީޑިއާގައި ދައުރުވަމުންނެވެ. އެ ވީޑިއޯގައި ފެންނަނީ ކަފިހުރަސް މަތިން އުމުރުން ދުވަސްވީ ފިރިހެނަކު މަގު ހުރަސް ކުރަމުން ދަނިކޮށް، ބާރު ސްޕީޑުގައި ދުއްވަމުން އައި ސައިކަލެއް އޭނާގެ ގައިގައި ޖެހި، ދެމީހުންވެސް މަގުމައްޗަށް ވެއްޓޭ މަންޒަރެވެ.
ފުލުހުންގެ މީޑިއާ އޮފިޝަލް މައުލޫމާތު ދެއްވިގޮތުގައި މި އެކްސިޑެންޓްގެ މައްސަލަ ފުލުހުންނަށް ރިޕޯޓްކޮށްފައިވަނީ މިރޭ 19:24 ގައެވެ. އެކްސިޑެންޓްގައި އަނިޔާވި ދެފަރާތަށްވެސް ފަރުވާ ދިނުމަށްޓަކައި އައްޑޫ އިކުއަޓޯރިއަލް ހޮސްޕިޓަލަށް ގެންގޮސްފައިވާ ކަމަށް އޮފިޝަލް ވިދާޅުވިއެވެ. ނަމަވެސް އެއްވެސް ފަރާތަކަށް ސީރިއަސް އަނިޔާއެއް ލިބިފައެއް ނުވެއެވެ.
މި ހާދިސާއާ ގުޅިގެން ފުލުހުން ދަނީ ތަހުގީގު ކުރިއަށް ގެންދަމުންނެވެ.
މަގުމަތީގައި ދުއްވާ އުޅަނދުތަކުން ކަފިހުރަސްތަކާ ކައިރިވާއިރު ސްޕީޑް މަޑުކޮށް، ފަރުވާތެރިވުމަށާއި، ހިނގާބިނގާވެ އުޅޭ މީހުން މަގު ހުރަސްކުރާއިރު ވަށައިގެން ރަނގަޅަށް ބަލައި، ރައްކާތެރިކަމާއެކު މަގު ހުރަސްކުރުމަށް ސަމާލުކަން ދިނުން މުހިންމެވެ.