ދިވެހިރާއްޖޭގެ ތިމާވެށި ރައްކާތެރިކުރުމަށް މަސައްކަތްކުރާ މުއައްސަސާ، އެންވަޔަރަންމަންޓަލް ޕްރޮޓެކްޝަން އެޖެންސީ (އީ.ޕީ.އޭ) އާއި އެޓްމޮސްފިއަރ ހޮޓެލްސް އެންޑް ރިސޯޓްސްގެ ދަށުން ހިންގާ އޮބްލޫ-ސެލެކްޓް ސަންގަލީ (އޯ.އެސް.އެސް) އާ ދެމެދު، ރަސްފަރި ފަރަށް އަލުން ދިރުން ދިނުމުގެ ޕްރޮގްރާމަށް އެހީތެރިކަން ފޯރުކޮށްދިނުމުގެ އެއްބަސްވުމެއްގައި މިއަދު ސޮއިކޮށްފިއެވެ.
މިއަދު ސޮއިކުރެވުނު މި އެއްބަސްވުމުގެ މައިގަނޑު މަގްސަދަކީ، ދިވެހިރާއްޖޭގެ ކަނޑުތަކުގައިވާ މުހިއްމު ފަރެއް ކަމަށްވާ ރަސްފަރި ފަރަށް ދިރުން ދީ، އެފަރަށް ލިބިފައިވާ ގެއްލުންތައް ރަނގަޅުކުރުމަށްޓަކައި ކުރެވޭ މަސައްކަތްތަކަށް އޮބްލޫ-ސެލެކްޓް ސަންގަލީގެ ފަރާތުން ފަންނީ އަދި މާލީ އެހީތެރިކަން ފޯރުކޮށްދިނުމެވެ. މީގެ ސަބަބުން ތިމާވެށި ހިމާޔަތްކުރުމަށް ކުރެވޭ މަސައްކަތްތަކަށް ބޮޑު ކުރިއެރުމެއް ލިބިގެންދާނެ ކަމަށް ބެލެވެއެވެ.
ތިމާވެށީގެ ދިރުން ދަމަހައްޓައި، ދިގު މުއްދަތަށް ރައްކާތެރިކުރުމަށްޓަކައި ރިސޯޓުތަކާއި ސަރުކާރުގެ އިދާރާތައް ގުޅިގެން މިފަދަ މަސައްކަތްތައް ކުރުމަކީ ވަރަށް މުހިއްމު ކަމެކެވެ. ރާއްޖޭގެ އިގްތިސާދުގެ ބިންގަލަކީ ތިމާވެއްޓާއި ކަނޑުފަޅުތައް ކަމުން، މިފަދަ މަސައްކަތްތައް ކުރުމަކީ ދިވެހި ރާއްޖޭގެ ތިމާވެށި ދިރުވައި، އިގްތިސާދީ ގޮތުން ކުރިއަރައިގެން ދިއުމަށް އެޅޭ މުހިއްމު ފިޔަވަޅެކެވެ.
މި އެއްބަސްވުމުގެ ދަށުން ރަސްފަރި ފަރަށް ދިރުން ދިނުމުގެ މަސައްކަތްތައް ފަށާނެ ކަމަށާއި، މި ޕްރޮގްރާމްގެ ސަބަބުން ރާއްޖޭގެ ފަރުތަކަށް ލިބިފައިވާ ގެއްލުންތައް ބަލައި، އެފަރުތައް ހިމާޔަތްކުރުމަށް ކުރިއަށް އޮތްތަނުގައިވެސް އިތުރު މަސައްކަތްތައް ކުރެވިގެންދާނެ ކަމަށް އީ.ޕީ.އޭ އިން ވިދާޅުވެފައިވެއެވެ.