މިދިޔަ އޭޕްރީލް މަހުގެ 18 ވަނަ ދުވަހު ހައްވާ ޔުމްނާ ރަޝީދު ގެއެއްގެ ފުރާޅު މަތިން ވެއްޓި މަރުވި މައްސަލައާ ގުޅިގެން ބޭއްވި މުޒާހަރާތަކުގައި ހައްޔަރުކުރެވުނު ދެ މީހުންގެ މައްޗަށް ދަޢުވާކުރަން ނިންމާފައިވަނީ އެ ދެ މީހުން ނަސޭހަތުގެ އެއްބަސްވުމުގައި ސޮއިކުރަން އިންކާރުކުރުމުން ކަމަށް ޕްރޮސިކިއުޓަރ ޖެނެރަލްގެ އޮފީހުން މިއަދު ހާމަކޮށްފިއެވެ.
ޕްރޮސިކިއުޓަރ ޖެނެރަލްގެ އޮފީހުގެ މީޑިއާ އޮފިޝަލް އަޙްމަދު ޝަފީޢު ވިދާޅުވި ގޮތުގައި، ޖިނާއީ އިޖުރާއަތުގެ ޤާނޫނުގެ 100 ވަނަ މާއްދާގެ ދަށުން ނަސޭހަތުގެ އެއްބަސްވުމެއްގައި ސޮއިކުރުމުގެ ފުރުސަތު އަބްދުﷲ މަހްޒޫމް މާޖިދާއި އައިޝަތު ޝިމަންއަށް ދެވުނެވެ. ނަމަވެސް އެ ދެ މީހުން އެ އެއްބަސްވުމުގައި ސޮއިކުރަން އިންކާރުކުރުމުން ދަޢުވާކުރަން ނިންމާފައިވާ ކަމަށް އޭނާ ވިދާޅުވިއެވެ.
މި މައްސަލައިގައި މަހްޒޫމްގެ މައްޗަށް އަނިޔާއެއް ކުރުމުގެ ދަޢުވާ ކުރާއިރު، ޝިމަންގެ މައްޗަށް ދަޢުވާކުރަނީ ޤާނޫނު ތަންފީޒުކުރާ މުވައްޒަފަކަށް ހުރަސްއެޅުމުގެ ކުށުގެ ދަޢުވާއެވެ. މުޒާހަރާއާ ގުޅިގެން ހައްޔަރުކުރެވުނު މި ދެ މީހުން މިހާރު ވަނީ ބަންދުން ދޫކޮށްލާފައެވެ.
ޝަފީޢު އިތުރަށް ވިދާޅުވި ގޮތުގައި، އަދިވެސް އެ ދެ މީހުން ބޭނުންނަމަ ނަސޭހަތުގެ އެއްބަސްވުމުގައި ސޮއިކުރުމުގެ ފުރުސަތު އެބައޮތެވެ. ޖިނާއީ އިޖުރާއަތުގެ ޤާނޫނުގެ ދަށުން ކުދި ކުށްކުށުގައި ނަސޭހަތުގެ އެއްބަސްވުމެއް އެކުލަވާލުމަށްފަހު، ދަޢުވާ ނުކޮށް ދޫކޮށްލުމުގެ ބާރު ޕްރޮސިކިއުޓަރ ޖެނެރަލަށް ލިބިދެއެވެ.
ޤާނޫނުގައިވާ ގޮތުން ނަސޭހަތްދީ ދޫކޮށްލާނަމަ، ކުށްކުރި މީހާއާއި ޕްރޮސިކިއުޓަރ ޖެނެރަލްއާ ދެމެދު އެއްބަސްވުމެއްގައި ސޮއިކުރަންޖެހެއެވެ