އެމެރިކާގެ 249 ވަނަ މިނިވަން ދުވަހުގެ މުނާސަބަތުގައި، އެ ގައުމުގެ ހާރިޖީ ވަޒީރު މާކޯ ރޫބިއޯއަށް ފޮނުއްވި މެސެޖެއްގައި، ޑިމޮކްރެޓިކް މުއައްސަސާތައް ހަރުދަނާކުރުމަށް އެމެރިކާއަކީ ރާއްޖޭގެ ދެމެހެއްޓެނެވި ބައިވެރިއެއް ކަމަށް ހާރިޖީ ވަޒީރު ޑރ. އަބްދުﷲ ހަލީލް ވިދާޅުވެއްޖެއެވެ.
ދިވެހި ސަރުކާރާއި ދިވެހި ރައްޔިތުންގެ ނަމުގައި، އަދި އަމިއްލަ ނަމުގައި، އެމެރިކާގެ މިނިވަން ދުވަހުގެ ތަހުނިޔާ އެމެރިކާގެ ސަރުކާރާއި ރައްޔިތުންނަށް ފޮނުއްވަމުން، ވަޒީރު ހަލީލް ވިދާޅުވެފައިވަނީ މިއީ ވަރަށް އުފާވެރި މުނާސަބަތެއް ކަމަށެވެ.
“އިންސާނީ ހައްގުތައް ކުރިއެރުވުމަށާއި، ޑިމޮކްރެޓިކް މުއައްސަސާތައް ހަރުދަނާކުރުމަށް ކުރަމުންދާ މަސައްކަތުގައި އެމެރިކާއަކީ ދިވެހިރާއްޖޭގެ ދެމެހެއްޓެނިވި ބައިވެރިއެއް” ކަމަށް ވަޒީރު ފާހަގަކުރައްވައި، ކުރިއަށް އޮތްތަނުގައި ވެސް މި ގުޅުން އިތުރަށް ބަދަހިވެގެން ދިއުމަކީ އެމަނިކުފާނުގެ އުންމީދު ކަމުގައި ވިދާޅުވިއެވެ.
މީގެއިތުރުން، އެމެރިކާގެ ހާރިޖީ ވަޒީރު މާކޯ ރޫބިއޯއަށް ދުޅަހެޔޮ ސިއްހަތަކަށް އެދިވަޑައިގަންނަވާ ކަމަށާއި، އެމެރިކާގެ ރައްޔިތުންނަށް ސުލްހައާއި ތަނަވަސްކަން ލިބުމަށް އެދިވަޑައިގަންނަވާ ކަމަށްވެސް މެސެޖްގައި ފާހަގަކުރައްވާފައިވެއެވެ.
ދިވެހިރާއްޖެއާއި އެމެރިކާގެ ސިޔާސީ ގުޅުން 1966 ވަނަ އަހަރު ގާއިމުކުރެވުނު ފަހުން، ދެ ގައުމުގެ ގުޅުން ދަނީ ދުވަހެއް ދުވަހަކަށް ހަރުދަނާވަމުންނެވެ. ދިވެހިރާއްޖެ މިނިވަންވުމާއެކު އެމެރިކާއިން ދިވެހިރާއްޖެ ބަލައިގަނެ، އެ ގައުމުގެ ސަފީރެއް އައްޔަންކުރެއްވުމަކީ މި ގުޅުމުގެ ފެށުމުގެ މުހިންމު މަރުހަލާއެކެވެ.