ޗައިނާގެ މަޝްހޫރު ކުންފުންޏެއް ކަމަށްވާ "ވޭހައި ކިއުޒެޑް ބްލޫސީ ފުޑްސް ކޮމްޕެނީ ލިމިޓެޑް" އިން ދިވެހި ކަނޑުމަހުން މަސްދަޅު އުފެއްދުމުގެ ފުރަތަމަ މަސައްކަތް ފަށައިފިއެވެ. މި މަސައްކަތަކީ ޗައިނާގެ "ޖިންގްވެއިޑާއޯ" ބްރޭންޑް ޓީމާ ގުޅިގެން ކުރެވުނު މަސައްކަތެއް ކަމަށްވާއިރު، މި ކުންފުނިން އުފެއްދި މަސްދަޅުގެ ސާމްޕަލްތައް ވަނީ ޗައިނާގައި ހުންނަ ދިވެހިރާއްޖޭގެ ސަފީރު ފަޒީލް ނަޖީބަށް ހުށަހަޅާފައެވެ.
މަސްވެރިކަމާ ބެހޭ ވަޒީރު އަހުމަދު ޝިޔާމް ވިދާޅުވި ގޮތުގައި މިއީ ޗައިނާ-ދިވެހިރާއްޖެއާ ދެމެދު ވެފައިވާ މިނިވަން ވިޔަފާރީގެ އެއްބަސްވުމުގެ (އެފްޓީއޭ) ސަބަބުން މި ސިނާއަތަށް ލިބުނު ވަރަށް ބޮޑު ކުރިއެރުމެކެވެ. މި އެއްބަސްވުމުގެ ދަށުން ދިވެހިރާއްޖެއިން ޗައިނާއަށް ފޮނުވާ މަހުގެ އުފެއްދުންތަކަށް އެއްވެސް އިމްޕޯޓް ޑިއުޓީއެއް ނުނަގާ ކަމަށް ވަޒީރު ވަނީ ފާހަގަކުރައްވާފައެވެ.
މި މަސައްކަތަކީ ރައީސް ޑރ. މުހައްމަދު މުއިއްޒުގެ ދުރުވިސްނުންފުޅުގެ ތެރެއިން، ދިވެހިރާއްޖޭގެ މަސްވެރިކަމުގެ ސިނާއަތް ތަރައްގީކޮށް، އާ މާކެޓްތައް ހޯދައި، ދުނިޔޭގެ ފެންވަރުގައި ދެމެހެއްޓެނިވި މަހުގެ އުފެއްދުންތައް އިޝްތިހާރު ކުރުމަށް ކުރައްވާ މަސައްކަތްޕުޅުގެ ބައެއްކަން ވަޒީރު ވަނީ ފާހަގަކުރައްވާފައެވެ.
ރާއްޖެއާއި ޗައިނާއާ ދެމެދު ސޮއިކުރެވުނު ފްރީ ޓްރޭޑް އެގްރީމަންޓް (އެފްޓީއޭ) ގެ ދަށުން ރާއްޖޭގެ މަސްވެރިކަމުގެ ހުރިހާ އުފެއްދުންތަކެއް ހެން ޗައިނާއަށް ސުން ޓެކުހުގައި އެކްސްޕޯޓް ކުރުމުގެ އެއްބަސްވުމަށް މިއަހަރުގެ ޖެނުއަރީ 1 އިން ފެށިގެން ވަނީ އަމަލުކުރަން ފަށާފައެވެ. މިކަމުގެ ސަބަބުން މަސްވެރި ސިނާއަތު ކުރިއަރުވައި ސިންދަފާތު ކުރުމަށް ގިނަގުނަ ފުރުސަތުތަކެއް ހުޅުވިގެންދާނެ ކަމަށް ފިޝަރީޒް މިނިސްޓްރީން ވަނީ ފާހަގަކުރައްވާފައެވެ.
މި ކާމިޔާބީއަކީ ދެގައުމުގެ ވިޔަފާރީގެ ގުޅުމަށާއި ދެމެހެއްޓެނިވި މަސްވެރިކަމަށް، އަދި ސަރަޙައްދީ އެއްބާރުލުމަށް ލިބުނު ފަހުރުވެރި ކާމިޔާބީއެއްކަން ވަޒީރު ޝިޔާމް ވަނީ ފާހަގަ ކުރައްވާފައެވެ.