މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ފޯރުކޮށްދޭ ސީ ޓު އެއާ ކާގޯ ހިދުމަތް ފެށުނު ފަހުން، މިހާތަނަށް 1،222 ޓަނަށްވުރެ ގިނަ މުދާ އުފުލާފައިވާކަމަށް އެ ކުންފުނިން މިއަދު ހާމަކޮށްފިއެވެ.
އެމްޕީއެލްއިން ދެއްވި މައުލޫމާތުގައިވާ ގޮތުން، މިއަހަރުގެ ޖެނުއަރީ މަހުން ފެށިގެން ޖޫން މަހުގެ ނިޔަލަށް އުފުލާފައިވާ މުދަލުގެ ޖުމްލަ އަދަދަކީ 271 ޓީއީޔޫ (ޓްވެންޓީ ފޫޓް އިކުއިވެލެންޓް ޔުނިޓް) އެވެ. މިއީ މިދިޔަ އަހަރު ފެށުނު މި ހިދުމަތަށް ލިބުނު ވަރަށް ބޮޑު ކުރިއެރުމެއް ކަމަށް އެމްޕީއެލްއިން ފާހަގަކުރެއެވެ.
ފާއިތުވި ހަ މަސްދުވަހުގެ ތެރޭގައި 10 އެއާލައިނެއް މެދުވެރިކޮށް 15 ގައުމެއްގެ އެކި މަންޒިލްތަކަށް ކާގޯ ފޯރުކޮށްދީފައިވާއިރު، މި ހިދުމަތުގެ ސަބަބުން ބައިނަލްއަގްވާމީ ވިޔަފާރީގައި ރާއްޖޭގެ ދައުރު އިތުރުވެ، އިގްތިސާދީ ގޮތުން ވެސް ފައިދާތަކެއް ވަމުންދާކަމަށް އެމްޕީއެލްއިން ބުނެއެވެ.
މިދިޔަ އަހަރުގެ ކުރީކޮޅު ހުޅުވުނު ވެލާނާ އިންޓަނޭޝަނަލް އެއާޕޯޓުގެ އާ ކާގޯ ޓާމިނަލްގައި އަހަރަކު 120،000 ޓަނުގެ ކާގޯގެ ހިދުމަތް ދެވޭނެ ގާބިލުކަން ލިބިފައިވެއެވެ. އަދި މި ޓާމިނަލް ބޭނުންކުރަން ފެށުމާއެކު ކާގޯ އުފުލާ މިންވަރު ވަނީ އިތުރުވެފައެވެ.
ކުރިއަށް އޮތް ތަނުގައި މި ދާއިރާ އިތުރަށް ތަރައްގީކޮށް، ރާއްޖޭގެ ލޮޖިސްޓިކްސް ދާއިރާ ކުރިއެރުވުމަށް މިނިސްޓްރީން ކަމާ ގުޅުން ހުރި ފަރާތްތަކާ ގުޅިގެން މަސައްކަތްކުރާނެ ކަމަށް އެމްޕީއެލްއިން ވަނީ ފާހަގަކޮށްފައެވެ.