ހއ. އިހަވަންދޫގައި އަލަށް އިމާރާތްކުރުމަށް ހަމަޖެހިފައިވާ ހޮސްޕިޓަލް އެޅުމަށް ކަނޑައަޅާފައިވާ ބިން، ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އާ މިއަދު ވަނީ ރަސްމީކޮށް ހަވާލުކޮށްފައެވެ.
އިހަވަންދޫ ކައުންސިލުން މަޢުލޫމާތު ދެއްވި ގޮތުގައި، މި މަޝްރޫޢުގެ ދަށުން އިމާރާތްކުރެވޭ ހޮސްޕިޓަލުގައި 30 އެނދު ހިމެނޭނެއެވެ. އަދި މީގެ އިތުރުން ހޮސްޕިޓަލުގެ މުވައްޒަފުންނަށް ޚާއްޞަ އެކަމަޑޭޝަން ބްލޮކެއްވެސް އިމާރާތްކުރެވޭނެއެވެ.
އިހަވަންދޫ ކައުންސިލުން ވިދާޅުވި ގޮތުގައި، “މި މަސައްކަތް ނިންމުމަށް ކަނޑައަޅާފައިވާ މުއްދަތަކީ 18 މަސް ނުވަތަ 540 ދުވަސް” ކަމަށް ފާހަގަކުރެއްވިއެވެ. އަދި ބިން ހަވާލުކުރުމާއެކު މަޝްރޫޢުގެ މުއްދަތު ގުނަން ފަށާނެ ކަމަށްވެސް ވިދާޅުވިއެވެ.
މި މަޝްރޫޢު ކުރިއަށް ގެންދިއުމަށްޓަކައި އިހަވަންދޫ ކައުންސިލާއި އާރުޑީސީއާ ދެމެދު ވަނީ އެއްބަސްވުމެއްގައި ސޮއިކުރެވިފައެވެ. މި އެއްބަސްވުމުގެ ދަށުން، ހޮސްޕިޓަލް އިމާރާތްކުރުމުގެ މަސައްކަތް ކުރިއަށް ގެންދިއުމަށް ބޭނުންވާ ބިން ވަނީ އާރުޑީސީގެ ބެލުމުގެ ދަށަށް ގެނެވިފައެވެ.
އިހަވަންދޫގައި މި ހޮސްޕިޓަލް އިމާރާތްކުރެވުމުން، އެ ރަށުގެ ޞިއްޙީ ޚިދުމަތްތައް އިތުރަށް ފުޅާވެ، ރައްޔިތުންނަށް މިހާރަށްވުރެ ފުރިހަމަ ޚިދުމަތްތަކެއް ލިބިގެންދާނެ ކަމަށް އުންމީދުކުރެވެއެވެ.