ފޮޓޯތަކެއް ހުރިކަމަށް ބުނެ ޓެލެގްރާމުން ފޮނުވާ ޕިޝިން ލިންކު މެދުވެރިކޮށް ޓެލެގްރާމް ހެކްކުރުމުގެ މައްސަލަތައް އިތުރުވަމުންދާތީ އެކަމަށް ސަމާލުވުމަށް މޯލްޑިވްސް ޕޮލިސް ސަރވިސްއިން ވަނީ އިލްތިމާސްކޮށްފައެވެ.
ފުލުހުން މައުލޫމާތު ދިފައިވާ ގޮތުގައި، މި ފަދަ ލިންކުތައް އަންނަނީ އިތުބާރުކުރެވޭ ފަރާތަކުން ފޮނުވާ މެސެޖަކާއެކުގައެވެ. އަދި މެސެޖުގައިވާ ލިންކަށް ފިތައިލުމުން ފޯނު ނަންބަރު ޖަހަން ޖެހޭ ކަމަށާއި، އޭގެ ފަހުން ފޯނަށް އަންނަ އޯޓީޕީއެއް ހިއްސާކުރަން ޖެހޭ ކަމަށް ފުލުހުން ވަނީ ބުނެފައެވެ
އޯޓީޕީ ހިއްސާކުރުމުން ދިމާވާ މައްސަލަތައް:
އޯޓީޕީ ހިއްސާކޮށްފިނަމަ ޓެލެގްރާމް އެކައުންޓުގެ ކޮންޓްރޯލް، ސްކޭމްކުރާ ފަރާތަށް ލިބިގެންދާނެ ކަމަށާއި، އޭގެ ފަހުން އެކައުންޓު ވެރިފަރާތުގެ ނަމުގައި އެހެން މީހުންނަށް ސްކޭމް ޕިޝިން ލިންކު ފޮނުވަމުންދާނެ ކަމަށް ފުލުހުން ވަނީ އިންޒާރުދީފައެވެ.
ހެކްވެފައިވާ އެކައުންޓެއް އަނބުރާ ހޯދާނެ ގޮތް: ޓެލެގްރާމް އެކައުންޓު ހެކްވެއްޖެނަމަ އަޅަންޖެހޭ ފިޔަވަޅުތަކުގެ ތެރޭގައި:
- ޓެލެގްރާމް އެޕްލިކޭޝަން އަންއިންސްޓޯލްކުރުން
- އަލުން އިންސްޓޯލްކުރުން
- އެކައުންޓު އަލުން އެކްޓިވޭޓްކުރުން
- ޓޫ-ސްޓެޕް ވެރިފިކޭޝަން އެކްޓިވޭޓްކުރުން
ފުލުހުން ބުނެފައިވާ ގޮތުގައި، ޓެލެގްރާމް އެކައުންޓު ރައްކާތެރިކުރުމަށް އެޅިދާނެ އެންމެ މުހިންމު އެއް ފިޔަވަޅަކީ ޓޫ-ސްޓެޕް ވެރިފިކޭޝަން އެކްޓިވޭޓްކުރުމެވެ. އަދި އިތުބާރުކުރެވޭ ނުވަތަ ގާތް މީހެއްގެ ނަމުގައި މިފަދަ ލިންކެއް ފޮނުވި ކަމުގައިވިޔަސް، އެއަށް ސަމާލުކަން ނުދިނުމަށް ފުލުހުން ވަނީ އާންމުންނަށް އިލްތިމާސް ކޮށްފައެވެ.