ޙަރާމް ގޮތުގައި ހޯދާ އެއްވެސް އެއްޗެއް، ކެއުމަށް ވެސް އަދި އެހެން ކަމަކަށް ވެސް ބޭނުންކުރުން ހުއްދަ ނުވާނެ ކަމަށާއި، ސަބަބަކީ އެފަދަ އެއްޗެއް ކައިގެން ހަށިގަނޑުގައި އުފެދޭ މަހާއި ލެއަށް ޙައްޤުކަން ބޮޑީ ނަރަކަ ކަމަށް ޚިޠުބާގައި ބުނެފިއެވެ.
“ޖުވާއާއި އޭގެ އާމްދަނީ ޙަރާމެވެ” މި މައުޟޫޢަށް މިއަދު ރާއްޖޭގައި ހުކުރު ކުރާ ހުރިހާ މިސްކިތެއްގައި ދިން ޚުޠުބާގައި ވަނީ ޖުވާ ޙަރާމްކުރެއްވުމުގެ ޙިކުމަތްތަކުގެ މައްޗަށް ވަރަށް ފުރިހަމައަށް އަލިއަޅުވާލައިފައެވެ.
ޖުވާއަކީ، ފައިސާ ބަހައްޓައިގެން ބަޔަކު މީހުންގެ މެދުގައި ކުޅެ، މޮޅުވާ މީހާއަށް ނުވަތަ ޓީމަށް އެ އެންމެން ބެހެއްޓި ފައިސާ ނުވަތަ އެއިން ބައެއް ލިބޭ ގޮތަށް ކުޅޭ ކޮންމެ ކުޅިވަރެކެވެ. މިއީ އިސްލާމް ދީނުގައި ޙަރާމްކަމެކެވެ.
ޚުޠުބާގައި ބުނެފައިވަނީ އިސްލާމްދީނުގައި ޖުވާކުޅުން ޙަރާމްކުރައްވާފައި ވަނީ، އެކަމަކީ ފާފަވެރިވާ އަދި ގެއްލުންހުރި މުޑުދާރު ޢަމަލަކަށްވާތީ ކަމަށެވެ. ޚުޠުބާގައި، މާއިދާ ސޫރަތުގެ 90 ވަނަ އާޔަތާއި 91 ވަނަ އާޔަތުން މިކަމަށް ދަލީލުދައްކާފައި ވެއެވެ. (އޭ إيمان ވެއްޖެ މީސްތަކުންނޭވެ! ހަމަކަށަވަރުން، ރަލާއި، ޖުވާކުޅުމާއި، އަޅުކަންކުރަން ހަދާފައި ހުންނަ ބުދުތަކާއި نصيب ހުރިގޮތް ބަލަން ގެންގުޅޭ ދުނިދަނޑިތަކަކީ، شيطان އާގެ عمل ތަކުގެ ތެރެއިންވާ މުޑުދާރު ތަކެއްޗެވެ. ފަހެ، ތިޔަބައިމީހުން އެކަންތަކާ ދުރުވެގަންނާށެވެ! (އެއީ) ތިޔަބައިމީހުން ދިންނަވައި نصيب ލިބުމަށްޓަކައެވެ. شيطان އާ އެދޭކަން ކަށަވަރީ، ރާއާއި، ޖުވާގެ ސަބަބުން، ތިޔަބައިމީހުންގެ މެދުގައި عداوة ތެރިކަމާއި، ރުޅިވެރިކަން އުފެއްދުމަށެވެ. އަދި اللَّه ހަނދުމަކުރުމާއި، ނަމާދުކުރުމަށް ތިޔަބައިމީހުންނަށް ހުރަސްއެޅުމަށެވެ. ފަހެ، ތިޔަބައިމީހުން ތިޔަތިބީ އެކަންތައްތައް ހުއްޓާލަންހެއްޔެވެ؟ (އެބަހީ: ހުއްޓާލާށެވެ!)
ޚުޠުބާގައި ބުނީ ޖުވާގެ ބާވަތްތައް ޙަރާމްވީ، ނުޙައްޤުން މީސްތަކުންގެ މުދަލަށް އަރައިގަނެވޭތީ ކަމަށާއި ފައިދާވާ މީހާއަށް އެ ލިބެނީ ޙަރާމް މުދަލެއްކަމުގައި ވާތީކަމަށެވެ. ޚިޠުބާގައި ބުނީ ޖުވާގެ ބާޒާރަށް ވަދެ، ޙަރާމް ގޮތުގައި ފައިސާ ހޯދުމަށް ފަހު، މި ކަމުން ސަލާމަތްވާން އެދޭ މީހުންނަށް އޮތީ ތައުބާވުން ކަމަށެވެ.
ޖުވާގެ ސަބަބުން ލިބޭ އުޚްރަވީ ގެއްލުމުގެ އިތުރަށް، އޭގެ ސަބަބުން ލިބިގެންދާނެ ދުންޔަވީ ގެއްލުން ތަކަށްވެސް ޚުޠުބާގައި އަލިއަޅުވާލާފައި ވެއެވެ. އެގޮތުން، ފައިސާ ބަހައްޓައިގެން ކުޅޭ ކުޅިވަރުތަކުގައި ބަލިވާ މީހާ، މޮޅުވާ މީހާއަށް، އޭނާ އެކަމަށް ކުރި ހުރިހާ ޚަރަދެއް ދޭން ޖެހި، އެކަމުގައި އޭނާ ދަރަނިވެރިވެ، ބަނގުރޫޓުވާ ހިސާބަށްދާ ކަމަށް ޚުޠުބާގައި ބުނެފައިވެއެވެ.