ވެލާނާ އިންޓަނޭޝަނަލް އެއާޕޯޓް (ވީއައިއޭ)ގެ އާ ޓާމިނަލް ހުޅުވުމުގެ ކުރިން ކުރަންޖެހޭ އޮޕަރޭޝަނަލް ރެޑިނަސް ޓެސްޓް (އޮރާޓް) ޕްރޮސެސްގެ ތެރެއިން، ރާއްޖޭގައި ފުރަތަމަ ފަހަރަށް އޭރޯ ބްރިޖަކާއި މަތިންދާބޯޓެއް ގުޅުވާލައި، ކާމިޔާބު ޓްރަޔަލްއެއް ކުރިއަށް ގެންގޮސްފިއެވެ.
މިހާރު މަތިންދާބޯޓުން ފައިބައިގެން ޓާމިނަލަށް ދެވެނީ ބަހަކަށް އަރައިގެން ނުވަތަ ހިނގާފައި ކަމަށްވާއިރު، މިކަމުގެ ސަބަބުން ފަސިންޖަރުން މަތިންދާބޯޓުން ފައިބަން 28 އާއި 35 މިނެޓާ ދެމެދުގެ ވަގުތެއް ނަގައެވެ. ނަމަވެސް އާ އޭރޯ ބްރިޖާއެކު މަތިންދާބޯޓުން ފައިބައިގެން ފަސިންޖަރުންނަށް ސީދާ ޓާމިނަލަށް ވަދެވޭނެއެވެ. މިކަމުގެ ސަބަބުން ފަސިންޖަރުން އުފުލަންޖެހޭ ދަތިތައް ކުޑަވެ، 8 މިނެޓުގެ ތެރޭގައި މަތިންދާބޯޓު ހުސްކުރެވޭނެއެވެ.
ރާއްޖޭގައި ފުރަތަމަ ފަހަރަށް އޭރޯ ބްރިޖަކާއި މަތިންދާބޯޓެއް ގުޅުވާލައި، ކާމިޔާބު ޓެސްޓުތަކެއް ކުރިއަށް ގެންދިއުން: ފޮޓޯ: އެމްއޭސީއެލް
ރާއްޖޭގައި ފުރަތަމަ ފަހަރަށް އޭރޯ ބްރިޖަކާއި މަތިންދާބޯޓެއް ގުޅުވާލައި، ކާމިޔާބު ޓެސްޓުތަކެއް ކުރިއަށް ގެންދިއުން: ފޮޓޯ: އެމްއޭސީއެލް
އެމްއޭސީއެލްގެ ސީއީއޯ އަދި މެނޭޖިންގ ޑިރެކްޓަރު އިބްރާހިމް ޝަރީފު މުހައްމަދު ވަނީ މި ޓްރަޔަލް ފައްޓަވައިދެއްވާފައެވެ. އަދި މި ޓްރަޔަލް ކުރިއަށްދިޔަ ގޮތް ބެއްލެވުމަށް ކުންފުނީގެ ޑެޕިއުޓީ މެނޭޖިންގ ޑިރެކްޓަރު މުހައްމަދު ލަމްއާން އާއި ޑެޕިއުޓީ މެނޭޖިންގ ޑިރެކްޓަރު މުޖުތަބާ ލަތީފު ވެސް ބައިވެރިވެވަޑައިގެންނެވިއެވެ.
ޓްރަޔަލްގައި މޯލްޑިވިއަންގެ އެއާބަސް އޭ330 އަދި އޭ320ގެ މަތިންދާބޯޓުތަކެއް ބޭނުންކޮށްގެން، އާ ޓާމިނަލްގައި ގާއިމުކޮށްފައިވާ 12 އޭރޯ ބްރިޖުގެ ތެރެއިން ދެ ބްރިޖެއް ޓެސްޓުކުރެވުނެވެ. މީގެއިތުރުން އެޑްވާންސް ވިޝުއަލް ޑޮކިންގ ގައިޑިންގ ސިސްޓަމް (އޭވީޑީޖީއެސް) ވެސް ވަނީ ކާމިޔާބުކަމާއެކު ޓެސްޓުކޮށްފައެވެ.
ރާއްޖޭގައި ފުރަތަމަ ފަހަރަށް އޭރޯ ބްރިޖަކާއި މަތިންދާބޯޓެއް ގުޅުވާލައި، ކާމިޔާބު ޓެސްޓުތަކެއް ކުރިއަށް ގެންދިއުން: ފޮޓޯ: އެމްއޭސީއެލް
ރާއްޖޭގައި ފުރަތަމަ ފަހަރަށް އޭރޯ ބްރިޖަކާއި މަތިންދާބޯޓެއް ގުޅުވާލައި، ކާމިޔާބު ޓެސްޓުތަކެއް ކުރިއަށް ގެންދިއުން: ފޮޓޯ: އެމްއޭސީއެލް
އޭވީޑީޖީ ސިސްޓަމަކީ ދުބާއީ، ސިންގަޕޫރު އަދި ޔޫރަޕުގެ ބައެއް ގައުމުތަކުގެ އެއާޕޯޓުތަކުގައި ބޭނުންކުރާ އެންމެ އެޑްވާންސް ސިސްޓަމެވެ. މި ސިސްޓަމުގެ ސަބަބުން ވައި ނުސާފު ނުވަތަ ވިއްސާރަ ދުވަސްތަކުގައިވެސް ޕައިލެޓުންނަށް މަތިންދާބޯޓު ޕާކުކުރުމަށް ފަސޭހަވެ، އޮބްސްޓަކަލްތައް ދެނެގަތުމުގެ ގާބިލުކަން ލިބިގެންދާނެއެވެ.
މިއީ ރާއްޖޭގައި މި ސިސްޓަމް ބޭނުންކުރަން ފަށާ ފުރަތަމަ ފަހަރެވެ.