ނިދާފައި އޮންނަ އިރު އަކުނިވަޔަށް ދެމުމަކީ ވަރަށް ގިނަ ބަޔަކަށް ދިމާވާ އާންމު ކަމެކެވެ. މިއީ ގިނަ ފަހަރަށް ފައިތިލައާއި ކުޑަކަޅުވާ މަސްގަނޑަށް ދިމާވާ ކަމެކެވެ. މި މައްސަލައަކީ ގިނަ ފަހަރަށް ނުރައްކާތެރި ކަމަކަށް ނުވިޔަސް، މީގެ ސަބަބުން ނިދި ހަމަޖެހިގެން ނުލިބި، ދުވަހުގެ މަސައްކަތަށް ބުރޫ އަރައިގެން ދެއެވެ.
އަކުނިވަޔަށް ދެމުމުގެ މައިގަނޑު ސަބަބުތައް:
އަކުނިވަޔަށް ދެމުމަށް މައިގަނޑު ގޮތެއްގައި ދިމާވާ ސަބަބުތަކުގެ ތެރޭގައި ހަށިގަނޑުން މުހިންމު މިނަރަލްސްތައް މަދުވުން ހިމެނެއެވެ. މީގެ ތެރޭގައި ވިޓަމިން ޑީ، ކެލްސިއަމް، މެގްނީސިއަމް އަދި ޕޮޓޭސިއަމް ފަދަ މާއްދާތައް މަދުވުން ހިމެނެއެވެ. މީގެ އިތުރުން، ބުރަކޮށް މަސައްކަތް ކުރުމާއި، ވަރުބަލިވުމާއި، ހަށިގަނޑަށް ބޭނުންވާ ވަރަށް ފެން ނުލިބުމަކީވެސް މިފަދަ މައްސަލަތައް ދިމާވުމަށް މެދުވެރިވާ ސަބަބުތަކެވެ.
އަކުނިވަޔަށް ދެމުމުން ސަލާމަތްވުމަށް އެޅިދާނެ ފިޔަވަޅުތައް
މި މައްސަލައިން ސަލާމަތްވުމަށް އެޅިދާނެ ފިޔަވަޅުތަކުގެ ތެރޭގައި:
- ހޫނުފެނުން ފެންވެރުން ނުވަތަ ހޫނުފެން ހަމެއް ބޭއްވުން
- ކެލްސިއަމް ގިނައިން ހުންނަ ކާނާ ކެއުން
- ކެމޮމައިލް ސައި ބުއިން
- މަސްތައް މަސާޖުކުރުން
- ޕޮޓޭސިއަމް އަދި މެގްނީސިއަމް ގިނައިން ހުންނަ ކާނާ ކެއުން (މިސާލަކަށް: ނަޓްސް، ތޮޅި، ދޮންކެޔޮ އަދި އޮރެންޖު)
އަކުނިވަޔަށް ދެމުމަކީ ބައެއްފަހަރު ސީރިއަސް ސިއްހީ މައްސަލަތަކުގެ އަލާމާތަކަށް ވެދާނެއެވެ… ފޮޓޯ: ހެލްތީލައިފްސްޓައިލް
ވަގުތުން އެޅިދާނެ ފިޔަވަޅުތައް: އަކުނިވަޔަށް ދަމާ ވަގުތު ވަގުތުން އެޅިދާނެ ފިޔަވަޅުތަކުގެ ތެރޭގައި ދަމާ މަސް މަޑުމަޑުން ދިއްކޮށްލުމާއި، އެ ސަރަހައްދު މަޑުމަޑުން މަސާޖުކުރުން ހިމެނެއެވެ. އަދި ހޫނު ނުވަތަ ފިނި ކޮމްޕްރެސްއެއް ބޭނުންކުރުމަކީވެސް ފައިދާ ކުރާނެ ކަމެކެވެ. މީގެ އިތުރުން ފެން ބުއިމަކީވެސް މުހިންމު ކަމެކެވެ.
ސިއްހީ ގޮތުން ސަމާލުކަން ދޭންޖެހޭ ކަންތައްތައް: އަކުނިވަޔަށް ދެމުމަކީ ބައެއްފަހަރު ސީރިއަސް ސިއްހީ މައްސަލަތަކުގެ އަލާމާތަކަށް ވެދާނެއެވެ. މީގެ ތެރޭގައި ކިޑްނީގެ ބަލިތައް، ތައިރޮއިޑް ބަލި، ލިވަރުގެ މައްސަލަތައް އަދި ހިތުގެ ބައެއް މައްސަލަތައް ހިމެނެއެވެ. އަދި ބައެއް ބޭސްތަކުގެ ސަބަބުން ވެސް މިކަން ދިމާވެދާނެއެވެ.
ޑޮކްޓަރަށް ދެއްކުން މުހިންމު ހާލަތްތައް: އަންނަނިވި ހާލަތްތަކުގައި ޑޮކްޓަރެއްގެ ލަފާ ހޯދުން މުހިންމެވެ:
- ގިނަ ފަހަރު އަކުނިވަޔަށް ދެމުން
- ދެމޭ ސަރަހައްދުގައި ރަތްވުން ނުވަތަ ދުޅަވުން ފެނުން
- ވަރަށް ބޮޑަށް ރިހުން އިހުސާސްވުން
- އެހެން ސިއްހީ މައްސަލައަކާ ގުޅިގެން މިކަން ދިމާވުން
އަކުނިވަޔަށް ދެމުމަކީ ގިނަ ބަޔަކަށް ދިމާވާ މައްސަލައެއް ނަމަވެސް، ރަނގަޅު ކާނާ ބޭނުންކޮށް، އެކަށީގެންވާ މިންވަރަށް ފެން ބުއިމާއި، ދުޅަހެޔޮ އާދަތައް ދިރިއުޅުމުގައި ހިމެނުމުން މި މައްސަލައިން ސަލާމަތްވެވިދާނެ ކަމެވެ.
އަދި މައްސަލަ ސީރިއަސްވާ ހާލަތްތަކުގައި ލަސްނުކޮށް ޑޮކްޓަރެއްގެ ލަފާ ހޯދުމަކީ މުހިންމު ކަމެކެވެ.