“ބިންވެރިޔާ” ސްކީމްގެ ދަށުން ގިރާވަރު ފަޅުތެރެއިން ދޫކޮށްފައިވާ ގޯތިތައް، ބިން ހިއްކޭ ވަރަކަށް ހަވާލުކުރަމުންދާނެ ކަމަށް އިމާރާތްކުރުމާއި ގެދޮރުވެރިކަމާ ބިނާރާ ބެހޭ ވަޒީރު ޑރ. އަބްދުﷲ މުއްތަލިބް ވިދާޅުވެއްޖެއެވެ.
ވަޒީރު މިހެން ވިދާޅުވީ “އަހާ” ފޯރަމުގެ ހަވަނަ އެޑިޝަނުގައި ރައްޔިތަކު ކުރި ސުވާލަކަށް ޖަވާބުދެއްވަމުންނެވެ.
ގިރާވަރު ފަޅު ހިއްކުމުގެ މަޝްރޫއު ކުރިއަށް ގެންދިޔައިރު، އެޑްވާންސްގެ ގޮތުގައި ދެފަހަރެއްގެ މަތިން 20 މިލިޔަން ޑޮލަރު ކުރީ ސަރުކާރުން ދީފައިވާ ކަމަށް ވަނީ ވަޒީރު ވިދާޅުވެފައެވެ.
ވަޒީރު ވިދާޅުވީ ސަރުކާރުން މަސައްކަތް ކުރަނީ އެފަރާތާއެކު ވެފައިވާ އެގްރީމެންޓު ޓާމިނޭޓްކުރެވުނުހާ އަވަހަކަށް ގިރާވަރުގެ މަސައްކަތް ފަށައިގެން ކުރިއަށް ގެންދެވޭތޯ ކަމަށާއި، ބިންހިއްކެންދެން މަޑުކޮށްގެން ހުރުން އެއީ ވިސްނުމެއް ނޫން ކަމަށާއި، އެހެންވީމަ މިހާރު މިނިސްޓްރީގެ ތެރެއިން ލޭންޑްޔޫސް ޕްލޭނަށް ގެންނަންޖެހޭ ބަދަލު ގިރާވަރުން ގުޅީފަޅަށް 2،000 އެއްހާ ގޯތި ބަދަލުކޮށް، އެހެންކަމުން އައު ލޭންޑްޔޫސް ޕްލޭން ތަންކޮޅެއް ތަނަވަސް ގޮތެއްގައި ހަދަންޖެހޭނެ ކަމަށާއި، އެ ލޭންޑްޔޫސްޕްލޭނުގެ މަސައްކަތް މިވަގުތު ކުރިއަށްދާ ކަމަށް މިނިސްޓަރ ވަނީ ވިދާޅުވެފައެވެ.
ހުޅުމާލޭ ފޭސް 3 އަދި ގިރާވަރުން ބިން ހިއްކޭ ވަރަކުން ގޯތި ދެމުންދިޔުމަކީ ސަރުކާރުގެ މިހާރުގެ އަމާޒެއް ކަމަށާއި ސާވޭއެއް ހެދުމަށްފަހު ހިއްކިފައި ހުރި ބިމުން ގޯތި ދޫކޮށް ކަނޑަޖެހުމުގެ މަސައްކަތް ކުރަމުންދާ ކަމަށް ވަނީ ވިދާޅުވެފައެެވެ.