ދުނިޔެ މަތީގައި ވޭނާއި، ބަލިތަކާއި ދަތި ޙާލުގައި އުޅޭ ފަރާތްތައް އެކަމުގެ މައްޗަށް ޘަވާބު ލިބޭ ވާހަކަ އަޑުއަހާފައިވާ ކަމާއި އެކަމުގެ މައްޗަށް އަޖުރުލިބޭ ކަމަށް ބުނެފައިވެ ކޮށްފައިވާ ސުވާލުގެ ޖަވާބުގައި ބުނަމެވެ.
އަޚާ އެވެ! މުހިންމު ނުކުތާ ތަކެއް ފާހަގަ ކުރަމެވެ.
ފުރަތަމައީ : ދުނިޔެ މަތީގައި އެކަކު ޞިއްޙަތުގައި އަނެކަކު ބަލީގައި އަނެކަކު ފަޤީރު އަނެކަކު މުއްސަދިން ގޮތުގައި، މިފަދައިން ލައްވާފައިވާކަމީ ފެންނަން އޮތް ޙަޤީޤަތެކެވެ. ފަހެ، މިއީ ﷲ މޮޅަށް ކަންތައްތައް ދެނެވޮޑިގަންނަވާ ޙާލަތުގައި ނިޔާ ކުރައްވައި ޤަދަރުގައި ލިޔުއްވާފައިވާ ގޮތުގައި ހިނގަމުންދާ ކަންތައްތަކެއް ކަމުގައި ޤަބޫލު ކުރަން ޖެހެ އެވެ. އަދި އޭގައި ބޮޑުވެގެންވާ ޙިކްމަތެއްވެ އެވެ. އަހަރެމެންނަށް ނޭގުނު ކަމުގައިވީނަމަވެސް އޭގައި ބޮޑުވެގެންވާ ޙިކްމަތެއްވެ އެވެ.
ދެވަނައީ : ބަލި ޙާލަތުގައިވާ ފަރާތަކީ އެއްވެސް ޙާލެއްގައި ﷲ އެމީހެއްދެކެ ކޯފާވެވޮޑިގަންންވާ ނުވަތަ ނުރުއްސަވާ ލޯބިވޮޑިނުގަންންވާ ފަރާތެއް ކަމުގައި ބައެއް މީހުން ދެކޭ ދެކުމަކީ ވަރަށްބޮޑު ކުށެކެވެ. ވަރަށްބޮޑުވެގެންވާ ކުށް ބަހެކެވެ.
ސަޢުދީ ޢަރަބިއްޔާގެ ކުރީގެ މުފްތީ العلامة الشَّيخ ابن بَاز رحمه الله ވިދާޅުވެފައިވެ އެވެ. ” ބައެއް މީހުންނަށް ހީވެފައި އޮންނަނީ، ބަލީގެ ޝިކާރަކަށްވެ ނުވަތަ އެފަދަ ވޭނުގައި އުޅޭމީހަކީ، ﷲ އެމީހަކު ދެކެ ލޯބިވޮޑިނުގަންންވާ (ﷲ ކޯފާވެވޮޑިގެންވާ) މީހެއްގެ ގޮތުގަ އެވެ. އެހެނަސް (ޙަޤީޤަތަކީ) އެފަދައިން ނޫނެވެ. ފަހެ، ހަމަކަށަވަރުން ﷲ ގެ ހަޟުރަތުގައި އެބަޔަކަށް އެންމެ ޢިއްޒަތް ލިބިގެންވާ އަދި އެބަޔަކުދެކެ އެ އިލާހު އެންމެ ލޯބިވޮޑިގަންނަވާ މީސްތަކުން ބަލިތަކާއި މުޞީބާތްތަކުން އިމްތިޙާނު ކުރެވޭލެއް ގިނަ ކަމާ އެވެ. އެގޮތުން ނަބިއްޔުންނާއި، ރަސޫލުންނާއި އަދި އެނޫނަސް އެހެނިހެން ޞާލިޙު އަޅުތަކުންފަދަ މީސްތަކުންނެވެ.“ مجموع الفتاوى ١٤٩/٧
الإمام ابن العُثَيمِين – رحمه الله – ވިދާޅުވެފައިވެ އެވެ. ”މުޢުމިނު އަޅާ އަށް ހެޔޮ ޚަބަރު ހުއްޓެވެ. މުޞީބާތަކުން އޭނާ އިމްތިޙާނު ކުރެވިއްޖެނަމަ ﷲ އޭނާދެކެ ކޯފާވެވޮޑިގެންނަވަނީ ކަމަށް ހީނުކުރާނެ އެވެ. އެހެނެއްކަމަކު ފަހަރެއްގައި މިއީ އަޅާދެކެ ﷲ ލޯބިވެވޮޑިގެންނެވުނުގެ ޢަލާމާތެއް ކަމުގައި ވެދާނެ އެވެ. ހުސްޠާހިރުވަންތަ ފަރާތް އޭނާ މުޞީބާތްތަކުން އިމްތިޙާން ކުރައްވަ އެވެ. ފަހެ އިންސާނާ ރުހި ކެތްތެރިވެ އަޖުރަށް އެދިއްޖެނަމަ އޭނާއަށްވަނީ ﷲގެ ރުހިވޮޑިގަތުމެވެ. ރުޅި އައިސްފިނަމަ އޭނާއަށް ވަނީ ﷲގެ ކޯފާ އެވެ.“ شرح رياض الصالحين م١- ص٢٥٩