ރާއްޖެ ހައި ސްޕީޑް ފެރީ ވިއުގައަކުން ގުޅާލުމަށް ފަރުމާކޮށްފައިވާ “އިންޓަގްރޭޓެޑް ނޭޝަނަލް ޕަބްލިކް ފެރީ ނެޓްވޯކް” މަޝްރޫއުގެ ދަށުން ކުރިއަށްގެންދާ ރާއްޖެ ޓްރާންސްޕޯޓް ލިންކް (އާރްޓީއެލް) ފެރީ ހިދުމަތުގައި ހިމެނޭ 12 ފެރީ ސްޓޮޕްކާއި ހަ ޓާމިނަލެއް ރަށު ކައުންސިލްތަކާ ހަވާލުކޮށްފިއެވެ.
އެމްޓީސީސީން މިކަން އިއުލާނުކުރަމުން ބުނެފައިވަނީ، މި ފެރީ ޓާމިނަލްތަކާއި ފެރީ ސްޓޮޕްތައް ބެލެހެއްޓުމުގެ ޒިންމާ މީގެ ފަހުން އަދާކުރާނީ އެ ރަށެއްގެ ރަށު ކައުންސިލުން ކަމަށެވެ.
މި ގޮތުން:
ޓާމިނަލްތަކާއި ފެރީ ސްޓޮޕްތައް ހަވާލުކުރެވިފައިވާ ރަށު ކައުންސިލްތަކަކީ:
- ހދ. ހަނިމާދޫ،
- ހއ. ހޯރަފުށި،
- ހއ. އިހަވަންދޫ،
- ށ. ބިލެއްފަހި
- ށ. ފުނަދޫގައި
- ހދ. ފިނޭ،
- ހއ. މުރައިދޫ،
- ހއ. މޮޅަދޫ،
- ހއ. މާރަންދޫ،
- ހއ. ތުރާކުނު،
- ހއ. އުލިގަން،
- ށ. ފޭދޫ،
- ށ. ކޮމަންޑޫ،
- ހދ. ވައިކަރަދޫ،
- ހދ. ކުމުންދޫ،
- ށ. ގޮއިދޫ،
- ހއ. ބާރަށް
- ހއ. ދިއްދޫގައި
އެމްޓީސީސީން ހާމަކުރި ގޮތުގައި މި ފެރީ ސްޓޮޕްތަކާއި ޓާމިނަލްތައް އިމާރާތްކޮށްފައިވަނީ އާރްޓީއެލް ފެރީގެ ހިދުމަތް ބޭނުންކުރާ ފަސިންޖަރުންގެ ލުއި ފަސޭހައަށް ރިއާޔަތްކޮށެވެ. މި ގޮތުން ދަތުރަށް ތައްޔާރުވެގެން އަންނަ ދަތުރުވެރިންނަށް މަޑުކޮށްލައިގެން ތިބެވޭނެ އިންތިޒާމު މި ފެރީ ސްޓޮޕްތަކާއި ފެރީ ޓާމިނަލްތަކުގައި ހަމަޖެހިފައި ހުންނާނެއެވެ.
އިންޓަގްރޭޓެޑް ނޭޝަނަލް ޕަބްލިކް ފެރީ ނެޓްވޯކްގެ މަޝްރޫއަކީ ރާއްޖޭގެ އެކި ސަރަހައްދުތައް ހައި ސްޕީޑް ފެރީ ވިއުގައަކުން ގުޅާލުމަށް ސަރުކާރުން ކުރިއަށްގެންދާ މުހިންމު މަޝްރޫއެކެވެ. މި މަޝްރޫއުގެ ދަށުން ޤާއިމުކޮށްފައިވާ ފެރީ ސްޓޮޕްތަކާއި ޓާމިނަލްތައް ރަށު ކައުންސިލްތަކާ ހަވާލުކުރުމަކީ ލާމަރުކަޒީ އުސޫލުން ރަށްރަށް ހިންގުމަށް އިތުރު ބާރެއް ލިބިގެންދާނެ ކަމެއް ކަމުގައި ފާހަގަކުރެވެއެވެ.