ރާއްޖެއިން ބެލްޖިއަމަށް ކަނޑައަޅުއްވާފައި ހުންނަވާ ސަފީރު ގީލާ އަލީ، ޗާގޯސްއަކީ ދިވެހިރާއްޖޭގެ ތަނެއް ނޫން ކަމަށް ވިދާޅުވެފައިވާކަމަށް ބުނާ ވާހަކަތަކަކީ ހަގީގަތާ ހިލާފު ވާހަކަތަކެއްކަމަށް ފޮރިން މިނިސްޓަރު ޑރ. އަބްދުﷲ ހަލީލު ވިދާޅުވެފައިވެއެވެ. ސަފީރު ވާހަކަފުޅު ދައްކަވާފައިވަނީ ޑިއެގޯ ގާސިއާގައި އެމެރިކާގެ އަސްކަރީ ބޭސްއެއް ހުރުމާ މެދު ދެކޭގޮތާ ގުޅޭގޮތުންނެވެ.
ޗާގޯސްގެ ހައްގުތައް ދޫކޮށްލާފައިވަނީ 2022 ވަނަ އަހަރު އެމްޑީޕީގެ ސަރުކާރުގެ ސިއްރު ސިޓީއަކުން ކަމަށް މިނިސްޓަރު ހަލީލު ވިދާޅުވެފައިވާއިރު، ރައީސް މުއިއްޒު ވަނީ ގެއްލިގެންދިޔަ ކަނޑު ހޯދުމަށް ކުޑަވެސް ދުލެއް ނުދެއްވާނެ ކަމަށް ވިދާޅުވެފައެވެ. މި މަސައްކަތަށް ހާއްސަ ކޮމިޓީއެއް އެކުލަވާލައި، 10 މިލިއަން ރުފިޔާ ބަޖެޓުގައި ހިމަނާފައިވެއެވެ.
އިޓްލޮސްގެ ހުކުމުގައި ރާއްޖެއާއި މޮރިޝަސްގެ ކަނޑުގެ ސަރަހައްދުން ފުށުއަރާ 95،600 އަކަ ކިލޯމީޓަރު ބެހުމުގައި، މޮރިޝަސްއަށް 48،458 އަކަ ކިލޯމީޓަރު އަދި ރާއްޖެއަށް 47،172 އަކަކިލޯމީޓަރު ލިބޭގޮތަށް ނިންމާފައިވެއެވެ. މި ނިންމުމާ ގުޅިގެން ރާއްޖޭގެ ކަނޑުގެ ސަރަހައްދުން ބޮޑުބައެއް ގެއްލިފައިވާކަމަށް ޕީޕީއެމް/ޕީއެންސީން ބުނެފައިވެއެވެ.