ވެލާނާ އިންޓަރނޭޝަނަލް އެއަރޕޯޓަކީ ދިވެހިރާއްޖޭގެ މައި ދޮރާށި ކަމުގައިވާއިރު، މި އެއަރޕޯޓުގެ ތަރައްޤީގެ މަޝްރޫޢުތަކަކީ ޤައުމުގެ އިޤްތިޞާދީ ކުރިމަގާ ސީދާ ގުޅިފައިވާ ކަންކަމެވެ. ރާއްޖޭގެ ފަތުރުވެރިކަމުގެ ދާއިރާއަށް އައު ހަކަތައެއް ގެނެސްދޭނެ މުހިންމު ބަދަލެއް ކަމަށްވާ ވީއައިއޭގެ އައު ޓަރމިނަލް ހުޅުވުމަށް ގުނަމުންދާ ދުވަސްތަކަކީ ދިވެހިރާއްޖޭގެ ވައިގެ ދަތުރުފަތުރުގެ ތާރީޚުގައި ފާހަގަކޮށްލެވޭ މުހިންމު ދުވަސްތަކެކެވެ. އަންނަ އަހަރުގެ ޖުލައި މަހުގެ 26 ވަނަ ދުވަހު ހުޅުވުމަށް ހަމަޖެހިފައިވާ މި ޓަރމިނަލްއަކީ ދިވެހި ފަތުރުވެރިކަމުގެ ދާއިރާއަށް އައު ހަޔާތެއް ގެނެސްދޭނެ ތަރައްޤީގެ މަޝްރޫޢެކެވެ.
78،000 އަކަ މީޓަރުގެ ބޮޑު ސަރަހައްދެއްގައި ތަރައްޤީކުރެވިފައިވާ މި ޒަމާނީ ޓަރމިނަލަކީ އަހަރަކު 7 މިލިއަން ފަސިންޖަރުންނަށް ޚިދުމަތް ދެވޭ ވަރުގެ ޤާބިލުކަން ހުރި ތަނެކެވެ. މި ތަނުގައި އޭރޯބްރިޖްތަކާއި، އެޑްވާންސް ބެގޭޖް ހޭންޑްލިންގ ސިސްޓަމްތަކާއި، ފަސިންޖަރުންނަށް ބޭނުންވާ އެންމެހައި ޒަމާނީ ޚިދުމަތްތައް ހިމެނިފައިވެއެވެ.
ވީއައިއޭގެ އައު ޓަރމިނަލްގެ ސަބަބުން ޤައުމަށް ލިބޭނެ އިޤްތިޞާދީ މަންފާ ވަރަށް ބޮޑެވެ. ޚާއްޞަކޮށް، ސީޕްލޭން ޓަރމިނަލް އެކަނި ކުއްޔަށްދީގެން އަހަރަކު 55 މިލިއަން ޑޮލަރު ލިބޭނެކަމަށް ލަފާކުރެވެއެވެ. މީގެ އިތުރުން، ޓަރމިނަލްއާ ގުޅިގެން އިތުރުވާ ވަސީލަތްތަކުގެ ސަބަބުން ވަޒީފާގެ އެތައް ހާސް ފުރުޞަތެއް އުފެދި، ރާއްޖޭގެ ޓޫރިޒަމް ދާއިރާއަށް އިތުރު ކުރިއެރުންތަކެއް ލިބިގެންދާނެއެވެ.
އެޗްއާރްޓީމް، އޮރާޓްޑިޕާޓްމަންޓަށް؛ ސަރޕްރައިޒް ބައްދަލުވުމަކަށް—-ފޮޓޯ:އެމްއޭސީއެލް
މިހާރުގެ ތަރައްޤީގެ މަޝްރޫޢުތަކަކީ ޤައުމުގެ އަގުހުރި އެސެޓުތައް އަމިއްލައަށް ތަރައްޤީކޮށްގެން ހާސިލުކުރެވޭ ކުރިއެރުންތަކެކެވެ. މިއީ ދިވެހިރާއްޖޭގެ އިޤްތިޞާދީ މިނިވަންކަމާއި ދެމެހެއްޓެނިވި ތަރައްޤީއަށް މަގުފަހިކޮށްދޭ ކަމެއްކަން ގައިމެވެ.
މުވައްޒަފުންގެ އުފާވެރިކަން
އައުޓާމިނަލް ހުޅުވުމާއި ވީއައިއޭގެ މިއައުޓާމިނަލްގެ ސަބަބުން ލިބިގެންދާނެ ބައިނަލްއަގްވާމީ ފަޚުރުވެރި ނަމާއި ޝަރަފަށްޓަކައި ހިތުގެއަޑިން އުފާކުރާ އެއް ބަޔަކީ އެމްއޭސީއެލްގެ މުވައްޒަފުންނެވެ. އޭރާއި މިހާރުގެ މުަވައްޒަފުންނެވެ. ކޮންމެ ބަޔަކުވެސް އެމީހުންގެ ފާޅުކުރަމުންދަނީ ތަނަށް އޮތް ލޯތްބެއްގެ ބޮޑުކަމުންކަން އެމީހުންގެ ބަސްތަކުން ހާމަަ ވެގެންދެއެވެ.
އެމްއޭސީއެލްގެ އެމްޑީ، މުވައްޒަފުންނާއެކު؛ އައުޓާމިނަލްގެ ކޮންމެ ކަމެއްގައިވެސް، އެއްބައިވަންތަކަމުގެ ނަމޫނާއެއް ފެނިގެންދޭ—ފޮޓޯ:އެމްއޭސީއެލް
އެމްއޭސީއެލްގެ ޒަމާންވީ މުވައްޒަފުންވެސް މި އައު ޓަރމިނަލް ފެނުމުން ފާޅުކުރި އުފާވެރިކަމަކީ އެ ބޭފުޅުންގެ ހިތްތަކުގައި މި ތަނާމެދު އޮތް ލޯބި ދައްކުވައިދޭ ކަމެކެވެ. ގިނަ ދުވަހު ޚިދުމަތްކޮށްފައިވާ މުވައްޒަފުން މި ޓަރމިނަލް ފެނުމުން ތިބީ އުފަލުން ފޮޅިފައެވެ. އެބޭފުޅުންގެ ދިގު ޚިދުމަތުގެ އެންމެ ބޮޑު ހުވަފެން ހަޤީޤަތަކަށް ވެގެންދިޔަ މަންޒަރު މިވަނީ ފެނިފައެވެ.
މި އައު ޓަރމިނަލަކީ އެމްއޭސީއެލްގެ މުވައްޒަފުންގެ ހިތްތަކާ ވަރަށް ބޮޑަށް ގުޅިފައިވާ މަޝްރޫޢެކެވެ. ޚާއްސަކޮށް، އެތަނަށް އެތައް އަހަރެއް ވަންދެން ޚިދުމަތްކޮށްފައިވާ ޒަމާންވީ މުވައްޒަފުންގެ ހިތުގެ އަޑުތަކުން މިކަން ފާޅުވެގެންދެއެވެ. އެމްއޭސީއެލްގެ މެނޭޖިންގ ޑިރެކްޓަރު (އެމްޑީ) އިސްނަގައިގެން އިސް މުވައްޒަފުން އައު ޓަރމިނަލަށް ޒިޔާރަތްކުރުމުގެ ފުރުސަތު ދެއްވި ކަމާމެދު އެބޭފުޅުން ތިބީ އުފަލުން ފުރިފައެވެ. ޚާއްޞަކޮށް އެތަނުގައި ދިމާވި އެކި ރޭންކުތަކުގެ ވެރިން އެ މުވައްޒަފުންނާމެދު ދެއްކެވި ގާތްކަމާއި އޯގާތެރިކަމަކީ އެ މުވައްޒަފުން ފަޚުރުވެރިކަމާއެކު ފާހަގަކުރި ކަމެކެވެ.
އެމްއޭސީއެލްގެ އެމްޑީ، މުވައްޒަފުންނާއެކު؛ އައުޓާމިނަލްގެ ކޮންމެ ކަމެއްގައިވެސް، އެއްބައިވަންތަކަމުގެ ނަމޫނާއެއް ފެނިގެންދޭ—ފޮޓޯ:އެމްއޭސީއެލް
"މިއަދަކީ އަހަރުމެންގެ ހަޔާތުގެ ވަރަށްވެސް އުފާވެރި ދުވަހެއް. އަދި އަޅުގަނޑުމެން އެމްޑީ އިސްނަންގަވައިގެން އަހަރެމެން އިސްމުވައްޒަފުން މިތަނަށް ގެނައީތީ އެންމެ އުފާވަނީ، މިތަނުން ބައްދަލުވި ރޭންކުގެ ހުރިހާ ސައިޒުގެ ހުރިހާ ވެރިން އަހަރުމެންނާ ދޭތެރޭގައި ބޭއްވި ގާތްކަމާއި ތިމާގެކަން އެއީ ވަރަށް ފަހުރުވެރިކަމާއެކު ބަލައިގަންނަ ކަމެއް." މިއީ އެމްއޭސީއެލްގެ ދުވަސްވީ މުވައްޒަފެއްގެ ބަސްތަކެވެ،
"އުފާކުރަނީ ކުންފުނީގެ މެނޭޖްމަންޓް މިފަދަ ފުރުސަތެއް އަޅުގަނޑުމެނަށް ދެއްވީތީ. މިއީ ކުރިން ދެކުނު ހުވަފެނެއްވެސް ނޫން. 40 އަހަރުވަންދެން މިތާ މަސައްކަތް ކުރިއިރު ވަރަށް ތަފާތު ކަންތައްތަކާ ކުރިމަތިލާފައިހުރި މީހެއް. އެކަމަކު މިއަދު މިވީ ވަރަށް އުފާވި ދުވަހެއް." 40 އަހަރުވަންދެން އެއަރޕޯޓަށް ޚިދުމަތްކޮށްފައިވާ މިބޭފުޅާ އެހާމަކޮށްދިނީ ހަގީގަތުގައިވެސް އައު ޓަރމިނަލްއަކީ މީގެ ކުރިން ނުފެންނަ ފަދަ ފުރިހަމަ ތަނެއްކަމެވެ.
"އަޅުގަނޑުމެން ވަރަށް އުފާކޮށްފިން މިތަން ނިމި، ހުޅުވޭތީ، އަދި މިރަސްމިއްޔާތު ބާއްވާތީ. އަޅުގަނޑުމެން ހީވެސް ނުކުރާވަރުގެ ރަނގަޅުކަމެއް މިކުރެވުނީ. ދިވެހިރާއްޖޭގެ ތަމްސީލު މިދެއްކީ މި އެއާޕޯޓް، ދިވެހިރާއްޖެއަށް މިއައި ކުރިއެރުން ވަރަށް އިހުސާސްވެއްޖެ." އެބޭފުޅާގެ ބަސްތަކުން ފާޅުވަނީ ޤައުމީ ފެންވަރުގައި ލިބުނު މި ކުރިއެރުމާމެދު އޮތް ފަޚުރުވެރިކަމެވެ.
އެމްއޭސީއެލްގެ އެމްޑީ، މުވައްޒަފުންނާއެކު؛ އައުޓާމިނަލްގެ ކޮންމެ ކަމެއްގައިވެސް، އެއްބައިވަންތަކަމުގެ ނަމޫނާއެއް ފެނިގެންދޭ—ފޮޓޯ:އެމްއޭސީއެލް
"ވަރަށް ހިތްހަމަޖެހޭ، އިހުސާސެއްވެސް ނުކުރެވޭ އުފާވެރިކަން. ދުވަހަކުވެސް މިހާ ރީތިކޮށް މިހާ މުހިންމުގޮތަކަށް ފެނިދާނެ ކަމަކަށް ހިއެއްވެސް ނުކުރަން. 1984 އިން ފެށިގެން 2023 ޖަނަވަރީ 1 އާ ހަމައަށް އުޅެފައި މިތަން ދޫކޮށްފައި ދިޔައީ، އެކަމަކު މިތަނަކުން ހިތެއް ނުދޭ، ހިތް އޮންނަނީ މިތަނުގައި." މިބަސްތަކަކީ ހިތްތަކަށް އަސަރުކުރާފަދަ ބަސްތަކެއްކަން ކަށަވަރެވެ. ދޭހަކޮށްދިނީ ޖިސްމާނީގޮތުން އެތަނުން ދުރުގައި ހުރިނަމަވެސް، އޭނާގެ ހިތް އަދިވެސް ގުޅިފައިވާކަމެވެ.
މިއީ އެމްއޭސީއެލްގެ ޒަމާންވީ މުވައްޒަފުންގެ އިހުސާސެވެ. އެންމެ ކުރިން ފެށިގެން ތަނަށް ޚިދުމަތް ކޮށްދެއްވާފައިވާ އަދި މިހާރު ތަނުގައި ނެތްނަމަވެސް ތަނަށް ހިތު ލޯބި ޖެހިފައިވާ މީހުންގެ ބަސްތަކެވެ. އޭރާއި މިހާރާ އަޅާބަލާއިރު ވީއައިއޭގެ އައު ޓަރމިނަލް ފެންނަން އޮތް ފުރިހަމަކަމަށް ހިތުއަޑިން ތައުރީފުކޮށްފައިވާ ބަސްތައް ބުނެދެނީ ތަނަށް ގެނެސްފައިވާ ފުރިހަމަ ބަދަލެވެ.
ްއެމީހުންގެ ހިތުގެ ވާހަކަތަކުން ހާމަވެގެންދަނީ ވީއައިއޭގެ އައު ޓަރމިނަލްއަކީ ހަމައެކަނި އާ އިމާރާތެއްގެ ގޮތުގައެއް ނޫނެވެ، އެތަނުގައި އެތައް އަހަރެއްގައި މަސައްކަތްކޮށް، އެތަނަށް ހިތުން ލޯބިވާ މުވައްޒަފުންގެ ހުވަފެންތައް ޙަޤީޤަތަކަށް ވެގެންދިޔަ ތަނެއްގެ ގޮތުގައެވެ. އެ މުވައްޒަފުންގެ އިޚްލާޞްތެރި ޝުޢޫރުތަކުން ދޭހަވަނީ އެއަރޕޯޓަށް ގެނެވުނު މި ބަދަލަކީ އެންމެންގެ ހިތްތަކުގައި އުފާވެރިކަން ގެނުވި ކުރިއެރުމެއްކަމެވެ. މިއީ އެބޭފުޅުންގެ ޚިދުމަތުގެ ފަޚުރުވެރިކަން އައު ޓަރމިނަލްގެ ކޮންމެ ކަންކޮޅަކުންވެސް ފެންނަން އޮތްކަމުގެ ހެއްކެކެވެ.
ވީއައިއޭގެ އައުޓާމިނަލް
ވެލާނާ އިންޓަރނޭޝަނަލް އެއަރޕޯޓްގެ އައު ޓަރމިނަލް ހުޅުވުމާއެކު ދަތުރުފަތުރުގެ ދާއިރާއަށް އަންނަ ބަދަލުތަކުގެ ތެރޭގައި އެންމެ ފުރަތަމަ ހިދުމަތްދޭން ފަށާނީ ދިވެހިރާއްޖޭގެ ޤައުމީ އެއަރލައިން "މޯލްޑިވިއަން"އެވެ. އޭގެ ފަހުން، 2025 ސެޕްޓެމްބަރު މަހުގެ ނިޔަލަށް ހުރިހާ އިންޓަރނޭޝަނަލް އެއަރލައިންތަކެއް މި އައު ޓަރމިނަލްއަށް ބަދަލުވެގެންދާނެއެވެ. މިއީ ރާއްޖޭގެ ވައިގެ ދަތުރުފަތުރުގެ ނިޒާމަށް އަންނާނެ މުހިންމު ބަދަލެކެވެ.
އިޤްތިޞާދީ މުހިންމުކަން: ދުރު ރާސްތާގެ ލަނޑުދަނޑިތައް
މި އައު ޓަރމިނަލްއަކީ ދިވެހިރާއްޖޭގެ އިޤްތިޞާދަށް ދުރު ރާސްތާގައި ފޯރުކޮށްދޭނެ މުހިންމު އެހީތެރިކަމެކެވެ. 2027 ވަނަ އަހަރާ ހަމައަށް ދިވެހިރާއްޖޭގެ ފަތުރުވެރިކަމުގެ އާމްދަނީ 6 ބިލިއަން ޑޮލަރަށް އިތުރުކުރުމުގެ ލަނޑުދަނޑިއަށް ވާސިލުވުމަށް އެޅޭ މުހިންމު ފިޔަވަޅެކެވެ. އަބޫދާބީ ފަންޑް ފޮރ ޑިވެލޮޕްމަންޓް (އޭޑީއެފްޑީ) ފަދަ ބައިނަލްއަޤްވާމީ ބައިވެރިންގެ އެހީތެރިކަމާއެކު ތަރައްޤީކުރެވިފައިވާ މި މަޝްރޫޢުން ދިވެހިރާއްޖެއާއި ދުނިޔޭގެ އެހެން ޤައުމުތަކާ ދެމެދު އޮންނަ ގުޅުން އިތުރަށް ބަދަހިވެގެންދާނެއެވެ. މިއީ ޤައުމީ ކުރިއެރުމަށްޓަކައި ބައިނަލްއަޤްވާމީ ގުޅުންތަކުގެ މުހިންމުކަން ފާހަގަކޮށްދޭ ކަމެކެވެ.
ނިންމުން
ވެލާނާ އިންޓަރނޭޝަނަލް އެއަރޕޯޓްގެ އައު ޓަރމިނަލްއަކީ ހަމައެކަނި އިމާރާތެއް ނޫނެވެ. މިއީ ދިވެހިރާއްޖޭގެ ކުރިމަގަށް ހުޅުވިގެންދާ އައު ދޮރެއްގެ ގޮތުގައި ފާހަގަކުރެވޭނެ ތަރައްޤީގެ މަޝްރޫޢެކެވެ. މި ޓަރމިނަލްގެ ސަބަބުން ރާއްޖޭގެ ފަތުރުވެރިކަމުގެ ދާއިރާއަށް އައު ކުރިއެރުންތަކެއް ލިބި، ޤައުމުގެ އިޤްތިޞާދަށް ފާހަގަކޮށްލެވޭ ކުރިއެރުންތަކެއް ލިބިގެންދާނެކަން ކަށަވަރެވެ. މި ތަރައްޤީއާއެކު ދިވެހިރާއްޖެއަށް އައު ދޮރެއް ހުޅުވި، ބައިނަލްއަޤްވާމީ މަސްރަހުގައި ރާއްޖޭގެ ނަން އިތުރަށް ދިއްލިގެންދާނެއެވެ. އެމްއޭސީއެލްގެ މުވައްޒަފުންގެ ހިތްތަކުގައި އުފެދުނު އުފާވެރިކަމަކީ ޤައުމީ ކުރިއެރުމެއްގެ އަސަރު މުޅި މުޖުތަމަޢަށް ފެތުރިގެންދާނެކަމުގެ ހެއްކެކެވެ.