ޖުލައި 27ގައި މޯލްޑިވިއަނާއެކު އައު ޓަރމިނަލްގެ އޮޕަރޭޝަން ފެށުމަށްފަހު ފަހަރަކު އެއަރލައިނެއް އެ ޓަރމިނަލަށް ބަދަލުކުރާނެ ކަމަށް އެމްއޭސީއެލްގެ ޑެޕިއުޓީ މެނޭޖިން ޑިރެކްޓަރު މުޖުތަބާ ލަތީފް ވިދާޅުވެއްޖެއެވެ.
މުޖުތަބާ މިފަދައިން ވިދާޅުވީ ދައުލަތުގެ މީޑިއާއަށް ދެއްވި އިންޓަރވިއުއެއްގައެވެ.
ވެލާނާ އިންޓަރނޭޝަނަލް އެއަރޕޯޓުގެ އައު ޓަރމިނަލް ޖުލައި 26ގައި ހުޅުވުމަށް އަންނަނީ ތައްޔާރުވަމުންނެވެ. ޓަރމިނަލް ހުޅުވި ނަމަވެސް އޮޕަރޭޝަންތައް ފުރަތަމަ ފަށަން ނިންމާފައިވަނީ ޤައުމީ އެއަރލައިން، މޯލްޑިވިއަނާއެކުގައެވެ.
މުޖުތަބާ ވިދާޅުވީ މިއަހަރުގެ ފަތުރުވެރިންގެ ސީޒަން އަންނަންވާއިރަށް ރާއްޖެއަށް ދަތުރުކުރާ ބައިނަލްއަގުވާމީ ހުރިހާ އެއަރލައިނެއް އައު ޓަރމިނަލަށް ބަދަލުކުރެވޭނެ ކަމަށެވެ. އެގޮތުން، މިހާރު ނިންމާފައިވާގޮތުން އަންނަ ސެޕްޓެމްބަރު މަހުގެ ނިޔަލަށް ހުރިހާ އެއަރލައިނަކަށް ޚިދުމަތް ދޭނީ އައު ޓަރމިނަލުން ކަމަށް ޑެޕިއުޓީ މެނޭޖިންގ ޑިރެކްޓަރ ވިދާޅުވިއެވެ.
އައު ޓަރމިނަލަށް ހުރިހާ އެއަރލައިނެއް ބަދަލުކުރުމަށްފަހު މިހާރު ބޭނުންކުރާ ބައިނަލްއަގުވާމީ ޓަރމިނަލަށް ބަދަލު ގެނެސް، އެތަން ޑޮމެސްޓިކް ދަތުރުތަކަށް ބޭނުންކުރުމުގެ ވިސްނުން އެމްއޭސީއެލުން ގެންގުޅުއްވާ ކަމަށް ވެސް މުޖުތަބާ ވަނީ ވިދާޅުވެފައެެވެ. އަދި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޤައުމީ ތަރައްގީގެ ޕްލޭނާ އެއްގޮތަށް ކުރިއަށް އޮތް 40 އަހަރު ދުވަހު އެއަރޕޯޓް ތަރައްގީ ކުރުމުގެ މަސައްކަތްތައް ފެށިގެންދާނެ ކަމަށްވެސް އޭނާ ވިދާޅުވިއެވެ.