ތަކުފީރުކުރުމަކީ މުސްލިމް އުންމަތުގެ މެދުގައި ފިތުނަ ފެތުރި، އެއްބައިވަންތަކަން ކަނޑުވައިލާ ނުރައްކާތެރި ޢަމަލެއް ކަމަށް މިއަދުގެ ޚުތުބާގައި ބުނެފިއެވެ.
މިއަދުގެ ހުކުރު ޚުތުބާގެ މައުޟޫއުއަކީ “މުސްލިމަކު ކާފިރުކުރުމުގެ ނުބައިކަން” މިއެވެ.
ހުތުބާގައި ބުނީ ކާފިރުކުމަކީ މުސްލިމަކު ނުވަތަ މުސްލިމު ޖަމާއަތެއް ކުފުރަށް ނިސްބަތް ކުރުން ކަމަށާއި އަދި އެއީ އެމީހުންގެ ފުރާނަ އާއި މުދާ ހުއްދަކުރުން ކަމަށެވެ. މިކަމަކީ އެހާ ފަސޭހައިން ކުރެވިގެން ވާނޭ ކަމެއް ނޫންކަމަށާއި އެއްވެސް މީހަކަށް އިސްލާމްކަމުގެ މަތިވެރި ޝަރަފު ލިބުމަށްފަހު އޭނާ އެ ދާއިރާއިން ބޭރުކުރުމަކީ ވަރުގަދަ ހުއްޖަތާއި ސާބިތު ހެތްކާއި އަދި ރޯމާ ދުވާލު ފަދަ އަލިގަދަ ދަލީލުތަކެއް ނެތި ކުރުން ހަރާމް ކަމެއް ކަމަށް ހުތުބާގައި ވަނީ ބުނެފައެވެ.
ޚުތުބާގައި ބުނީ، ޝަރުޢީ ނައްޞުތަކުން ސާފުކޮށް އެނގޭ ގޮތުގައި މުސްލިމަކާ ދިމާލަށް ބަދު ބަސް ބުނުމާއި ޤަދްފުކުރުމަކީ ޙަރާމްކަންތައްކަމުގައި ވީއިރު، ހީއެއް ނުވަތަ އަމިއްލަ ވިސްނުމުގެ މައްޗަށް ބިނާކޮށް މުސްލިމަކު ކާފަރުކުރުން ހުއްދައެއް ނުވާނެ ކަމަށެވެ. މިކަން ހާމަކޮށް ޚުތުބާގައި ވަނީ ރަސޫލާ ﷺގެ ޒަމާނުގައި ހިނގައި ދިޔަ އެފަދަ ހާދިސާ ތަކަށް އަލިއަޅުވާަލާފައެވެ.
މުސްލިމުން ކާފިރުކުރުމުގެ މައްސަލަ ފެށިފައިވަނީ، ހިޖުރައިން ފުރަތަމަ ޤަރުނުގައި، ޢަލީ ރަޟިޔަﷲ ޢަންހު އާއި މުޢާވިޔާ ރަޟިޔަﷲ ޢަންހު ދެމެދު ހިނގި ޞިއްފީނު ހަނގުރާމައިގައި، ޙަކަމުން މެދުވެރިކޮށް ހަނގުރާމަ ހުއްޓައިލާން ޢަލީގެފާނު ރުހިވަޑައިގަތުމާ ގުޅިގެންނެވެ.
ޚުތުބާގައި ބުނީ، އެކަމުގެ ހައްލަކީ ސުންނަތްޖަމާއަތުގެ މަންޖަހަށް އެނބުރި ރުޖޫއަވުން ކަމަށެވެ. އިންޓަނެޓުން ދަސްވެނިވުމުގެ ބަދަލުގައި ބޮޑެތި އާލިމުންގެ އަރިހުން ދަރިވަރުވުމަށް ވަނީ ނަސޭހަތްތެރިވެފައެވެ.