އަނބިމީހާ ނުވަތަ ފިރިމީހާއަށް ބިންވެރިޔާ ސްކީމުން ގޯތި ލިބިފައި އޮތްނަމަވެސް، ގެދޮރުވެރިޔާ ސްކީމުން ލިބިފައިވާ ފްލެޓް ނުގެއްލޭނެ ކަމަށް އިމާރާތްކުރުމާއި ގެދޮރުވެރިކަމާ ބިނާވާ ބެހޭ ވުޒާރާއިން މިއަދު ވިދާޅުވެއްޖެއެވެ.
ވުޒާރާއިން މި ނިންމުން ނިންމާފައިވަނީ، ކުރިން އާންމުކުރި އުސޫލުގައި ފްލެޓް ލިބޭނީ ގޯތި ދޫކޮށްލުމުން ކަމަށް ބަޔާންކޮށްފައި އޮތުމާ ގުޅިގެން، އާންމުން ފާޅުކުރަމުންދިޔަ ކަންބޮޑުވުންތަކަށް ރިއާޔަތްކޮށެވެ. ކުރިން އާންމުކުރި އުސޫލުގައި ބަޔާންކޮށްފައިވަނީ، ބިންވެރިޔާ ސްކީމުން އަނބިމީހާ ނުވަތަ ފިރިމީހާއަށް ގޯތި ލިބިފައިވާ ފަރާތްތަކަށް ގެދޮރުވެރިޔާ ސްކީމުން ފްލެޓް ލިބޭނީ، އެ ގޯތި ދޫކޮށްލަން އެއްބަސްވާ ފަރާތްތަކަށް ކަމަށެވެ.
ވުޒާރާއިން ވިދާޅުވެފައިވާ ގޮތުގައި، މި އުސޫލަށް ބަދަލު ގެނައުމަށް ނިންމާފައިވަނީ، ބިންވެރިޔާ ސްކީމުގެ ދަށުން މާލެ ސަރަހައްދުން ބިން ދޫކުރުމަށް ހަމަޖެހިފައިވާ ހުޅުމާލެ ފޭސް 3 އަދި ގިރާވަރުފަޅު ހިއްކުމުގެ މަސައްކަތް ކުރިއަށްދާތީއާއި، ހިއްކާފައިވާ ބިންތަކުގައި އިމާރާތްކޮށް ދިރިއުޅެން ފެށުމަށް ގިނަ ވަގުތު ނަގާނެތީއެވެ.
އަދި ވުޒާރާއިން އިތުރަށް ފާހަގަކުރައްވާފައިވަނީ، 15 ނޮވެމްބަރު 2023 ގައި މިނިސްޓްރީ އޮފް ނެޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރއިން އިޢުލާނުކުރި ލިސްޓާ ގުޅިގެން، ފްލެޓް ނަންބަރު ގުރުއަތުނަގައި ލިބޭ ފްލެޓް ކަނޑައަޅާފައިވާ ފަރާތްތަކުގެ ތެރެއިން، އެއްވެސް ފަރާތެއްގެ ޝަރުތު ހަމަނުވާކަމުގެ ލިޔުމެއް މިހާތަނަށް ފޮނުވާފައި ނުވާނެ ކަމަށެވެ.
ސަރުކާރުން މިހާރު ދަނީ 4000 ހައުސިންގ ޔުނިޓް ހަވާލުކުރުމުގެ މަސައްކަތަށް ތައްޔާރުވަމުންނެވެ. މި މަސައްކަތުގެ ތެރެއިން، އަންނަ ހޯމަ ދުވަހު ކޮންޓްރެކްޓްގައި ސޮއިކުރުމުގެ މަސައްކަތް ފެށުމަށް ވަނީ ހަމަޖެހިފައެވެ.