ރާއްޖެއިން ބޭރަށް ބޭސްފަރުވާއަށް ދާ ފަރާތްތަކަށް ޑޮލަރު ހޯދުމުގައި އިތުރު ލުއި ފަސޭހަތަކެއް ގެނެސްދިނުމަށް ސަރުކާރުން ނިންމައިފިއެވެ.
މިގޮތުން 2025 އޮގަސްޓު 1 އިން ފެށިގެން އެންސްޕާ ޕޭޝަންޓުންނަށް ވެސް ބޭންކުތަކުން 2,000 ޑޮލަރާ ހަމައަށް ލިބޭނެ އިންތިޒާމު ހަމަޖައްސައިދޭން ވަނީ ނިންމާފަ އެވެ.
ރައީސް ޑރ. މުޙައްމަދު މުޢިއްޒު އެކްސް (ކުރީގެ ޓްވިޓަރ) ގައި ކުރެއްވި ޕޯސްޓެއްގައި ވިދާޅުވި ގޮތުގައި، މިހާރުވެސް އާސަންދަ ޕޭޝަންޓުންނަށް ބޭންކު މެދުވެރިކޮށް 2,000 ޑޮލަރާ ހަމައަށް ލިބޭ ފަދައިން، އެންސްޕާ ޕޭޝަންޓުންނަށް ވެސް މި ޚިދުމަތް ފޯރުކޮށްދިނުމަށް ވަނީ ނިންމާފައެވެ.
މީގެއިތުރުން، އަމިއްލަ ޚަރަދުގައި ރާއްޖެއިން ބޭރަށް ބޭސްފަރުވާއަށް ދާ ފަރާތްތަކަށްވެސް އޮގަސްޓު 1 އިން ފެށިގެން ބޭންކުތައް މެދުވެރިކޮށް 1,000 ޑޮލަރު ލިބޭނެ އިންތިޒާމު ހަމަޖެއްސުމަށް ކަމާބެހޭ ފަރާތްތަކަށް އަންގަވާފައިވާ ކަމަށް ރައީސް މުޢިއްޒު ވަނީ ހާމަކުރައްވާފައެވެ.