ބޮންޑެޑް ވެއާހައުސްގެ ލީސް ފީއަށް ގެނައި ބަދަލާ ގުޅިގެން އާންމު މުދަލުގެ އަގުތަކަށް ބާޒާރުގައި އަސަރުނުކުރާނެ ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން މިއަދު ވިދާޅުވެއްޖެއެވެ.
އެމްޕީއެލްއިން ނެރުއްވި ނޫސްބަޔާނެއްގައި ވިދާޅުވެފައިވަނީ ހުޅުމާލެ ބޮންޑެޑް ވެއާހައުސް އޭރިއާ 1، 2، އަދި 3ގެ ލީސް ފީއަށް 15 އޯގަސްޓް 2025 ވަނަ ދުވަހުން ފެށިގެން ބަދަލު ގެންނަން ނިންމާފައިވާ ކަމަށެވެ. މި ބަދަލު ގެނައުމުގެ މައިގަނޑު ސަބަބެއްގެ ގޮތުގައި ފާހަގަކޮށްފައިވަނީ ކަސްޓަމަރުންގެ މުދަލުގެ ސަލާމަތާއި ރައްކާތެރިކަން ކަށަވަރުކޮށްދިނުމުގެ ގޮތުން 24 ގަޑިއިރުގެ ސެކިއުރިޓީ ޚިދުމަތް ފޯރުކޮށްދޭންޖެހުމެވެ.
އެމްޕީއެލްއިން ދެއްވި މައުލޫމާތުގައި، އެ ސަރަހައްދުގައި މޯލްޑިވްސް ކަސްޓަމްސްގެ ޚިދުމަތްތައް ފޯރުކޮށްދިނުމަށް ވަކި ފެސިލިޓީއެއް ގާއިމުކޮށްފައިވާ ކަމަށާއި، މުދާ ލޯޑުކުރުމާއި އަންލޯޑްކުރުމަށް ވަކި ކީ ވޯލެއް ކަނޑައަޅާފައިވާ ކަމަށް ވެސް ފާހަގަކުރައްވާފައިވެއެވެ.
“މިހާރު ކަސްޓަމަރުން އަމިއްލައަށް ކުނި އުކާލަން ޖެހުނު ނަމަވެސް، 15 އޯގަސްޓް 2025 ވަނަ ދުވަހުން ފެށިގެން ވޭސްޓް ޑިސްޕޯސަލްގެ ޚިދުމަތް ވެސް ބޮންޑް ވެއާހައުސްގެ ކަސްޓަމަރުންނަށް ކުންފުނިން ފޯރުކޮށްދޭނެ،” ކަމަށް އެމްޕީއެލް އިން ވިދާޅުވިއެވެ.
އެމްޕީއެލްއިން އިތުރަށް ފާހަގަކުރެއްވި ގޮތުގައި ހުޅުމާލެ ބޮންޑެޑް ވެއާހައުސް އޭރިޔާ 1، 2 އަދި 3 ގައި ބޮންޑް ކުރަނީ ހަމައެކަނި ޓޫރިސްޓް ރިސޯޓްތަކަށް ގެންނަ ބަނގުރަލާއި އޫރު މަހުގެ ބާވަތްތައް ކަމަށްވުމުން، މި ބަދަލާ ގުޅިގެން އާންމު މުދަލުގެ އަގުތަކަށް އެއްވެސް އަސަރެއް ނުކުރާނެއެވެ.
އެމްޕީއެލްގެ އިއުލާނުގައިވާ ގޮތުން، އައު އަގުތަކުގައި ޖީއެސްޓީ ހިމަނައިގެން 20 ފޫޓުގެ ކޮންޓެއިނަރަކަށް މަހެއްގެ މައްޗަށް 1،134 ޑޮލަރު އަދި 40 ފޫޓުގެ ކޮންޓެއިނަރަކަށް 2،268 ޑޮލަރު ދައްކަންޖެހޭނެއެވެ.