ދިވެހި މީޑިއާގެ އިސް ސަފުގައި އަންހެނުން ހަރަކާތްތެރިވާ މިންވަރު އިތުރުވެ، އަންހެނުންގެ އިސްނެގުމާއެކު ދިވެހި މީޑިއާއަށް އިތުރު ކުރިއެރުން ލިބެމުންދާ ކަމަށް ރައީސުލްޖުމްހޫރިއްޔާގެ އޮފީހުގެ ތަރުޖަމާނު ހީނާ ވަލީދު ވިދާޅުވެއްޖެއެވެ.
20 ވަނަ އޭޝިއާ މީޑިއާ ސަމިޓުގައި ބޭއްވުނު ޕްލިނަރީ ސެޝަނެއްގައި ވާހަކަފުޅު ދައްކަވަމުން ހީނާ ވިދާޅުވީ، ރާއްޖޭގެ ނޫސްވެރިކަމާއި ބްރޯޑްކާސްޓިންގ ދާއިރާގައި އަންހެނުންގެ ދައުރު ވަރަށް ބޮޑުކަމަށެވެ. އެގޮތުން ޕީއެސްއެމްގެ ޗެއަރޕާސަން އާއި ބްރޯޑްކާސްޓިންގ ކޮމިޝަންގެ ރައީސަކީވެސް އަންހެން ބޭފުޅުންކަން އެ ކަމަނާ ފާހަގަކުރެއްވިއެވެ.
ސިވިލް ސަރވިސްގެ މަތީ ފަންތީގެ މަޤާމުތަކުގައި އަންހެނުންގެ ހިއްސާ ބޮޑުކަން ފާހަގަކުރައްވަމުން، ރައްޔިތުންގެ މަޖިލީހާއި ވަޒީރުންގެ މަޖިލީހުގައިވެސް އަންހެނުން މުހިންމު ދައުރެއް އަދާކުރަމުންދާކަމަށް ހީނާ ވިދާޅުވިއެވެ. މީގެއިތުރުން، ރާއްޖޭގެ ޚާރިޖީ މިޝަންތަކުގައި 7 އަންހެން ސަފީރުން މަސައްކަތްކުރައްވާކަމާއި، ލޯކަލް ކައުންސިލްތަކުގައިވެސް މިންތީގެ ހަމަހަމަކަން ކަށަވަރުކުރެވިފައިވާކަން ފާހަގަކުރެއްވިއެވެ.
ހައްސާސް ދަނޑިވަޅުތަކުގައި ރައްޔިތުންނަށް ތެދު މަޢުލޫމާތު ފޯރުކޮށްދިނުމުގެ މުހިންމުކަމަށް އަލިއަޅުވާލައްވަމުން، 2004 ވަނަ އަހަރުގެ ސުނާމީ ކާރިސާގެ ދަނޑިވަޅުގައި ދިވެހި މީޑިއާއިން ކުރި މަސައްކަތްތައް ހީނާ ފާހަގަކުރެއްވިއެވެ.
ދޮގު ޚަބަރާއި މަޢުލޫމާތާ ދެކޮޅަށް މަސައްކަތްކުރުމުގައި ރާއްޖެ ފަދަ ކުދި ޖަޒީރާ ޤައުމުތަކަށް ކުރިމަތިވެފައިވާ ގޮންޖެހުންތަކަށް އަލިއަޅުވާލައްވަމުން، މޯލްޑިވްސް މީޑިއާ ކައުންސިލާއި ބްރޯޑްކާސްޓިންގ ކޮމިޝަނުން މި ކަމުގައި އަދާކުރާ މުހިންމު ދައުރު ހީނާ ފާހަގަކުރެއްވިއެވެ.
މި ބައްދަލުވުމުގައި ހީނާ ވަނީ، ހާމަކަން ބޮޑު، ދެފުށް ފެންނަ ގޮތެއްގައި ވެރިކަން ހިންގުމަށް ސަރުކާރުން ގެންގުޅުއްވާ ސިޔާސަތުގެ ދަށުން ތަޢާރަފުކޮށްފައިވާ ސިޓިޒަންސް ވޮއިސް ޕޯޓަލް އަދި “އަހާ” ފޯރަމްގެ މުހިންމުކަންވެސް ފާހަގަކުރައްވާފައެވެ.