ރާއްޖޭގެ މިނިވަންކަމަށް 60 އަހަރު ފުރޭ މުނަސަބާތާއި ދިމާކޮށް ގެމަނަފުށީ ކައުންސިލުން ބާއްވާ ވޮލީ މުބާރާތް ހުރިހާ ގޮތަކުން ފޯރިގަދަ އަދި ފުރިހަމަ މުބާރާތަކަށް ވާނެކަމާއިމެދު އެއްވެސް ޝައްކެތްނެތެވެ.
ފުވައްމުލަކު ސިޓީ ހިމެނޭހެން 11 ޓީމް މުބާރާތުގައި ވާދަކުރާއިރު މި މުބާރާތުގައި ރާއްޖޭގެ މަޝްހޫރު ކުޅުންތެރިންގެ ވާދަވެރިކަން ފެނިގެންދާނެއެވެ.
މި މުބާރާތަށް ގެމަނަފުށި ކައުންސިލުން ދަނީ ވަރަށް ބޮޑަށް ތައްޔާރުވަމުންނެވެ. އެގޮތުން ރަށް ޒީނަތްތެރި ކުރުމާއި، މުބާރާތާއި ގުޅޭ އެކިއެކި ހަރަކާތްތައް ދަނީ ބާއްވަމުންނެވެ. މީގެ ތެރެއިންވެސް އެންމެ ފާހަގަކޮށްލެވެނީ އެ ރަށުގައި ގާއިމް ކޮށްފައިވާ ހާއްސަ މޮނިއުމަންޓެވެ.
30 ފޫޓު އުސްމިނުގައި ހުރި މި މޮނިއުމަންޓް ހާއްސަވެގެން ދަނީ ގެމަނަފުށިން މި މުބާރާތަށް ވެފައިވާ ތައްޔާރީއާއި ހާއްސަކޮށް ވޮލީއަށް އޮތް ލޯބި ދައްކުވައިދޭ ރަމްޒީ ބިނާއެއްގެ ގޮތުގައެވެ.
ގެމަނަފުށި ކައުންސިލްގެ ރައީސް ނާޝިދު ވިދާޅުވީ މި މޮނިއުމަންޓަކީ ގެމަނަފުށިން މި މުބާރާތަށް ދޭ އަހަމިއްޔަތު ދައްކުވައިދޭ ރަމްޒީ ބިނާއެއްގެ ގޮތުގައެވެ. އަދި މި މޮނިއުމަންޓުން ގެމަނަފުށީ ރައްޔިތުންގެ އެކުވެރިކަމާއި އެއްބައިވަންތަކަން ދައްކުވައިދޭނެ ކަމަށެވެ. ހާއްސަކޮށް މި މަސައްކަތް މިހާފުރިހަމައަށް ނިންމާލުމަށް އެހީތެރިވެދިން ހުރިހާ ފަރާތްތަކަށް ޝުކުރުދަންނަވާ ކަމަށް ރައީސް ވިދާޅުވިއެވެ. ގެމަނަފުށީ ކައުންސިލް ވޮލީ މުބާރާތް ވެގެންދާނީ އަތޮޅު ތެރޭގައި ބޭއްވޭ އެންމެ ފޯރިގަދަ އެންމެ ފުރިހަމަ މުބާރާތަށް ހެދުމަށް ރަށުގެ ޒުވާނުންނާއި އެކި ފަންތީގެ ބޭފުޅުން ދެއްވާ އެއްބާރުލުމަށް ޝުކުރު ދަންނަވާކަމަށް ރައީސް ވިދާޅުވިއެވެ.
މުބާރާތް ފެށުމަށް ވާންޖެހޭ ހުރިހާ ތައްޔާރީތަކެއް ވަނީ ނިމިފައެވެ. ރަށުން ބޭރުން އަންނަ ޓީމްތަކަށް މެހުމާންދާރީ އަދާކުރުމަށް ވަކި ހާއްސަ ހަރަކާތްތަކެއް ވަނީ ރާވާފައެވެ.
ތައްޔާރުވުމަށް ބަލާއިރު ހުރިހާ ޓީމްތަކުންވެސް ފޯރިއާއިއެކު ޕްރެކްޓިސް ކުރަމުންދާއިރު، މުބާރާތުގެ ތައްޔާރީތައް ވެސް ކައުންސިލުން ދަނީ ކުރަމުންނެވެ. އަދި ކައުންސިލްގެ ވިސްނުމަކީ ފެންވަރުގެ ގޮތުން ފޯރިގަދަ މުބާރާތެއް ބޭއްވުމެވެ.
މުބާރާތުގައި ބައިވެރިވެފައިވާ ފިރިހެން ޓީމްތަކަކީ ގެމަނަފުށި ވޮލީ ކުލަބު، ވެލާ، ފޭސް ފިޔޯރީ ވޮލީޓީމް، ކާމިޔާބު ވޮލީޓީމް، ހުޓިކޮޑާ، އަދި ނިލަންދޫ ވޮލީޓީމެވެ. އަދި އަންހެން ޓީމްތަކަކީ ސީ ކުއީންސް، ގެމަނަފުށީ ވޮލީ ކުލަބު، ކަނޑުހުޅުދޫ ވޮލީޓީމް، އިގްނައިޓް ޖޫނިއާސް، ހުޓިކޮޑާ ކަނބަލުންނެވެ.
މުބާރާތުގެ ޗެމްޕިއަން ޓީމްއަށް 50000 ރުފިޔާގެ ފައިސާގެ އިނާމެއް ދިނުމަށް ނިންމާފައިވާއިރު ރަނަރަޕް ޓީމަށް 25000 ރުފިޔާގެ ފައިސާގެ އިނާމެއް ވަނީ ހުށައަޅާފައެވެ.
މުބާރާތް ކުޅުމަށް ހަމަޖެހިފައިވަނީ ގެމަނަފުށި ރަސްމީ ވޮލީކޯޓުގައެވެ.
ވޮލީކޯޓު ޒަމާނީ ފެންވަރަށް ތަރައްގީ ކުރުމާއިއެކު މި ބޭއްވޭ މުބާރާތަކީ ދެކުނުގައި ބޭއްވޭ އެންމެ ފޯރިގަދަ މުބާރާތަށް ވާނެކަމަށް ގިނަބަޔަކު ގަބޫލުކުރެއެވެ.
ހާއްސަކޮށް ގެމަނަފުއްޓަކީ ވޮލީގެ ހާއްސަ ރަށަކަށްވެފައި ސަރަހައްދުގައި ބޭއްވޭ ގިނަ މުބާރާތްތަކުން އެރަށުގެ ޓީމްތައްދަނީ ރަނގަޅު ކާމިޔާބީތަކެއް ހޯދަމުންނެވެ.