އިންޑިއާގެ ބޮޑުވަޒީރު ނަރެންދްރަ މޯދީ ރާއްޖެއަށް ކުރައްވަމުންދާ ފުރަމާނަ ދަތުރުފުޅުގެ ތެރެއިން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ދަޢުވަތަކަށް 5 މިލިއަން ގަސް އިންދުމުގެ ޕްރޮގްރާމްގައި ބައިވެރިވެވަޑައިގެން ސަލްޓަން ޕާކްގައި އަނބު ގަހެއް އިންދަވައިދެއްވައިފިއެވެ.
ފަސް މިލިޔަން ގަސް އިންދުމުގެ ޕްރޮގުރާމަކީ ރާއްޖެއިން ނެތެމުންދާ ގަސްތައް އަލުން އާލާކުރުމާއި ފެހިކަން އިތުރުކޮށް މާހައުލީ ނިޒާމު ދެމެހެއްޓުމަށް ރައީސް މުޢިއްޒު އިޢުލާންކުރައްވާފައިވާ ޕްރޮގުރާމެކެވެ. މި ޕްރޮގްރާމް ރަސްމީކޮށް ފައްޓަވާފައިވަނީ "ކޮޕް28" ގައި އިޢުލާންކުރެއްވުމަށްފަހު، ދުނިޔޭގެ ތިމާވެށީގެ ދުވަހާ ގުޅުވައިގެންނެވެ.
ރާއްޖޭގައި މިހާތަނަށް ހިންގާ ގަސް އިންދުމުގެ އެންމެ ބޮޑު ޕްރޮގްރާމްގެ ގޮތުގައި ފާހަގަކުރެވޭ މި ޕްރޮގްރާމުގެ ދަށުން މިހާތަނަށް 595,000 ގަސް ވަނީ އިންދާފައެވެ. އަދި 6.3 މިލިޔަން ގަސް އިންދުމަށް އެކި މުޢައްސަސާތަކާއި އަމިއްލަ ފަރާތްތަކުން ވަނީ ކަނޑައަޅާފައެވެ. ސަރުކާރުގެ އަމާޒަކީ މިއަހަރުގެ ނިޔަލަށް 2 މިލިޔަން ގަސް އިންދުމެވެ.
ސަރުކާރުން ފާހަގަކުރައްވާ ގޮތުގައި މި ޕްރޮގްރާމަކީ މީގެކުރިން ހިންގާފައިވާ މިފަދަ ޕްރޮގްރާމްތަކާ ޚިލާފަށް ދެމެހެއްޓެނިވި ގޮތެއްގައި ކުރިއަށް ގެންދެވޭނެ ޕްރޮގްރާމެކެވެ. އަދި މި ޕްރޮގްރާމްގައި ޚާއްޞަ އިސްކަމެއް ދެވިފައިވަނީ ރާއްޖެއިން ނެތެމުންދާ 90 ބާވަތެއްގެ ގަސް އަލުން އާލާކުރުމަށެވެ.
މި ޕްރޮގްރާމަކީ ރާއްޖޭގެ ތިމާވެށި ހިމާޔަތްކޮށް، ގުދުރަތީ މާހައުލު ދެމެހެއްޓުމަށް އެޅޭ މުހިންމު ފިޔަވަޅެއްގެ ގޮތުގައި ސަރުކާރުން ފާހަގަ ކުރައްވައެވެ.