ޤައުމީ ޕޭމެންޓް ނިޒާމު ވަކި ކުންފުންޏެއްގެ ދަށުން ތަރައްޤީކުރުމުގެ މަސައްކަތް ކުރަމުންދާ ކަމަށް އެމްއެމްއޭއިން ބުނެފިއެވެ.
އެމްއެމްއޭއިން މިކަން ހާމަކޮށްފައިވަނީ ފަވަރަ ނިޒާމާއި އިންޑިއާގެ ޕޭމެންޓް ނިޒާމު ޔޫޕިއައި ގުޅާލުމާއި ގުޅޭގޮތުން އެއިދާރާއިން ނެރުނު ބަޔާނުގައެވެ.
އިންޑިއާގެ އެންޕީސީއައި އިންޓަނޭޝަނަލް ޕޭމަންޓްސް ލިމިޓެޑް (އެންއައިޕީއެލް) އާއި އެމްއެމްއޭއާ ދެމެދު ސޮއިކުރެވުނު އެއްބަސްވުމާއި ގުޅޭގޮތުން ނެރުނު ބަޔާނުގައި އެމްއެމްއޭއިން ބުނީ މި އެއްބަސްވުމާއެކު ދެ ޤައުމުގެ ދެމެދު ފަސޭހަކާމާއެކު އާންމު ރައްޔިތުންނަށް މާލީ މުޢާމަލާތް ކުރެވޭނެ އިންތިޒާމު ހަމަޖެހިގެންދާނެ ކަމަށެވެ.
އެހެންކަމުން ދިވެހިރާއްޖޭގެ ޕޭމަންޓް އިންފްރާސްޓްރަކްޗަރ ތަރައްގީކޮށް ދިވެހިރާއްޖޭގެ މާލީ ނިޒާމް އިތުރަށް ހަރުދަނާ ކުރުމަށް މަގުފަހުވެގެންދާނެ ކަމަށް އެމްއެމްއޭއިން ވަނީ ބުނެފައެވެ. ދިވެހިރާއްޖޭގެ އިންސްޓަންޓް ޕޭމަންޓް ސިސްޓަމް–ފަވަރަ އާއި ޔުނިފައިޑް ޕޭމަންޓްސް އިންޓަފޭސް (ޔޫޕީއައި) ގުޅާވާލުމުން ފަރުދުންގެ ފައިސާގެ މުޢާމަލާތް ރައްކާތެރިކަމާއެކު ހެޔޮ އަގުގައި ވަގުތުން ކުރެވޭނެ އިންތިޒާމް ހަމަޖެހިގެން ދާނެ ކަމަށް އެމްއެމްއޭއިން ހާމަކުރިއެވެ.
މި ޚިދުމަތްތައް ތަޢާރަފް ކުރުމަށް ހަމަޖެހިފައިވަނީ ދެމަރުހަލާއަކަށެވެ. އެއީ:
- ދިވެހިރާއްޖެ އާއި އިންޑިއާގެ ދޭދޭ ފަރުދުންގެ މެދުގައި ވަގުތުން ވަގުތަށް ފައިސާގެ މުޢާމަލާތްތަށް ކުރެވޭނެ ނިޒާމެއް 2026 ވަނަ އަހަރުގެ ތަޢާރަފްކުރާނެ
- ފަރުދުން ކުރާ ވިޔަފާރި މުޢާމަލާތްތައް ފަސޭހަކަމާއިއެކު ކިއުއާރު ކޯޑް މެދުވެރިކޮށް ކުރެވޭނެ ނިޒާމެއް ތަޢާރަފްކުރާނެ
މި ޚިދުމަތްތައް ތަޢާރަފް ކުރުމަށް ރޭވިފައިވަނީ ދެޤައުމުގެ ދޭތެރޭ ކުރެވޭ ފައިސާގެ މުޢާމަލާތްތަކުގައި އެ ޤައުމެއްގެ އަމިއްލަ ފައިސާ ބޭނުންކުރެވޭނެ ގޮތަށް ކަމަށް އެމްއެމްއޭއިން ވަނީ ބުނެފައެވެ.
“ޕޭމެންޓް މޯލްޑިވްސް” ނަމުގައި ވަކި ކުންފުންޏެއް ހަދައި ބައިނަލްއަޤްވާމީ ފެންވަރުގައި ބަލައިގަންނަ ޤައުމީ ޕޭމެންޓު ނުވަތަ ފައިސާގެ މުޢަމާލާތުގެ ނިޒާމެއް ޤާއިމްކުރުމުގެ މަސައްކަތް އެކުންފުނީގެ ދަށުން ކުރުމަށް ނިންމައި އެކަމުގެ މަސައްކަތް ކުރަމުންދާ ކަމަށް ވެސް އެމްއެމްއޭއިން ވަނީ ހާމަކޮށްފައެވެ. އަދި މިކަން ތަންފީޒުކުރުމަށް ޤާނޫނީ އޮނިގަނޑަށް ގެންނަންޖެހޭ ބަދަލުތައް ގެނައުމުގެ މަސައްކަތް ކުރަމުންދާކަމަށް އެމްއެމްއޭއިން ވަނީ ބުނެފައެވެ.