ފުލުހުންގެ ކޮންމެ ޔުނީފޯރމަކުން ދައްކުވައިދެނީ ޤައުމާއި ރައްޔިތުންނަށްޓަކައި ކޮށްދެވޭ ޚާއްސަ ޚިދުމަތް ކަމަށް ކޮމިޝަނަރ އޮފް ޕޮލިސް އިސްމާޢީލް ނަވީން ވިދާޅުވެއްޖެއެވެ.
ސީޕީ މިހެން ވިދާޅުވީ ދިވެހިރާއްޖޭގެ 60 ވަނަ މިނިވަން ދުވަހުގެ މުނާސަބަތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދިވެހި ސިފައިންނާއި ފުލުހުންނާއި ބަދައްލުކުރެއްވުމަށް ސޯޝަލް ސެންޓަރުގައި ބޭއްވި ރަސްމިއްޔާތުގައި ވާހަކަދައްކަމުންނެއެވެ.
ދިވެހި ފުލުހުންނަކީ މުޖްތަމައުގެ ސަލާމަތާއި ރައްކާތެރިކަން ކަށަވަރުކޮށް ރައްޔިތުންނަށް ޚިދުމަތްކުރަން ތިބި ބައެއްކަމަށާއި، އެގޮތުން މުޖްތަމައުގެ މިނިވަންކަމާއި އަމަން އަމާންކަން ގާއިމްކޮށް ރައްކާތެރިކުރުމަކީ ދިވެހި ފުލުހުންގެ ޒިންމާއެއްކަމަށް ސީޕީ ނަވީން ވިދާޅުވިއެވެ.
ރާއްޖޭގެ މަގުތަކަކީ އަމާން ރައްކާތެރި ތަނަކަށް ހެދުމަށާއި މަގުމަތީގެ ސަލާމަތާއި ރައްކާތެރިކަން ކަށަވަރު ކުރުމާއި ރާއްޖޭގައި ގަވައިދާ ޚިލާފަށް އުޅޭ ބިދޭސީންގެ މައްސަލަ ހައްލުކުރުމަށް ސަރުކާރާއި އަމިއްލަ ފަރާތްތަކާއެކު މަސައްކަތް ކުރަމުންދާކަމަށް ސިޕީ ނަވީން ވިދާޅުވިއެވެ.
ފުލުހުންގެ ޚިދުމަތް ޒަމާނާއި އެއްގޮތަށް ބައްޓަންކޮށް މީހުން ބިނާ ކުރުމަށާއި އޮޕަރޭޝަނަލް އަދި ތަހުގީގުތަކުގެ ފެންވަރު ރަނގަޅުކޮށް ރައްޔިތުންގެ އިތުބާރު ލިބޭ ފަދަ ޚިދުމަތަކަށް ހަދާނެކަމުގެ ޔަޤީންކަން ދެއްވާކަމަށް ވެސް ސީޕީ ނަވީން ވަނީ ވިދާޅުވެފައެވެ.