ގެމަނަފުށީ ކައުންސިލް ވޮލީ މުބާރާތް 2025 ގެ އަންހެން ޑިވިޝަންގެ ފުރަތަމަ މެޗުގައި ފަސޭހަ ކަމާއިއެކު އިގްނައިޓް ޖޫނިއަރ ބަލިކޮށް ގެމަނަފުށީ ވޮލީ ކުލަބުން މުބާރާތުގެ ފުރަތަމަ މޮޅު ހޯދައިފިއެވެ.
ގެމަނަފުށީ ރަސްމީ ވޮލީ ކޯޓުގައި ކުރިއަށް ދިޔަ މި މެޗު އެޓީމް ކާމިޔާބު ކުރީ ސީދާ 3 ސެޓުންނެވެ. ގެމަނަފުށީ ވޮލީ ކުލަބަކީ މި މުބާރާތުގެ ފެވަރީޓުންގެ ގޮތުގައި ބެލެވިފައިވާ އެއްޓީމެވެ. ރަށުން ބޭރުގެ 2 ކުޅުންތެރިންނާއިއެކު މި ޓީމް ފެންނަނީ ގަދަކޮށެވެ.
މެޗުގެ ފުރަތަމަ ސެޓު ފަސޭހަ ކަމާއިއެކު 25،10 ކާމިޔާބު ކުރި އިރު ދެވަނަ ސެޓު ކާމިޔާބު ކުރީ 25’13 އިންނެވެ. އަދި 3 ވަނަ ސެޓު 25،21 އިން ކާމިޔާބު ކޮށް ސީދާ 3 ސެޓުން ވަނީ މެޗު ކާމިޔާބު ކޮށްފައެވެ.
މި މެޗުގެ މޮޅު ކުޅުންތެރިޔަކަށް ހޮވިފައިވަނީ ގެމަނަފުށީ ވޮލީ ކުލަބުގެ ޖާޒީ ނަންބަރު 3 ފާތުމަތު މަޒިއްޔާއެވެ.
މެޗުގެ މޮޅު ކުޅުންތެރިޔާ ފާތުމަތު މަޒިއްޔާ/ ފޮޓޯ: ދޮންކޮޅު
މި މުބާރާތުގެ ފެށުމުގެ ރަސްމިއްޔާތު މިރޭ ބޭއްވުމަށް ހަމަޖެހިފައިވާއިރު މިރޭ ވެސް އަންހެން ޑިވިޝަންގެ މެޗެއް ކުޅުމަށް ވަނީ ހަމަޖެހިފައެވެ. ރަށުން ބޭރުން މި މުބާރާތުގައި ވާދަކުރާ ފުވައްމުލަކު ސިޓީގެ ސީކުއިން އަދި ގއ ކަނޑުހުޅުދޫ ވާދަ ކުރާނެއެވެ. މި މެޗު ފެށުމަށް ހަމަޖެހިފައިވަނީ 20:30 ގައެވެ.
މުބާރާތުގައި ބައިވެރިވެފައިވާ ފިރިހެން ޓީމްތަކަކީ ގެމަނަފުށި ވޮލީ ކުލަބު، ވެލާ، ފޭސް ފިޔޯރީ ވޮލީޓީމް، ކާމިޔާބު ވޮލީޓީމް، ހުޓިކޮޑާ، އަދި ނިލަންދޫ ވޮލީޓީމެވެ. އަދި އަންހެން ޓީމްތަކަކީ ސީ ކުއީންސް، ގެމަނަފުށީ ވޮލީ ކުލަބު، ކަނޑުހުޅުދޫ ވޮލީޓީމް، އިގްނައިޓް ޖޫނިއާސް، ހުޓިކޮޑާ ކަނބަލުންނެވެ.
މުބާރާތުގެ ޗެމްޕިއަން ޓީމްއަށް 50000 ރުފިޔާގެ ފައިސާގެ އިނާމެއް ދިނުމަށް ނިންމާފައިވާއިރު ރަނަރަޕް ޓީމަށް 25000 ރުފިޔާގެ ފައިސާގެ އިނާމެއް ވަނީ ހުށައަޅާފައެވެ.