އިންޑިޔާގެ ބޮޑުވަޒީރު ނަރެންދުރަ މޯދީ ރާއްޖެއަށް ކުރެއްވި ދެ ދުވަހުގެ ފުރަމާނަ ދަތުރުފުޅު ނިންމަވައިލެއްވުމަށްފަހު ފުރާވަޑައިގެންފިއެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ދަޢުވަތަކަށް ޖުލައި 25 ވަނަ ދުވަހު ރާއްޖެވަޑައިގެންނެވި މޯދީއަށް ވެލާނާ އިންޓަނޭޝަނަލް އެއަރޕޯޓުން މަރުޙަބާ ދެންނެވީ ރައީސް މުޢިއްޒެވެ.
މާލެއަށް ވަޑައިގަތުމުން 21 ބަޑީގެ ސަލާމާއެކު ރަސްމީ މަރުޙަބާ ދެންނެވުމަށްފަހު ރައީސް އޮފީހުގައި ދެ ގައުމުގެ މެދުގައި ރަސްމީ މަޝްވަރާތައް ކުރިއަށް ގެންދެވުނެވެ. މި މަޝްވަރާތަކަށްފަހު ބޭއްވުނު ރަސްމިއްޔާތެއްގައި ދެ ގައުމުގެ މެދުގައި އަށް މުހިންމު އެއްބަސްވުމެއްގައި ސޮއިކުރެވުނެވެ.
މި އެއްބަސްވުންތަކުގެ ތެރޭގައި މިނިވަން ވިޔަފާރީގެ އެއްބަސްވުމެއް ގާއިމުކުރުމުގެ މަޝްވަރާތައް ފެށުމާއި، 565 މިލިއަން ޑޮލަރުގެ ލައިން އޮފް ކްރެޑިޓެއް ހަމަޖެއްސުމުގެ ފަހުމުނާމާ ހިމެނެއެވެ. މީގެ އިތުރުން، ކަރަންސީ ސްވޮޕް ފެސިލިޓީއާއި، މަސްވެރިކަމާއި އެކުއަކަލްޗަރ، ފާމަކޯޕިއާ، މޫސުމީ ބަދަލުތަކާއި ތިމާވެށި، އަދި ޑިޖިޓަލް ތަރައްޤީއާ ގުޅޭ އެއްބަސްވުންތަކުގައި ސޮއިކުރެވުނެވެ.
މި ދަތުރުފުޅުގައި ބޮޑުވަޒީރު މޯދީވަނީ ނައިބު ރައީސް ހުސައިން މުޙައްމަދު ލަޠީފާއި، މަޖިލީހުގެ ރައީސް ޢަބްދުﷲ ޝާހިދާއި، ކުރީގެ ރައީސް މުޙައްމަދު ނަޝީދާއި އިދިކޮޅު އެމްޑީޕީގެ ވެރިންނާއި އެހެނިހެން ސިޔާސީ ޕާޓީތަކުގެ ލީޑަރުންނާ ބައްދަލުކުރައްވާފައެވެ.
ދަތުރުފުޅު ނިންމަވައިލެއްވުމުގެ ކުރިން މިއަދު ޖުމްހޫރީ މައިދާނުގައި ބޭއްވުނު މިނިވަން ދުވަހުގެ ރަސްމީ އިޙްތިފާލުގައި ބައިވެރިވެވަޑައިގެން އެ ރަސްމިއްޔާތު ޝަރަފުވެރިކޮށްދެއްވުމަށްފަހު، އިންޑިޔާގެ ބޮޑުވަޒީރު މޯދީ ވަނީ ރާއްޖެއިން ފުރާވަޑައިގެންފައެވެ.