ގެމަނަފުށީ ކައުންސިލް ވޮލީ މުބާރާތް 2025 ގެ އަންހެން ޑިވިޝަންގެ 3 އިގްނައިޓް ޖޫނިއާރ އަދި ހުޓިކޮޑާ ވާދަކުރި މެޗު ފަސޭހަ ކަމާއިއެކު އިގްނައިޓް ޖޫނިއަރ އިން ކާމިޔާބު ކޮށްފިއެވެ.
މިއީ މި މުބާރާތުގައި އިގްނައިޓް ޖޫނިއަރ ކުޅުނު ދެވަނަ މެޗެވެ. އަދި ހުޓިކޮޑާގެ ފުރަތަމަ މެޗެވެ. ފުރަތަމަ މެޗުގައި ގެމަނަފުށި ވޮލީބޯލް ކުލަބާއި ވާދަކޮށް ވަނީ ބަލިވެފައެވެ.
ގެމަނަފުށީ ރަސްމީ ވޮލީ ކޯޓުގައި ކުރިއަށް ދިޔަ މި މެޗު އެޓީމް ކާމިޔާބު ކުރީ ސީދާ 3 ސެޓުންނެވެ.
މެޗުގެ ފުރަތަމަ ސެޓުގައި ހުޓިކޮޑާއިން ރަނގަޅަށް މެޗު ތެރެއަށް ނުވަދެވެނީސް އިގްނައިޓް ޖޫނިއަރގެ ރަނގަޅު ނިންމުންތަކުން 25،15 އިން ސެޓް ކާމިޔާބު ކުރިއެވެ. ދެވަނަ ސެޓު ހުޓިކޮޑާއިން ވަރަށް ބޮޑަށް ކުޅުން ރަނގަޅު ކޮށްފައިވެއެވެ. އަދި އިގްނައިޓް ޖޫނިއާރ އަށް ރިސީވިންގައި ހެދުނު ގޯސްތަކުން ސެޓުގެ ފަހުކޮޅު 2 ޓީމްވެސް ދިޔައީ ވަރަށް އެއްވަރުކޮށެވެ. އެހެންނަމަވެސް ފަހު ޕޮއިންޓްތަކުން ތަފާތު ދައްކައި މި ސެޓު 25،23 އިން ވަނީ ކާމިޔާބުކޮށްފައެވެ. މެޗުގެ ފުރަތަމަ ސެޓެކޭ އެއްފަދައިން 3 ވަނަ ސެޓު ހުޓިކޮޑާއިން ފެނުނީ ދަށްކޮށެވެ. މި ސެޓު އިތުބާރާއި އެކު ކުޅެ 25،15 އިން ނަގައި ސީދާ 3 ސެޓުން ހުޓިކޮޑާ ބަލިކޮށް އިގްނައިޓް ޖޫނިއާރއިން ވަނީ މެޗު ކާމިިޔާބުކޮށްފައެވެ.
މި މެޗުގެ މޮޅު ކުޅުންތެރިޔަކަށް ހޮވިފައިވަނީ އިގްނައިޓް ޖޫނިއަރ ގެ ޖާޒީ ނަންބަރު 19 ލީމް އަހުމަދު ލަތީފް އެވެ.
މެޗުގެ މޮޅު ކުޅުންތެރިޔާ ލީމް އަހުމަދު ލަތީފް/ފޮޓޯ: ދޮންކޮޅު
މުބާރާތުގައި މިރޭ ގެމަނަފުށީ ވޮލީ ކުލަބު އަދި ސީ ކުއީން ވާދަކުރާނެއެވެ. މި މެޗަކީ މި 2 ޓީމަށް ވެސް ވަރަށް މުހިންމު މެޗެކެވެ. ރޭގަނޑު މެޗު ފެށުމަށް ހަމަޖެހިފައިވަނީ 20:30 ގައެވެ.
މުބާރާތުގައި ބައިވެރިވެފައިވާ ފިރިހެން ޓީމްތަކަކީ ގެމަނަފުށި ވޮލީ ކުލަބު، ވެލާ، ފޭސް ފިޔޯރީ ވޮލީޓީމް، ކާމިޔާބު ވޮލީޓީމް، ހުޓިކޮޑާ، އަދި ނިލަންދޫ ވޮލީޓީމެވެ. އަދި އަންހެން ޓީމްތަކަކީ ސީ ކުއީންސް، ގެމަނަފުށީ ވޮލީ ކުލަބު، ކަނޑުހުޅުދޫ ވޮލީޓީމް، އިގްނައިޓް ޖޫނިއާސް، ހުޓިކޮޑާ ކަނބަލުންނެވެ.
މުބާރާތުގެ ޗެމްޕިއަން ޓީމްއަށް 50000 ރުފިޔާގެ ފައިސާގެ އިނާމެއް ދިނުމަށް ނިންމާފައިވާއިރު ރަނަރަޕް ޓީމަށް 25000 ރުފިޔާގެ ފައިސާގެ އިނާމެއް ވަނީ ހުށައަޅާފައެވެ.
މި މުބާރާތުގެ މެއިން ސްޕޮންސަރަކީ ގެމަނަފުށީ ކައުންސިލެވެ. އޮންލައިން މީޑިއާ ޕާޓްނަރަކީ ހުވަދޫ މީޑިއާއެވެ.