ޤައުމީ އެއާލައިން މޯލްޑިވިއަންގެ އެންމެހާ ބޯޓްތަކުގައި ތާނައިން "ދިވެހިރާއްޖެ" ޖަހައިފި އެވެ. މި ބަދަލަކީ ޤައުމިއްޔަތަށް އިސްކަން ދިނުމުގެ ސިޔާސަތުގެ ދަށުން ގެނައި ބަދަލެއް ކަމަށް އެ އެއާލައިން އިން މަޢުލޫމާތު ދީފި އެވެ.
މޯލްޑިވިއަން އިން ބުނި ގޮތުގައި އެ އެއާލައިންގެ ހުރިހާ ބޯޓްތަކާއި ސީޕްލޭންތަކުގައި މިހާރު ވަނީ "ދިވެހިރާއްޖެ" ޖަހާފަ އެވެ. އަދި ވެލާނާ އިންޓަނޭޝަނަލް އެއަރޕޯޓުގެ އާ ޓާމިނަލް އިން ޚިދުމަތް ދިން މޯލްޑިވިއަންގެ ފުރަތަމަ ބޯޓުގައި ވެސް ވަނީ ތާނައިން "ދިވެހިރާއްޖެ" ޖަހާފަ އެވެ. މި ނަން ޖަހާފައި ވަނީ ބޯޓުގެ ބޭރުގައި ޖަހާފައިވާ ޤައުމީ ދިދައިގެ ތިރީގަ އެވެ.
މި ނިންމުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ ޤައުމިއްޔަތަށް އިސްކަން ދިނުމުގެ ސިޔާސަތަށް ތާއީދު ކުރުމުގެ ގޮތުން ނިންމި ނިންމުމެއް ކަމަށް މޯލްޑިވިއަން އިން ބުނެފައި ވެ އެވެ.
މި ނިންމުމާ ގުޅިގެން ޓްރާންސްޕޯޓް އެންޑް ސިވިލް އޭވިއޭޝަން މިނިސްޓަރު އާދަމް ނަސީރު އިބްރާހިމް ވަނީ މަރުޙަބާ ވިދާޅުވެފައެވެ. "މޯލްޑިވިއަންގައި "ދިވެހިރާއްޖޭ، ގެ ނަން ތާނައިން ލިޔުއްވުމަކީ ދިވެހިވަންތަކަމުގެ ދާއިރާއިން ކުރިޔަށް އެޅުއްވި، ވަރަށް އުންމީދީ އުފާވެރި ފިޔަވަޅެއް،" ވަޒީރު ވިދާޅުވި އެވެ.
މި ބަދަލާ އެކު މޯލްޑިވިއަންގެ ބޯޓްތަކުގައި ދިވެހި ބަހުގެ ހާޒިރީ އިތުރުވެ، ދިވެހި ޤައުމިއްޔަތު އިތުރަށް ފާހަގަވެގެންދާނެ ކަމަށް ބެލެވެ އެވެ.