ލަންކާގެ ރައީސް އަނޫރާ ކުމާރަ ޑިސަނަޔަކަ އެ ގައުމުގެ އިޤްތިޞާދީ ހާލަތު ކުރިއެރުވުމަށް ކުރައްވަމުން ގެންދަވާ މަސައްކަތްޕުޅުތަކަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ތަޢުރީފުކުރައްވައިފިއެވެ.
ފުރަމާނަ ދަތުރުފުޅެއްގައި މިއަދު ރާއްޖެއަށް ވަޑައިގެންނެވި ސްރީލަންކާގެ ރައީސް އަނޫރާ ކުމާރަ ޑިސަނަޔަކައާއެކު ދެއްވި ގުޅިފައިވާ ނޫސްބަޔާނުގައި ރައީސް މުޢިއްޒު ވިދާޅުވީ، ޑިސަނަޔަކަގެ ވެރިކަމުގެ ދަށުން ދެމެހެއްޓެނިވި އިޤްތިޞާދަކާ ދިމާއަށް ސްރީލަންކާއަށް ދަތުރުކުރެވޭނެ ކަމުގެ ޔަޤީންކަން އޮތް ކަމަށެވެ.
މީގެއިތުރުން ރައީސް މުޢިއްޒު ވަނީ ސްރީލަންކާގައި ދިރިއުޅޭ ދިވެހިންނަށް އެ ގައުމުގެ ސަރުކާރުން ފޯރުކޮށްދެމުންދާ ޚިދުމަތްތަކަށް ޚާއްޞަ ޝުކުރެއް އަދާކުރައްވާފައެވެ. އަދި ދެ ގައުމަކީ ޖިއޮގްރަފީ ގޮތުން ވެސް ގުޅިފައިވާ ދެ ގައުމުކަން ފާހަގަކުރައްވައި، ދެ ގައުމުގެ ދެމެދުގައި އޮންނަ ގާތް ގުޅުމުގެ މައިގަނޑު ބިންގަލަކީ ދެ ގައުމުގެ ރައްޔިތުންގެ މެދުގައި އޮތް ގާތް ގުޅުންކަން ފާހަގަކުރެއްވިއެވެ.
މިއަދުގެ ބައްދަލުކުރެއްވުމުގައި ދެ ގައުމުގެ މެދުގައި އޮތް ގުޅުން އިތުރަށް ހަރުދަނާކުރުމުގެ މުހިންމުކަމުގެ މައްޗަށް އަލިއަޅުވާލައްވައި، ކުރިއަށް އޮތް ތަނުގައި ދެ ގައުމު ގުޅިގެން މަސައްކަތްކުރެވިދާނެ ގިނަ ދާއިރާތަކެއް ފާހަގަކުރެވިފައިވާ ކަމަށް ރައީސް މުޢިއްޒު ވިދާޅުވިއެވެ. އަދި ކުރިއަށް އޮތް ތަނުގައި ދެ ގައުމުގެ ގުޅުން އިތުރަށް ވަރުގަދަވެގެންދާނެ ކަމުގެ ޔަޤީންކަން ވެސް އެމަނިކުފާނު ފާޅުކުރެއްވިއެވެ.