ގެމަނަފުށީ ކައުންސިލް ވޮލީ މުބާރާތް 2025 އަންހެން ޑިވިޝަންގެ 7 ވަނަ މެޗުގައި ގއ ކަނޑުހުޅުދޫ އަންހެން ވޮލީ ޓީމް އަދި ގއ ގެމަނަފުށި ވޮލީ ކުލަބު ވާދަކުރި ފޯރިގަދަ މެޗް ކަނޑުހުޅުދޫއިން ކާމިޔާބު ކޮށްފިއެވެ.
މި މެޗު އެޓީމުން ކާމިޔާބު ކުރީ 3 ސެޓު 2 ސެޓުންނެވެ.
މި މެޗަށް ނިކުތްއިރުވެސް މި ދެޓީމް ވަނީ މި މުބާރާތުގައި ކުޅުނު 2 މެޗުވެސް ކާމިޔާބުކޮށްފައެވެ. އަދި މިމެޗަކީ ލީގުގެ އެއްވަނަ ހޯދުމަށް މި 2 ޓީމަށްވެސް މުހިންމު މެޗެކެވެ.
މި މެޗުގެ ފުރަތަމަ ސެޓު ކަނޑުހުޅުދޫ ޓީމުންވަނީ 13 ވަރަކަށް ޕޮއިންޓްގެ ލީޑުގައި އޮވެ ކުޅެފައެވެ. އެހެންނަމަވެސް ސެޓުގެ ފަހުކޮޅު ހެދުނު ގޯސްތަކުގެ ފައިދާނަގައި ގެމަނަފުށީ ޓީމުން ވަނީ ލީޑު 6 ޕޮއިންޓަށް ކުޑަކޮށްފައެވެ. މި ސެޓު ކަނޑުހުޅުދޫއިން ކާމިޔާބު ކުރީ 25،19 އިންނެވެ. ދެވަނަ ސެޓުގައި ގެމަނަފުށި ޓީމްފެނިގެން ދިޔައީ ތަފާތު ރޫހެއްގައެވެ. ރަނގަޅު ނިންމުންތަކާއިއެކު މި ސެޓު 25،18 އިން އެޓީމުން ކާމިޔާބު ކުރިއެވެ. ތިންވަނަ ސެޓަށް ދެޓީމުންވެސް ނިކުތީ އެއްވެސް ބަދަލަކާއި ނުލައެވެ. މި ސެޓުގައި ދެޓީމްގެ ފަރާތުންވެސް ރަނގަޅު ނިންމުންތަކެއް ފެނިގެން ގޮސްފައިވެއެވެ. އަދި ގާތްގާތުގައި ދެޓީމުން ވެސް ވަނީ ރަނގަޅު ޕޮއިންޓްތަކެއް ހޯދާފައެވެ. މި ސެޓު ކަނޑުހުޅުދޫއިން ކާމިޔާބު ކުރީ 25،23 އިންނެވެ. ހަތަރު ވަނަ ސެޓުވެސް ދެޓީމް ފެނުނީ ވަރަށް ވަރުގަދަކޮށެވެ. އަދި މިސެޓުގައި ގެމަނަފުށީ ޓީމްގެ ނިންމުންތައް އެހެން ސެޓުތަކާއި އަޅާބަލާއިރު ރަނގަޅެވެ. މި ސެޓް ގެމަނަފުށިން ގެންދިޔައީ 25،20 އިންނެވެ. ކުރިން ވެސް ބެލެވިފައިވާ ގޮތުގައި މި މެޗަކީ ވަރަށް ހަމަހަމަ މެޗަކަށް ވާނެ ކަމަށް ގިނަ ބަޔަކު ގަބޫލުކުރިއެވެ. ގަދަވަޔާއި އެކު ކުޅުނު މިމެޗުގައި ދެ ޓީމްގެ ސަޕޯޓަރުންގެ ތަރުހީބު ފެނިގެން ދިޔައެވެ.
ނަތީއްޖާ ނެރުމަށް ކުޅުނު ޓައި ބްރޭކް ސެޓުގައި ދެޓީމްވެސް ވަރަށް ގާތްގާތުގައި ދިޔައީ ޕޮއިންޓްތައް ހޯދަމުންނެވެ. އެގޮތުން ޓައި ބްރޭކްއަށް ދިޔައިރު 8،6 އިން ކުރީގައި އޮތީ ކަނޑުހުޅުދޫއެވެ. ޓައި ބްރޭކަށްފަހު ވެސް ކަނޑުހުޅުދޫގެ ނިންމުންތައް ވަރަށް ބޮޑުތަން ރަނގަޅެވެ. މެޗުގެ 5 ވަނަ ސެޓު 15،11 އިން ނަގައި މެޗު 3 ސެޓު 2 ސެޓުން ވަނީ ކާމިޔާބުކޮށްފައެވެ.
މެޗަށް ފަހު ކަނޑުހުޅުދޫ ޓީމުގެ ކުޅުންތެރިން ވަރަށް ބޮޑަށް އުފާފާޅުކުރިތަން ފެނިގެން ގޮސްފައިވެއެވެ. މި މެޗުން މޮޅުވުމާއި އެކު ކަނޑުހުޅުދޫއަށް ލީގުގެ އެއްވަނަ ލިބޭނެކަމަށް ވަނީ ވަރަށް ބޮޑަށް ބެލެވިފައެވެ.
މި މެޗުގެ މޮޅު ކުޅުންތެރިޔަކަށް ހޮވިފައިވަނީ މެޗުގައި ވަރަށް މޮޅު ކުޅުމެއްދެއްކި ކަނޑުހުޅުދޫ ޓީމްގެ ޖާޒީ ނަންބަރު 12 މަރިޔަމް ރީޝާއެވެ. ރީޝާ ދަނީ މި މުބާރާތުގައި ތަފާތު މޮޅު ކުޅުމެއް ދައްކަމުންނެވެ.
މި މުބާރާތުގައި މިރޭވެސް އަންހެން ޑިވިޝަންގެ މެޗެއް ކުޅުމަށް ހަމެޖެހިފައިވެއެވެ. މި މެޗުގައި ވާދަކުރާނީ ސީކުއީން އަދި ހުޓިކޮޑާއެވެ. މި މެޗު ފެށުމަށް ހަމަޖެހިފައިވަނީ 20:30 ގައެވެ.
މުބާރާތުގައި ބައިވެރިވެފައިވާ ފިރިހެން ޓީމްތަކަކީ ގެމަނަފުށި ވޮލީ ކުލަބު، ވެލާ، ފޭސް ފިޔޯރީ ވޮލީޓީމް، ކާމިޔާބު ވޮލީޓީމް، ހުޓިކޮޑާ، އަދި ނިލަންދޫ ވޮލީޓީމެވެ. އަދި އަންހެން ޓީމްތަކަކީ ސީ ކުއީންސް، ގެމަނަފުށީ ވޮލީ ކުލަބު، ކަނޑުހުޅުދޫ ވޮލީޓީމް، އިގްނައިޓް ޖޫނިއާސް، ހުޓިކޮޑާ ކަނބަލުންނެވެ.
މުބާރާތުގެ ޗެމްޕިއަން ޓީމްއަށް 50000 ރުފިޔާގެ ފައިސާގެ އިނާމެއް ދިނުމަށް ނިންމާފައިވާއިރު ރަނަރަޕް ޓީމަށް 25000 ރުފިޔާގެ ފައިސާގެ އިނާމެއް ވަނީ ހުށައަޅާފައެވެ.
މި މުބާރާތުގެ މެއިން ސްޕޮންސަރަކީ ގެމަނަފުށީ ކައުންސިލެވެ. އޮންލައިން މީޑިއާ ޕާޓްނަރަކީ ހުވަދޫ މީޑިއާއެވެ.