ގއ ގެމަނަފުށީ ކައިންސިލް ވޮލީ މުބާރާތް 2025 ގެ އަންހެން ޑިވިޝަންގެ 9 ވަނަ މެޗުގައި އިގްނައިޓް ޖޫނިއަރ އަތުން މޮޅުވެ އެއްވަނަ ޓީމްގެ ގޮތުގައި ކަނޑުހުޅުދޫ އިން ލީގު ބުރު ނިންމާލައިފިއެވެ.
ގެމަނަފުށީ ރަސްމީ ވޮލީކޯޓުގައި ކުރިއަށް ދިޔަ މި މެޗު އެޓީމުން ކާމިޔާބު ކުރީ ސީދާ 3 ސެޓުންނެވެ.
މިމެޗާއި އެކު ކަނޑުހުޅުދޫއިން ވަނީ ލީގު ބުރުގައި އެޓީމް ކުޅުނު ހުރިހާ މެޗެއް ކާމިޔާބުކޮށްފައެވެ. އިގްނައިޓް ކުޅުނު 4 މެޗުގެ ތެރެއިން 1 މެޗު ކާމިޔާބުކޮށްފައި ވާއިރު އަނެއް 3 މެޗުން ވަނީ ބަލިވެފައެވެ.
މެޗުގެ ފުރަތަމަ ސެޓުން ފެށިގެން ކަނޑުހުޅުދޫއިން ދިޔައީ މެޗު ޑޮމިނޭޓް ކޮށްގެން ކުޅެފައެވެ. މެޗުގެ ފުރަތަމަ ސެޓު 25،14 އިން ކާމިޔާބު ކުރިއިރު ދެވަނަ ސެޓު ފަސޭހަ ކަމާއިއެކު 25،8 އިން ކާމިޔާބުކުރިއެވެ.
އެހެންނަމަވެސް މެޗުގެ 3 ވަނަ ސެޓު ފަށައިގެން އިގްނައިޓްގެ ކުޅުން ވަރަށް ބޮޑަށް ރަނގަޅެވެ. ދެޓީމްގެ މެދުގައި ޕޮއިންޓްގެ ފަރަގު މާބޮޑު ނޫންނަމަވެސް އިގްނައިޓަށް މެޗުގެ ލީޑް ހިފަހައްޓާލެވޭ ގޮތެއް ނުވެއެވެ.
މެޗުގެ 3 ވަނަ ސެޓު 25،17 އިން ނަގައި މި މެޗު 3 ސެޓުން ކަނޑުހުޅުދޫއިން ވަނީ ކާމިޔާބު ކޮށްފައެވެ.
މިމެޗުގެ މޮޅު ކުޅުންތެރިޔަކަށް ހޮވުނީ ކަނޑުހުޅުދޫ ޖާޒީ ނަންބަރު 17 ފާތުމަތު ސީނާއެވެ.
އިގްނައިޓް ޖޫނިއާސް އަކީ މި މުބާރާތުގައި ވާދަކުރި އެންމެ ޒުވާންޓީމެވެ. ވަރަށް ޒުވާން ކުޅުންތެރިންގެ މައްޗަށް އެކުލެވޭ މި ޓީމް މުބާރާތުގައި ދައްކާފައިވާ ކުޅުމަށް ގިނަ ބަޔަކު ދަނީ ތައުރީފް ކުރަމުންނެވެ.
މި މެޗާއިއެކު މި މުބާރާތުގައި އަންހެން ޑިވިޝަންގައި ބާކީ އޮންނާނީ ގެމަނަފުށީ ވޮލީ ކުލަބު އަދި ހުޓިކޮޑާ ވާދަކުރާ މެޗެވެ. މި މެޗުން ހުޓިކޮޑާ ބަލިވެއްޖެކަމަށް ވާނަމަ 4 ވަނަ ޓީމްގެ ގޮތުގައި އިގްނައިޓަށް މުބާރާތުގެ ސެމީ ފައިނަލްގެ ޖާގަ ކަށަވަރު ވާނެއެވެ. އަދި ގެމަނަފުށީ ވޮލީ ކުލަބަށް މުބާރާތުގެ ދެވަނަ ޓީމްގެ ގޮތުގައި ސެމީގައި ވާދަކުރާނެއެވެ.
މުބާރާތުގައި ބައިވެރިވެފައިވާ ފިރިހެން ޓީމްތަކަކީ ގެމަނަފުށި ވޮލީ ކުލަބު، ވެލާ، ފޭސް ފިޔޯރީ ވޮލީޓީމް، ކާމިޔާބު ވޮލީޓީމް، ހުޓިކޮޑާ، އަދި ނިލަންދޫ ވޮލީޓީމެވެ. އަދި އަންހެން ޓީމްތަކަކީ ސީ ކުއީންސް، ގެމަނަފުށީ ވޮލީ ކުލަބު، ކަނޑުހުޅުދޫ ވޮލީޓީމް، އިގްނައިޓް ޖޫނިއާސް، ހުޓިކޮޑާ ކަނބަލުންނެވެ.
މުބާރާތުގެ ޗެމްޕިއަން ޓީމްއަށް 50000 ރުފިޔާގެ ފައިސާގެ އިނާމެއް ދިނުމަށް ނިންމާފައިވާއިރު ރަނަރަޕް ޓީމަށް 25000 ރުފިޔާގެ ފައިސާގެ އިނާމެއް ވަނީ ހުށައަޅާފައެވެ.
މި މުބާރާތުގެ މެއިން ސްޕޮންސަރަކީ ގެމަނަފުށީ ކައުންސިލެވެ. އޮންލައިން މީޑިއާ ޕާޓްނަރަކީ ހުވަދޫ މީޑިއާއެވެ.