2026 ވަނަ އަހަރުގެ ޖަނަވަރީ މަހުން ފެށިގެން ދުންފަތުގެ އެއްވެސް ބާވަތެއް ރާއްޖެ އެތެރެކުރެވޭނީ ސިއްޙަތުގެ އިންޒާރު ސީދާ ޕެކޭޖްގެ ބޭރަށް ޗާޕުކޮށްގެންކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިއަދު ވަނީ އިއުލާނުކޮށްފައެވެ.
ދުންފަތުގެ ބާވަތްތައް ޕެކެޓްކޮށް ލޭބަލް ޖެހުމާ ގުޅޭގޮތުން “ދުންފަތް ކޮންޓްރޯލް ކުރުމާބެހޭ ޤާނޫނު” އަދި އެ ޤާނޫނުގެ ދަށުން އާންމުކޮށްފައިވާ ގަވާއިދުގެ ފަސްވަނަ ބާބުގައި ވަނީ ރާއްޖެ އެތެރެކުރާ އަދި ވިއްކާ ދުންފަތުގެ ބާވަތްތަކުގެ އުފެއްދުންތައް ހުންނަންވާނެ ގޮތްތައް ކަނޑައަޅާފައެވެ.
އެޗްޕީއޭއިން ހާމަކުރި ގޮތުގައި، “ޑިޒައިން އެންޑް ލޭއައުޓް ރިކުއަރމަންޓުސް ފޮރ ހެލްތު ވޯރނިންގ”ގެ ފުރަތަމަ އިސްލާހު 2025 ޖުލައި 29 ވަނަ ދުވަހު ވަނީ ގެޒެޓްކޮށްފައެވެ. މި އިސްލާހާއެކު ހީޓެޑް ޓޮބޭކޯ ޕްރޮޑަކްޓްސް އަދި ނިކޮޓީން ޕައުޗުވެސް މި އުސޫލުގެ ދަށުން ހިމެނިފައިވެއެވެ.
ދުންފަތާ ދެކޮޅަށް ސަރުކާރުން އަޅަމުންދާ ހަރުކަށި ފިޔަވަޅުތަކުގެ ތެރޭގައި، 2007 ވަނަ އަހަރުން ފެށިގެން އުފަންވާ ކުދިންނަށް ދުންފަތުގެ އިސްތިއުމާލުކުރުން މަނާކުރުމާއި، އިލެކްޓްރޯނިކް ވޭޕް އަދި އޭގެ އާލާތްތައް ރާއްޖެއަށް އެތެރެކުރުމާއި، ވިޔަފާރިކުރުމާއި ބޭނުންކުރުން މަނާކުރުން ހިމެނެއެވެ.
އަދި ކުރިއަށް އޮތްތަނުގައި ދުންފަތާ ގުޅޭ ވިޔަފާރިކުރާ ފަރާތްތަކުން ވިޔަފާރި ކުރުމުގެ ހުއްދައިގެ އިތުރުން، ސިއްޙަތާ ބެހޭ ވުޒާރާއިން ދޫކުރާ ވަކި ސައްޙަ ލައިސަންސެއް އޮންނަންޖެހޭނެކަމަށް ސިއްޙަތާ ބެހޭ ވުޒާރާއިން ވަނީ އިއުލާނުކޮށްފައެވެ. މި ގަވާއިދާ ޚިލާފުވާ ފަރާތްތަކާމެދު ޤާނޫނީ ފިޔަވަޅު އެޅޭނެކަމަށްވެސް އެޗްޕީއޭއިން ވަނީ އަންގާފައެވެ.