ފުޓްސަލް އަށް މަޝްހޫރު ތ. ތިމަރަފުށީގެ ފުޓްސަލް ދަނޑު ތަރައްޤީކުރުމުގެ މަސައްކަތާއި ހަތަރު ރަށެއްގައި އައުޓްޑޯ ޖިމް ހެދުމުގެ މަސައްކަތް ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އާ މިއަދު ޙަވާލުކޮށްފިއެވެ. މި މަސައްކަތްތަކާ ގުޅޭ އެއްބަސްވުންތަކުގައި ސޮއިކުރުމުގެ ރަސްމިއްޔާތު ބޭއްވީ ކުޅިވަރާއި ހަށިހެޔޮކަމާ ބެހޭ ވުޒާރާގައެވެ.
މިއަދު ސޮއިކުރެވުނު އެއްބަސްވުމުގެ ދަށުން ކުރިއަށްގެންދިއުމަށް ހަމަޖެހިފައިވާ މަޝްރޫޢުތަކާއި އެ މަސައްކަތްތަކަށް ހޭދަވާނެ ކަމަށް ލަފާކުރެވޭ އަގު އަދި ނިންމަންޖެހޭ މުއްދަތު ތިރީގައި މިވަނީއެވެ:
- އާރ. މާކުރަތު އައުޓްޑޯ ޖިމްގެ މަސައްކަތް: މި މަސައްކަތް 60 ދުވަހުގެ ތެރޭގައި ނިންމުމަށް ހަމަޖެހިފައިވާ އިރު، އެކަމަށް 453,000 ރުފިޔާ ހަރަދުވާނެއެވެ.
- ކ. މާފުށީ އައުޓްޑޯ ޖިމްގެ އިކުއިޕްމެންޓް ބަދަލުކުރުން: މި މަސައްކަތް ވެސް 60 ދުވަހުގެ ތެރޭގައި ނިންމުމަށް ހަމަޖެހިފައިވާ އިރު، އެކަމަށް 291,600 ރުފިޔާ ހަރަދުވާނެއެވެ.
- ކ. ގާފަރު އައުޓްޑޯ ޖިމްގެ މަސައްކަތް: މި މަޝްރޫޢު 60 ދުވަހުގެ ތެރޭގައި ނިންމުމަށް ވަނީ ހަމަޖެހިފައެވެ. މި މަސައްކަތަށް 453,000 ރުފިޔާ ހަރަދުވާނެއެވެ.
- ތ. ތިމަރަފުށީ ފުޓްސަލް ދަނޑު ތަރައްޤީ ކުރުން: މިއީ މި މަޝްރޫޢުތަކުގެ ތެރެއިން އެންމެ ގިނަ ދުވަހަށް ދެމިގެންދާ މަސައްކަތެވެ. މި މަސައްކަތް 120 ދުވަހުގެ ތެރޭގައި ނިންމުމަށް ހަމަޖެހިފައިވާ އިރު، އެކަމަށް 1,765,248.12 ރުފިޔާ ހަރަދުވާނެއެވެ. ތިމަރަފުށީގައި ރަނގަޅު ފެންވަރުގެ ފުޓްސަލް ދަނޑެއް ނެތުމުގެ ޝަކުވާ އެރަށުގެ ޒުވާނުން ކުރާތާ ގިނަ އަހަރުތަކެއް ވެފައިވާއިރު، މި މަޝްރޫޢުގެ ސަބަބުން އެރަށުގައި ގިނަ މުބާރާތްތައް ބޭއްވުމަށާއި ކުޅުންތެރިން އުފެއްދުމަށް މަގުފަހިވެގެންދާނެއެވެ.
- ލ. ކަލައިދޫ އައުޓްޑޯ ޖިމްގެ އިކުއިޕްމެންޓް ބަދަލުކުރުން: މި މަސައްކަތް 60 ދުވަހުގެ ތެރޭގައި ނިންމުމަށް ހަމަޖެހިފައިވާ އިރު، އެކަމަށް 291,600 ރުފިޔާ ހަރަދުވާނެއެވެ.
މި މަޝްރޫޢުތަކުގެ ސަބަބުން މި ރަށްތަކުގެ ރައްޔިތުންނަށް ފަސޭހަކަމާއެކު ކުޅިވަރު ކުޅެ، ހަށިހެޔޮކަން ދެމެހެއްޓުމަށް ބޭނުންވާ ވަސީލަތްތައް ލިބިގެންދާނެއެވެ. އަދި ސަރުކާރުން ރަށްރަށުގައި ކުޅިވަރާއި ޒުވާނުން ތަރައްޤީ ކުރުމަށް ދޭ އަހައްމިއްޔަތު މި މަޝްރޫޢުތަކުން ދައްކުވައިދެއެވެ
މުޅި ރާއްޖޭގައި އައުޓްޑޯ ޖިމްތައް ޤާއިމުކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅެއް ކަމަށްވާއިރު، ފުޓްސަލް ދަނޑާއި ހަތަރު އައުޓްޑޯ ޖިމް ތަރައްޤީކުރުމުގެ އިތުރުން ވެސް އާރުޑީސީން އަންނަނީ ގިނަ ރަށްތަކެއްގައި އެކި މަޝްރޫޢުތައް ހިންގަމުންނެވެ.