މާލޭގެ ފިހާރައަކަށް ވަދެ ބިރުދައްކައިގެން ފައިސާ ފޭރުނު މައްސަލައެއްގައި ހ. ރެދަން / މާލެ، ފަވާޒު ކަޅުތުއްތު (36އ) ގެ މައްޗަށް ކްރިމިނަލް ކޯޓުން ހަތް މަހުގެ ޖަލު ހުކުމެއް ކޮށްފިއެވެ.
މިދިޔަ މެއި މަހުގެ 1 ވަނަ ދުވަހުގެ 15:13 އެހާކަންހާއިރު އިސްކަންދަރުމަގު މައްޗަންގޯޅި ސަހަރާ ކައިރީގައި ހުންނަ “ޕަރާއޯ” ފިހާރައަށް ވަދެ، ވަޅިން ބިރުދައްކައި ފިހާރައިގެ ވަތްގަނޑުގައި ހުރި ފައިސާ ފޭރިގަތް ކަމަށް ތުހުމަތު ކުރެވުނު މައްސަލައެކެވެ.
ފުލުހުން ބުނީ މި މައްސަލައާ ގުޅިގެން ފަވާޒު ކަޅުތުއްތު ހައްޔަރުކޮށްފައިވަނީ ކޯޓު އަމުރެއްގެ ދަށުން 2025 މެއި 13 ވަނަ ދުވަހުކަމަށާއި މައްސަލައިގެ ޝަރީއަތުގައި އޭނާ އިއުތިރާފްވުމާ ގުޅިގެން، ފޭރުމުގެ ކުށަށް ހަތަރު މަހާއި 24 ދުވަހުގެ ޖަލު ހުކުމަކާއި، ތޫނު ހަތިޔާރު ގެންގުޅުނު ކުށަށް ހަ މަސް ދުވަހުގެ ޖަލު ހުކުމެއް އިއްވާފައިވާ ކަމަށެވެ.
ނަމަވެސް، މައްސަލައިގެ ތަޙްޤީޤު މަރުހަލާގައި ބަންދުގައި ހޭދަކުރި ދުވަސްތައް އުނިކުރުމަށްފަހު، އޭނާ މިހާރު ތަންފީޒުކުރަން ޖެހެނީ ތިން މަހުގެ ޖަލު ހުކުމެކެވެ.
ފާހަގަކޮށްލެވޭ ކަމަކީ، މި މައްސަލާގައި ޖަލަށްލާން ހުކުމްކޮށްފައިވާ ފަވާޒު ކަޅުތުއްތު އަކީ މީގެކުރިން ތަފާތު އެކި މައްސަލަތަކުގައި 52 ފަހަރު ހައްޔަރުކޮށްފައިވާ ކުށުގެ ރެކޯޑެއް އޮތް މީހެކެވެ.