ގެދޮރުވެރިޔާ ޕޯޓަލުން ލިންކެއް ނުފޮނުވާނެ ކަމަށާއި، ގެދޮރުވެރިޔާ ޕޯޓަލަށް ލޮގިން ކުރުމަށް ކަމަށް ބުނެ ފޮނުވަމުންދާ މެސެޖުތަކަކީ ސްކޭމް މެސެޖުތަކެއް ކަމަށް ބުނެ، އެކަމަށް ސަމާލުވުމަށް ދިވެހި ފުލުހުންގެ ޚިދުމަތުގެ ސައިބާ ކްރައިމް ޑިޕާޓްމަންޓުން އިލްތިމާސްކޮށްފިއެވެ.
ސައިބާ ކްރައިމް ޑިޕާޓްމަންޓުން މިކަން ހާމަކޮށްފައިވަނީ، ގެދޮރުވެރިޔާ ޕޯޓަލަށް ލޮގިން ކުރުމަށް ކަމަށް ބުނެ ގިނަ އަދަދެއްގެ ސްކޭމް މެސެޖުތަކެއް ފޮނުވަމުންދާތީއެވެ. އެ ޑިޕާޓްމަންޓުން ފާހަގަކޮށްފައިވާ ގޮތުގައި ގެދޮރުވެރިޔާ ޕޯޓަލަކީ އީ-ފާސް މެދުވެރިކޮށް ލޮގިންވާ ގޮތަށް ފަރުމާކޮށްފައިވާ ޕޯޓަލެއް ކަމަށްވާތީ، އެ ޕޯޓަލުން ވަކި ލިންކެއް ނުފޮނުވާނެއެވެ.
ފުލުހުން ވަނީ މި ސްކޭމް މެސެޖުތަކުގެ ނުރައްކާތެރިކަން ވެސް ފާހަގަކޮށްފައެވެ. އެގޮތުން، މި ސްކޭމް ލިންކުތަކަށް ފިތައިފިނަމަ، ގޫގުލް އެކައުންޓަށް ލޮގިންވުމަށް އަންގާނެ ކަމަށާއި، އެގޮތަށް ލޮގިންވެއްޖެނަމަ އެ ފަރާތެއްގެ ޕާސްވޯޑުތައް ސްކޭމް ކުރާ ފަރާތްތަކަށް ލިބޭނެ ކަމަށް ފުލުހުން ވަނީ އިންޒާރުދީފައެވެ.
މިފަދަ ސްކޭމްތަކުން ރައްކާތެރިވުމަށްޓަކައި ގޫގުލް އެކައުންޓްގައި ޓޫ ފެކްޓާ އޮތެންޓިކޭޝަން ހަރުދަނާކުރުމަށް ފުލުހުން ވަނީ އާންމުންނަށް އިލްތިމާސްކޮށްފައެވެ. އަދި މިފަދަ ސްކޭމް ލިންކެއް ލިބިއްޖެނަމަ ލަސްނުކޮށް 911 އަށް ރިޕޯޓުކުރުމަށް ވެސް ފުލުހުން ވަނީ އެދިފައެވެ.
ފުލުހުންގެ މި އިންޒާރާއެކު، އާންމު ރައްޔިތުންނަށް ގޮވާލާފައިވަނީ މިފަދަ ސްކޭމް މެސެޖުތަކަށް އިޖާބަނުދިނުމަށާއި، އެއްވެސް ހާލެއްގައި އެފަދަ ލިންކުތަކަށް ނުފިތުމަށެވެ. އަދި މިފަދަ ކަންކަމުގައި ޝައްކެއް އުފެދޭނަމަ، ސީދާ ގެދޮރުވެރިޔާ ޕޯޓަލްގެ ރަސްމީ ޗެނަލްތަކާ ގުޅުމަށެވެ.