އިންޑިއާގެ ކަރްނާޓަކާ ސްޓޭޓްގެ މަޝްހޫރު އަދި ނުފޫޒު ގަދަ ސިޔާސީ ލީޑަރެއް ކަމުގައިވާ ޕްރަޖްވާލް ރެވާނާގެ މައްޗަށް އޭނާގެ މުވައްޒަފުން ރޭޕްކުރި ކަމުގެ ކުށް ސާބިތުވެ، އުމުރަށް ޖަލަށްލުމަށް ދެކުނު އިންޑިއާގެ ކޯޓަކުން ހުކުމްކޮށްފިއެވެ.
އުމުރުން 34 އަހަރުގެ، ކުރީގެ ޕާލަމެންޓް މެމްބަރު ރެވާނާގެ މައްސަލަ ފެންމަތިވެގެން ދިޔައީ 2023 ވަނަ އަހަރު އޭނާގެ ބަދުއަހުލާގީ އަމަލުތަކުގެ ވީޑިއޯތައް ސޯޝަލް މީޑިއާގައި ފެތުރެން ފެށުމާ ގުޅިގެންނެވެ. މި ވީޑިއޯތަކާ ގުޅިގެން މުޅި އިންޑިއާގައި އާންމުންގެ ބޮޑު ރުޅިވެރިކަމެއް އުފެދުނެވެ.
ރެވާނާއަކީ މިހާރުގެ ބޮޑުވަޒީރު ނަރެންދުރަ މޯދީގެ ބީޖޭޕީގެ ކޯލިޝަނުގައި ހިމެނޭ، ޖަނަލާ ދާލް ޕާޓީގެ ލީޑަރު އަދި އިންޑިއާގެ ކުރީގެ ބޮޑުވަޒީރު އެޗްޑީ ދޭވްގައުދާގެ ކާފައެކެވެ. “މިފަދަ ނުފޫޒުގަދަ އާއިލާއަކަށް ނިސްބަތްވާ ސިޔާސީ މީހަކަށް މިފަދަ މައްސަލައެއްގައި ކުށް ސާބިތުވުމަކީ އިންޑިއާގައި ވަރަށް މަދުން ދިމާވާ ކަމެކެވެ،” ކަމަށް ޤާނޫނީ މާހިރުން ފާހަގަކުރެއެވެ.
ރެވާނާ ވަނީ އޭނާގެ މައްޗަށް ކުރެވުނު ތުހުމަތުތަކަށް އިންކާރުކޮށްފައެވެ. ނަމަވެސް ކުށް ސާބިތުވާ ކަމަށް ހުކުރު ދުވަހު ކަނޑައެޅުމާ އެކު، ކޯޓުގައި ރޮއި އާދޭސްކޮށް، ލުއި އަދަބަކަށް އެދުނެވެ. އުމުރު ދުވަހުގެ ހުކުމް އިސްތިއުނާފުކުރުމުގެ ފުރުސަތު އަދިވެސް އޮތްކަން ފާހަގަކުރެވެއެވެ.
މީގެ އިތުރުން، ރެވާނާގެ މައްޗަށް ރޭޕްގެ އިތުރު ދެ ދައުވާއަކާއި ޖިންސީ ފުރައްސާރައިގެ ދައުވާއެއް އަދިވެސް އެބައޮތެވެ. މި ދައުވާތަކަށްވެސް އޭނާ ވަނީ އިންކާރުކޮށްފައެވެ. މި މައްސަލަތަކުގެ ޝަރީއަތް ކުރިއަށް ދާނެ ކަމަށް ބެލެވެއެވެ.