ރާއްޖޭގެ އިޤްތިޞާދަށް ސީދާގޮތުން އާމްދަނީ ވައްދާނެ ހަރުމުދަލެއް ތަރައްޤީކުރުމަށް ދަރަނި ނެގުމަކީ، ރާއްޖެ ދަރަނިވެރިވުންކަމަށް ދެކުމަކީ ވަރަށް ހަނި ވިސްނުމެއްކަމަށް އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ. ވަޒީރު މިހެން ވިދާޅުވީ، ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވެލާނާ އިންޓަރނޭޝަނަލް އެއަރޕޯޓް (ވީއައިއޭ) ތަރައްޤީކުރުމުގެ މަޝްރޫޢާ ގުޅޭގޮތުން ދެއްކެވި ވާހަކަފުޅުގައެވެ.
ވަޒީރު ސަޢީދު ވިދާޅުވީ، ރާއްޖޭގެ މައިދޮރާށީގެ ގޮތުގައި އެންމެންވެސް ޤަބޫލުކުރާ ވެލާނާ އިންޓަރނޭޝަނަލް އެއަރޕޯޓު ތަރައްޤީކުރުމުގެ މަޝްރޫޢަކީ، އެކަމަށް ފައިސާ ހޯދާނެ ގޮތާއި، ދަރަނި ދައްކާނެގޮތުގެ ހުރިހާ މަޝްވަރާތަކެއް ކޮށްގެން، ކުރީގެ ރައީސް ޢަބްދުﷲ ޔާމީނުގެ ދައުރުގައި ފެށި މަސައްކަތެއްކަމަށެވެ. ވޭތުވެދިޔަ 8 އަހަރުގެ ތެރޭގައި 3 ސަރުކާރަކުން މި މަސައްކަތުގައި ހަރަކާތްތެރިވެފައިވާކަން ވެސް ވަޒީރު ފާހަގަކުރެއްވިއެވެ.
މި މަސައްކަތް އެންމެ ފުރަތަމަ ކުރީގެ ރައީސް ޢަބްދުﷲ ޔާމީން ފެއްޓެވީ، އޭރުގެ މާލީ އިދާރާތަކާއި ބައިނަލްއަޤުވާމީ އިދާރާތަކުން ރާއްޖޭގެ އިޤްތިޞާދު ފުޅާކުރުމަށް މަސައްކަތްކުރަންޖެހޭކަން ފާހަގަކުރައްވަމުން ގެންދެވުމާ ގުޅިގެންނެވެ. އެކަމަށް އޮތް އެންމެ ބޮޑު ހުރަހަކީ ރާއްޖޭގެ މައި ދޮރާށިކަމަށްވާ ވެލާނާ އިންޓަރނޭޝަނަލް އެއަރޕޯޓުގެ ޖާގައިގެ ހަނިކަމާއި، ޚިދުމަތް ފުޅާކުރުމަށް ޢުމްރާނީގޮތުން ކުރިމަތިވެފައިއޮތް ދަތިތައްކަން ވަޒީރު ފާހަގަކުރެއްވިއެވެ. އެހެންކަމުން އެ މަސައްކަތް އޭރު ފެއްޓެވީ، ރާއްޖެއާއި ބައިނަލްއަޤުވާމީ އިދާރާތަކުން ހޯދަންޖެހޭ މަޝްވަރާތައް ހޯއްދަވާ، ދަރަނި ދައްކާނެގޮތުގެ ފުރިހަމަ ޕްލޭނަކާއެކުގައިކަމަށް ވަޒީރު ވިދާޅުވިއެވެ.
ވަޒީރު ސަޢީދު އިތުރަށް ވިދާޅުވީ، ރައީސް ޔާމީންގެ ސަރުކާރުން ވީއައިއޭގެ މަސައްކަތް ފެއްޓެވިއިރު، އިންފްރާސްޓްރަކްޗަރ ވަޒީރަކަށް ހުންނެވީ އަދުގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކަމަށާއި، އޭރުވެސް އިޤްތިޞާދީ ވަޒީރަކަށް ހުންނެވީ ސަޢީދު ކަމަށެވެ. “ރައީސް ޔާމީން އެމަސައްކަތް ފެއްޓެވީ، ރާއްޖޭގެ ޓޫރިޒަމް ޚާއްސަގޮތެއްގައި އަރާފައި އޮތް އެންމެ ބޮޑު ލޮޅުމަކީ، އެޅިފަ އޮތް އެންމެ ބޮޑު ހިޔަންޏަކީ އަދި ކުރިމަތިވާ އެންމެ ބޮޑު ހުރަހަކީ ރާއްޖޭގެ މައި ދޮރާށީގެ ކެޕޭސިޓީ ލިމިޓުވުން. ފަންނީ ބޭފުޅުންގެ ޚިޔާލާއި މަޝްވަރާއަކީ އަދި ފީސިބިލިޓީ ސްޓަޑިތައް ހެދިގެން އެއީ މާލީގޮތުން ދެކޮޅުޖެހޭ އަދި އެތަނަށް ނަގާ ލޯނު އެތަނަށް ލިބޭ ޢާމްދަނީން ދެއްކޭނެވަރުގެ ތަނެއްކަމަށް ޤަބޫލުކޮށްގެންނޭ އެތަނުގެ މަސައްކަތް ފެށީ.” ވަޒީރު ސަޢީދު ވިދާޅުވިއެވެ.
ވަޒީރު ވިދާޅުވީ، ރާއްޖޭގެ އިޤްތިޞާދު އިތުރު ހަރުފަތަކަށް ގެންދާނެ ބޮޑު ޢުމްރާނީ ތަރައްޤީގެ މަޝްރޫޢަކަށް މުޅި ޤައުމު ދަރަނިވެރިކުރުވި މަޝްރޫޢެއްކަމަށް ބަޔަކު ބުނާނަމަ އެއީ ހަނި ވިސްނުމެއްކަމަށެވެ. ވީއައިއޭގެ ތަރައްޤީއަށް ހުރިހާ ފައިސާއަކާއި ކޮންޓްރެކްޓަރާއި ހުރިހާކަމެއް ހަމަޖެހިފައި އޮތްއިރުވެސް، މަސައްކަތުގެ ހަމައެކަނި ޓާމިނަލްގެ މަސައްކަތް ނުނިމި 5 އަހަރުވެގެންދިޔުމަކީ، އެކަމުގައި ކުރީ ސަރުކާރުގެ އިޚްލާސްތެރިކަން ނެތުންކަމަށް ވަޒީރު ވިދާޅުވިއެވެ.
“އަޅުގަނޑު ވަރަށް ހައިރާންވޭ ޖީއެމްއާރަށް، އެއަރޕޯޓު ދިން ބޭފުޅުން، އޯވަރ ނައިޓުގަ އެއްޗެހީގެ އަގު ބޮޑުކުރި ބޭފުޅުން، އެނބުރި އެއީ ދަރަނީގެ ކޮންޓްރިބިއުޝަނަކޭ ވީއައިއޭއަކީ ބުނާތީ. އެއީ އެއްވެސް ޙަގީގަތެއް އޭގައި އޮތް ވާހަކައެއް ނޫން.” ވަޒީރު ވިދާޅުވިއެވެ.
ވަޒީރު ސަޢީދުވަނީ، ދަރަނި ދެއްކޭނެ އިންތިޒާމެއް ނެތި ނިމިދިޔަ ދައުރުގައި 40 ބިލިޔަން ރުފިޔާގެ ދަރަންޏެއް އުފައްދާފައިވާކަން ފާހަގަކުރައްވާފައެވެ. އަދި އޭރު މަޝްރޫޢުގެ މަސައްކަތުގައި ފަރުވާ ކުޑަކުރުމުގެ ސަބަބުން، ރައިސުލްޖުމްހޫރިއްޔާ ޑރ.މުޙައްމަދު މުޢިއްޒު ވެރިކަމަށް ވަޑައިގެން ވަރަށް ކުޑަ މުއްދަތެއްގެ ތެރޭގައި ވަރަށް ކަވި، ގިނަ މަސައްކަތްތަކެއް ކުރައްވަންޖެހިވަޑައިގަތްކަން ވަޒީރު ފާހަގަކުރެއްވިއެވެ.
އިޤްތިޞާދީ ވަޒީރު މުޙައްމަދު ސަޢީދު ވިދާޅުވީ، ރައީސުލްޖުމްހޫރިއްޔާ ޑރ. މުޢިއްޒު އެންމެ އިސްކަމެއް ދެއްވީ، ދަތި އުނދަގޫތަކާއެކުވެސް ވީއެންމެ އަވަހަށް އެއަރޕޯޓުގެ އައު ޓާމިނަލް އޮޕަރޭޝަނަލައިޒް ކުރެއްވުމަށްކަމަށެވެ. އަދި މިއަދު އެއަރޕޯޓަކީ ދިވެހިން ފަޚުރުވެރިވާފަދަ އެސެޓަކަށް ހެދިފައިވާކަމަށާއި، އައު ޓާމިނަލް އޮޕަރޭޝަނަށް ގެނެވުމާއެކު ފޮރިން އިންވެސްޓަރުންނަށްވެސް ރާއްޖެއާމެދު އިތުރު ޔަޤީންކަމެއް އުފެދިފައިވާކަން ވަޒީރު ފާހަގަކުރެއްވިއެވެ.