އުނގެނުމުގައި ޚާއްސަ އެހީތެރިކަން ބޭނުންވާ ދަރިވަރުންނަށް ކިޔަވައިދިނުމަށް ތަމްރީނު ލިބިފައިވާ މުދައްރިސުން މާ ރަނގަޅުވާނެ ކަމަށާއި، އެފަރާތްތަކަށް އެފުރުޞަތު އޮންނަންވާނެ ކަމަށް ތަޢުލީމީ ވަޒީރު ޑރ. އިސްމާޢީލް ޝަފީޢު ވިދާޅުވެއްޖެއެވެ. މިކަން އެންމެ ބޮޑު އިސްކަމެއް ދީގެން ކުރައްވަމުންދާކަން ވަޒީރު ފާހަގަކުރެއްވިއެވެ.
ސެން ޓީޗަރުން އުފެއްދުމަށް 1 އަހަރު ދުވަހުގެ ޑިޕްލޮމާ ފެންވަރުގެ ކޯސް ދިވެހިރާއްޖޭގެ އިސްލާމީ ޔުނިވާސިޓީ އަދި ވިލާ ކޮލެޖުގައި އަންނަ ސެޕްޓެމްބަރު މަހު ފެށުމަށް ވަނީ ހަމަޖައްސާފައެވެ. މި ކޯސް ކުރިއަށްގެންދާނީ ދަރިވަރުން ކެމްޕަހަށް ހާޒިރުވެގެންނެވެ. ކޯހުގައި ކިޔަވާނީ 8 މޮޑިއުލްއެވެ. މީގެއިތުރުން މުދައްރިސުންގެ ޤާބިލުކަން އިތުރުކުރުމަށް 4 ވޯކްޝޮޕެއް ވެސް ކުރިއަށްގެންދިއުމަށް ހަމަޖެހިފައިވެއެވެ..
ނިމިދިޔަ ސަރުކާރުގެ ތަޢުލީމީ ވަޒީރު ވަނީ ކްލާސްރޫމްގައި އަޅާލުންތެރިކަން ބޭނުންވާ ދަރިވަރުންނަށް ކިޔަވާދިނުމަށް ބޭނުންވާ ހުނަރުތަކާއި މަޢުލޫމާތު އެންމެ އަހަރެއްގެ ޑިޕްލޮމާ ސަނަދަކުން ހާސިލުކުރެވޭނީ ކިހިނެއްތޯ ސުވާލު ކުރައްވާފައެވެ. ކުރީގެ ވަޒީރުގެ އެ ސުވާލަށް ޖަވާބު ދެއްވަމުން މިހާރުގެ ތަޢުލީމީ ވަޒީރު ޑރ. އިސްމާޢީލް ޝަފީޢު ވިދާޅުވީ، ދިވެހިރާއްޖެއަށް ކުރިމަތިވެފައިމިވަނީ މުދައްރިސުން ނުލިބުމުގެ ކާރިސާއަކާކަމަށެވެ. މުދައްރިސުންގެ ދުޅަހެޔޮކަމަށާއި ވަޒީފާގެ ރައްކާތެރިކަމަކަށް ފަރުވާލެއް ނުބެހެއްޓުމުގެ އިތުރަށް، އާ މުދައްރިސުން ތަމްރީނުކުރުމަށް ޤައުމީ ފެންވަރުގައި އެކަށީގެންވާ މަސައްކަތެއް ފާއިތުވެދިޔަ ކައިރި މާޒީގައިކޮށްފައި ނުވާކަން ވަޒީރު ފާހަގަކުރެއްވިއެވެ.
ތަޢުލީމީ ވަޒީރު ވިދާޅުވީ، މާލޭގައި ދިރިއުޅުމުގެ އަގާއި، ދިވެހިންގެ ދިރިއުޅުމުގެ ވައްޓަފާޅިއާއި، ދިވެހިރާއްޖޭގައި މީހުން ދިރިއުޅޭ ރަށްތައް އެތުރިފައިވާ ގޮތަށް ރިޢާޔަތްކޮށް މުދައްރިސްކަން ފަސޭހައިން ކިޔެވޭގޮތަށް ކަންކަން ފަހިކޮށްދޭންޖެހޭކަމަށެވެ. ތަޢުލީމީ ދާއިރާއަށް ސްކޫލްތަކުން ނުކުންނަ ދަރިވަރުން ކިޔެވުމަށްވެސް މީގެކުރިން ބާރުއަޅާފައިވާ މިންވަރު ކުޑަކަމަށާއި، ނަތީޖާއަކީ 2023 ވަނަ އަހަރު ނިމުނުއިރު އުނގެނުމުގައި ޚާއްސައެހީތެރިކަން ބޭނުންވާ ދަރިވަރުންނަށް ކިޔަވައިދޭން ބޭނުންވާ 600އަށްވުރެ ގިނަ މުދައްރިސުން ނެތި ދަރިވަރުން ބިކަވެފައިތިބުން ކަމަށް ވަޒީރު ފާހަގަކުރެއްވިއެވެ.
“އަޅުގަނޑުމެންގެ ތަޢުލީމީ ނިޒާމުގައި އަޅުގަނޑުމެން އެކިއެކި ޚިދުމަތްތައް ދެމުންދާއިރު އެންމެ ބޮޑު އިސްކަމެއް ދޭން ޖެހިފައި އޮތް އެއް ދާއިރާ މިއީ، އުނގެނުމުގައި އަދި އެކި ކަހަލަ ނުކުޅެދުންތެރިކަން ހުންނަ ކުދިންނަށް ޚާއްސަކޮށްގެން އަޅުގަނޑުމެން މިކުރާ މަސައްކަތުގައި ކިޔަވައިދިނުމުގެ ފެންވަރު ހަރުދަނާކޮށް ފުރުސަތުތައް ފަހިކޮށްދިނުމަކީ. މިކަން އަޅުގަނޑުމެންނަށް ކުރެވޭނީ ދާއިރާއަށް ތަމްރީނު ލިބިފައި ތިބި މުދައްރިސުން ނެރެގެން،” ތަޢުލީމީ ވަޒީރު ވިދާޅުވިއެވެ.
ވަޒީރު ވިދާޅުވީ، ސެން މުދައްރިސުންގެ ދަތިކަން ޙައްލުކުރުމަށްޓަކައި ކުރެވުނު މަސައްކަތުގެ ތެރެއިން ފާއިތުވެދިޔަ ދުވަސްތަކުގެ ތެރޭގައި 120 ސެން މުދައްރިސުން އެދާއިރާއަށް ނެރެވިފައިވާ ކަމަށެވެ. އަދި އުނގެނުމުގައި ޚާއްސަ އެހީތެރިކަން ބޭނުންވާ ދަރިވަރުންނަށް ކިޔަވައިދޭ މުދައްރިސުން ތަމްރީންކުރުމުގެ މަސައްކަތް ތަޢުލީމީ ވުޒާރާއިން ކުރިއަށްގެންދަނީ މުދައްރިސުން ތަމްރީނުކުރުމުގެ ޤައުމީ ޕްރޮގްރާމްގެ ތެރޭގައި ހިމަނުއްވައިގެންނެވެ. މުދައްރިސުން ތަމްރީނުކުރުމުގެ ޤައުމީ ޕްރޮގްރާމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުގެ ތެރޭގައި ހިމެނޭ މުހިންމު ސިޔާސަތެކެވެ.
ވަޒީރު އިތުރަށް ވިދާޅުވީ، ޤައުމީ ތަރައްޤީގެ މަސައްކަތުގައި އެންމެ ބުރަކޮށް މަސައްކަތްކުރައްވާ އެއްބަޔަކީ މުދައްރިސުން ކަމަށާއި، ރާއްޖޭގައި މުދައްރިސުން ތަމްރީނުކުރުމުގެ ވައްޓަފާޅިއަށް ބަދަލުތަކެއް ގެންނަން ޖެހޭ ކަމަށް ޤަބޫލުކުރައްވާ ކަމަށެވެ. ޚާއްސަކޮށް ޕްރައިމަރީ ގްރޭޑްތަކުގެ ކޯސްތަކުގައި ކިޔަވައިދޭއިރު މުގައްރަރު އެއްހަމަކުރަންޖެހޭ ކަމަށްވެސް ވަޒީރު ފާހަގަކުރެއްވިއެވެ.