ރާއްޖެއަކީ ދުންފަތާއި ދުރު މުޖުތަމަޢަކަށް ހެދުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން، ދުންފަތުގެ އިސްތިއުމާލުކުރުން އެއްކޮށް ހުއްޓާލާ ރަށްރަށުގައި ދިރިއުޅޭ ހުރިހާ ރައްޔިތުންނަށް ޚާއްސަ އިނާޔަތެއް ދިނުމަށް އާންމުންގެ ޚިޔާލު ހޯދުމަށް ދިރާސާއެއް ފަށާފައިވާ ކަމަށް ހެލްތު މިނިސްޓްރީން ބުނެފިއެވެ.
މި ދިރާސާގެ މައިގަނޑު މަގްސަދުތަކުގެ ތެރޭގައި، ދުންފަތުގެ އިސްތިއުމާލުކުރުމުގެ ނުރައްކާތަކަށް މުޖުތަމައު ހޭލުންތެރިކުރުވުމާއި، ދުންފަތާ ގުޅޭ ކަންކަން ތަންފީޒުކުރުމުގައި ދިމާވާ ގޮންޖެހުންތަކާމެދު އާންމުން ދެކޭގޮތް ދެނެގަތުން ހިމެނެއެވެ. އަދި، ކުރިއަށް އޮތްތަނުގައި ރަނގަޅުކުރުމަށް ފެންނަ ކަންތައްތައް ހޯދުމުގެ އިތުރުން، ދުންފަތުގެ އިސްތިއުމާލު ކުރުން އެއްކޮށް ހުއްޓާލާ ރަށްރަށުގެ އާބާދީގެ ހުރިހާ ރައްޔިތުންނަށް އިނާޔަތެއް ދިނުމާމެދު ރައްޔިތުންގެ ޚިޔާލު ހޯދުމަކީވެސް މި ދިރާސާގެ މުހިންމު ބައެކެވެ. މިނިސްޓްރީން ވަނީ މި ދިރާސާގައި ބައިވެރިވާ އެއްވެސް ފަރާތެއްގެ މައުލޫމާތު ހާމަނުކުރާނެކަމުގެ ޔަގީންކަން ދީފައެވެ. ލިބޭ މައުލޫމާތުތައް ބޭނުންކުރާނީ ދުންފަތުގެ އިސްތިއުމާލު ކުރުން ރާއްޖޭގައި މަދުކުރުމަށް ކުރަމުންދާ މަސައްކަތްތަކުގެ އިތުރުން އެކަމާ ގުޅުންހުރި ސިޔާސަތުތައް އެކުލަވާލުމުގައެވެ.
މިކަމުގެ ބިންގާ އެޅިފައިވަނީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފާއިތުވި ޖޫން މަހު، ކަމާ ގުޅުންހުރި އިދާރާތަކަށް ދެއްވި އިރުޝާދުގެ މައްޗަށެވެ. އެމަނިކުފާނު ވަނީ ދުންފަތުގެ އިސްތިއުމާލު ކުރުމުން ދުރުހެލިވެފައިވާ ދުޅަހެޔޮ މުޖުތަމަޢަކަށް ހެދުމަށް ކުރެވޭ މަސައްކަތުގެ ތެރެއިން، ދުންފަތުގެ އިސްތިއުމާލުކުރުން އެއްކޮށް ހުއްޓާލާ ރަށްރަށުގެ އާބާދީގެ ކޮންމެ ރައްޔިތެއްގެ ބޭންކް އެކައުންޓަށް ޖަމާކޮށްދޭ ފައިސާގެ އިނާމެއް ނުވަތަ އިނާޔަތެއް ދިނުމާ ގުޅޭ ގޮތުން ދިރާސާއެއް ހެއްދެވުމަށްފަހު، އެކަމާގުޅޭ ކަރުދާހެއް ތައްޔާރުކުރައްވައި ހުށަހެޅުއްވުމަށް ކަމާބެހޭ ވަޒީރުންނަށް ދަންނަވާފައެވެ.
މި ސަރުކާރުން ގެންދަނީ ދުންފަތާ ދުރުހެލި މުޖްތަމައެއް ބިނާ ކުރުމަށް ގިނަ މަސައްކަތްތަކެއް ކުރަމުންނެވެ. ދިވެހި ރައްޔިތުންގެ ޞިއްޙަތު ރައްކާތެރިކޮށް، ދުންފަތާއި ދުރު މުޖުތަމަޢެއް ބިނާކުރުމަށް ރައީސުލްޖުމްހޫރިއްޔާ ކުރައްވަމުންގެންދަވާ ހަރުދަނާ މަސައްކަތްޕުޅުގެ އަގު ވަޒަންކުރުމުގެ ގޮތުން ދުނިޔޭގެ ޞިއްޙަތު ޖަމްޢިއްޔާ (ޑަބްލިއުއެޗްއޯ) އިން ރައީސް އަށް ޚާއްޞަ އެވޯޑެއް ވަނީ އަރުވައިފައެވެ.
ދުންފަތާ ދެކޮޅަށް ސަރުކާރުން އަޅަމުންދާ ފިޔަވަޅުތަކުގެ ތެރޭގައި ދުންފަތުގެ ބާވަތްތަކުން ނަގާ ޓެކްސް ބޮޑުކުރުމާއި، ދުންފަތް ވިއްކާ އަގު ބޮޑުކުރުމާއި ދުންފަތުގެ ބާވަތްތަކަށް ވާޞިލުވެވޭނެ މަގުތައް ހަނިކުރުން ހިމެނެއެވެ. މީގެ އިތުރުން ދުންފަތުން ލިބޭ ގެންލުންތަކަށް ހޭލުންތެރިކޮށް އެކަން ހުއްޓާލުމަށް އެހީތެރިވެދޭނެ ހިލޭ ޕްރޮގްރާމްތައް ރާއްޖޭގެ އެކި ކަންކޮޅުތަކުގެ ޞިއްޙީ މަރުކަޒުތަކުގައި ވަނީ ގާއިމުކުރެވިފައެވެ.
އަދި، ދުންފަތް ކޮންޓްރޯލް ކުރުމާބެހޭ ޤާނޫނަށް ގެނައި މުހިންމު އިޞްލާޙުތައް ރައީސް ތަޞްދީޤުކުރެއްވުމާއި ދުންފަތުގެ އިސްތިއުމާލު ނުކުރެވޭ ސަރަހައްދުތައް އިތުރުކުރުމާއި، އިލެކްޓްރޯނިކް ސިނގިރޭޓާއި ވޭޕާއި އެފަދަ ތަކެތި އުފެއްދުމަށް ބޭނުންކުރާ ހުރިހާ މެޝިނަރީއާއި އާލާތްތަކެއް، ރާއްޖެ އެތެރެކުރުމާއި ގެންގުޅުން މަނާކުރުންފަދަ ކަންކަން ހިމެނެއެވެ. ދުންފަތުގެ ބާވަތްތައް ގަނެވިއްކުމުގެ ޤާނޫނީ އުމުރުފުރާ، 21 އަހަރަށް މަތިކުރެއްވުމާއި، ދުންފަތުގެ ބާވަތްތައް އިޝްތިހާރުކުރުމާއި ސްޕޮންސަރކުރުން، މަނާކުރުން ވެސް ހިމެނެއެވެ.
ހެލްތު މިނިސްޓްރީގެ މި ދިރާސާއަކީ، ރާއްޖޭގެ ޞިއްޙީ ދާއިރާ ކުރިއެރުވުމަށް އަޅާ މުހިންމު ފިޔަވަޅެކެވެ.