ޖޫން 1 ވަނަ ދުވަހު މާލެ ސަރަހައްދުން ކަރަންޓު ކެނޑުނު މައްސަލައިގެ އިބްތިދާއީ ތަޙުޤީޤުގެ މަޢުލޫމާތު އެއްކުރެވި، މައްސަލަ އިތުރަށް ތަޙުޤީޤު ކުރަމުންދާ ކަމަށް ފުލުހުން މިއަދު ބުނެފިއެވެ.
މާލެ، ހުޅުމާލެ އަދި ހުޅުލެ ހިމެނޭ މާލެ ސަރަހައްދުން ކަރަންޓު ކެނޑިފައިވަނީ މެންދުރު 12:45 ހާއިރުއެވެ. ސްޓެލްކޯއިން މަޢުލޫމާތު ދީފައިވާ ގޮތުގައި ކަރަންޓު ކެނޑިފައިވަނީ ދިމާވި ޓެކްނިކަލް މައްސަލައަކާ ގުޅިގެންނެވެ. މުޅި މާލެ ސަރަހައްދަށް ކަރަންޓު އަލުން ލިބުނީ އިރުއޮއްސި 18:33 ގައެވެ.
މި މައްސަލައާ ގުޅިގެން ރައީސް ޑރ. މުޙައްމަދު މުޢިއްޒު ވަނީ “މުޅި މާލެ، ހުޅުމާލެ އަދި ހުޅުލެ ހިމެނޭހެން ކަރަންޓު ގޮސްފައިވާ މައްސަލަ ސީރިއަސް މައްސަލައެއްގެ ގޮތުގައި” ބައްލަވައި، ތަޙުޤީޤު ކުރެއްވުމަށް ކަމާބެހޭ ފަރާތްތަކަށް އަންގަވާފައެވެ.
ރައީސް އިތުރަށް ވިދާޅުވެފައިވަނީ މިފަދަ ހާދިސާއެއް ތަކުރާރުވިޔަ ނުދިނުމަށްޓަކައި ކަރަންޓުގެ ޚިދުމަތުގެ ކަންކަން އިންތިޒާމުކުރުމަށް ކުރަންޖެހޭ ހުރިހާ ކަމެއް ސަރުކާރުން ކުރައްވާނެ ކަމަށެވެ.
ފުލުހުންގެ މީޑިއާ އޮފިޝަލަކު މިއަދު ވިދާޅުވެފައިވަނީ މައްސަލައިގެ އިބްތިދާއީ ހޯދުންތަކާއި މަޢުލޫމާތު އެއްކުރެވި، އެ މަޢުލޫމާތުތަކަށް ބިނާކޮށް މައްސަލަ އިތުރަށް ތަޙުޤީޤު ކުރަމުންދާ ކަމަށެވެ. އަދި “ތަޙުޤީޤު އެއްކޮށް ނިމުމުން ތަޙުޤީޤުގައި ފާހަގަކުރެވުނު ކަންކަން ހިއްސާކޮށްދޭނެ” ކަމަށްވެސް އެ އޮފިޝަލް ވިދާޅުވިއެވެ.