ހުޅުމާލޭގައި ނުރައްކާތެރިކޮށް ބާރު ސްޕީޑްގައި ދުއްވަމުން ދިޔަ ކާރެއް ފުލުހުންގެ ސައިކަލެއްގައި ޖެހި، ފުލުހުންގެ ދެ އޮފިސަރުންނަށް އަނިޔާވެ، ކާރުގައި ތިބި ދެމީހުން ހައްޔަރުކޮށްފިއެވެ.
ފުލުހުން މަޢުލޫމާތު ދެއްވާފައިވާ ގޮތުގައި، ހުޅުމާލޭ ފޭސް 1 އާއި ފޭސް 2 ސަރަހައްދުގައި ބާރު ސްޕީޑްގައި ދުއްވަމުން ދިޔަ ކާރެއް ހުއްޓުވުމަށް ފުލުހުން މަސައްކަތްކުރުމުން، އެ ކާރު ފަހަތުން ދިޔަ ފުލުހުންގެ ސައިކަލްގައި ޖެހި ވައްޓާލާފައިވެއެވެ.
މި ހާދިސާގައި ސައިކަލުގައި ތިބި ފުލުހުންގެ ދެ އޮފިސަރުންގެ ތެރެއިން އެއް އޮފިސަރަށް އަނިޔާވެ، މިވަގުތު ހޮސްޕިޓަލްގައި ފަރުވާ ދެމުންދާކަމަށް ފުލުހުން މަޢުލޫމާތު ދެއްވާފައިވެއެވެ.
މި ހާދިސާއާ ގުޅިގެން ކާރު ދުއްވި ފިރިހެނާ އަދި އެ ކާރުގައި ދަތުރުކުރި އަންހެނާ ވަނީ ހައްޔަރުކޮށްފައެވެ. މި މައްސަލައިގެ ތަހުގީގު ފުލުހުން ކުރިއަށް ގެންދާ ކަމަށާއި، މި ވަގުތު ހާދިސާ ހިނގި ސަރަހައްދުގައި ފުލުހުން ހަރަކާތްތެރިވަމުންދާ ކަމަށްވެސް ފުލުހުން ވަނީ ބުނެފައެވެ.
ފުލުހުންގެ އޮފިސަރުންނަށް ހަމަލާދިނުމާއި ނުރައްކާތެރި ގޮތެއްގައި އުޅަނދު ދުއްވުމަކީ ޤާނޫނީ ގޮތުން ކުށެއްކަމަށްވާތީ، މި މައްސަލައިގައި ހައްޔަރުކުރެވުނު ދެ މީހުންގެ މައްޗަށް ޤާނޫނީ ފިޔަވަޅު އެޅޭނެ ކަމަށް ފުލުހުން މަޢުލޫމާތު ދެއްވާފައިވެއެވެ