ނުކުޅެދުންތެރިކަން ހުންނަ މީހުންނަށް ހުނަރު ދަސްކޮށްދީ، އެމީހުންގެ އުފެއްދުންތައް ވިއްކައި، ވަޒީފާ އަދާކުރެވޭނެ ޖާގައެއް ހޯދައިދިނުމުގެ ގޮތުން ދިވެހިރާއްޖޭގައި މުޅިން އަލަށް ޚިދުމަތް ދޭންފަށާ "އެމްޕަވަމަންޓް ހަބް" އަކީ ނުކުޅެދުންތެރިކަން ހުންނަ ފަރާތްތަކާއި އެކުވެސް މަޝްވަރާކުރެވިގެން ޑިޒައިން ކުރެވިފައިވާ ތަނެއްކަމުގައި އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާގެ ސްޓޭޓް މިނިސްޓަރ އަހުމަދު އާތިފް ވިދާޅުވެއްޖެއެވެ.
ސްޓޭޓް މިނިސްޓަރ މިފަދައިން ވިދާޅުވެފައިވަނީ ދައުލަތުގެ މީޑިއާގެ ޕްރޮގްރާމެއްގައި ނުކުޅެދުންތެރިކަން ހުންނަ ފަރާތްތައް ބާރުވެރިކުރުމުގެ ސިޔާސަތު ތަންފީޒުކުރުމަށް މި ވުޒާރާއިން ކުރެވެމުންދާ މަސައްކަތްތަކާއި ގުޅޭ ގޮތުން ވާހަކަފުޅުދައްކަވަމުންނެވެ.
އެގޮތުން، އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއާއި، ފަހިދިރިއުޅުން ކޯޕަރޭޝަން އަދި ޒަކާތު ފަންޑް ގުޅިގެން ތައްޔާރުކުރެވޭ އެމްޕަވަމަންޓް ހަބަކީ ނުކުޅެދުންތެރިކަން ހުންނަ ފަރާތްތަކާވެސް މަޝްވަރާކުރެވިގެން، ތަފާތު ކަންކަމަށް ރިޢާޔަތްކުރެވިގެން ތައްޔާރުކުރެވެމުންދާ ތަނެއްކަމުގައި ސްޓޭޓް މިނިސްޓަރ ފާހަގަކުރެއްވިއެވެ.
އެގޮތުން، އެމްޕަވަަމަންޓް ހަބްގައި ނުކުޅެދުންތެރިކަން ހުންނަ ފަރާތްތަކުގެ އެކްސެސިބިލިޓީއަށް ޚާއްޞަ އަހައްމިއްޔަތުކަމެއް ދިނުމުގެ އިތުރުން، އެތަނުގައި ކުރިއަށް ގެންދެވޭނެ ތަފާތު ޕްރޮގްރާމްތައްވެސް ވެގެންދާނީ މި މަސައްކަތްތަކުގައި އަމަލީގޮތުން ޝާމިލުވެ އުޅުއްވާ ޖަމުޢިއްޔާތަކާއެކު މަޝްވަރާކުރެވިގެން ކުރިއަށްދެވޭ ޕްރޮގްރާމްތަކެއްކަމުގައި ސްޓޭޓް މިނިސްޓަރ އާތިފް ވިދާޅުވިއެވެ.
"ފާހަގަވާ އެއްކަމަކީ މި މަސައްކަތްކުރާ އަމިއްލަ ޖަމުޢިއްޔާތަކުން އަޅުގަނޑުމެންނާއި ވަރަށް ގާތުން މަސައްކަތްކުރީ، ޑިޒައިންއާއި ޚިދުމަތްތަކަށް ބަދަލުތައް ގެނެސްފައިވާނީ އެބޭފުޅުންގެ ޚިޔާލާއި އެކުގައި. މަޤުސަދަކީ ހަބްގެ ޚިދުމަތް ދޭން ފެށުމުންވެސް މި ޖަމުޢިއްޔާތަކާއި ގުޅިގެން ޕްރޮގްރާމްތައް ހިންގުން" ސްޓޭޓް މިނިސްޓަރ ވިދާޅުވިއެވެ.
ޖުމްލަ 5500 އަކަފޫޓުގެ ޖާގައެއްގައި ހުޅުމާލެ ފޭސް 2 ގައި ހުޅުވޭ މި ހަބްގައި ހޮސްޕިޓަލިޓީ އަދި ކަލިނަރީ ތަމްރީނާއި މަސައްކަތުގެ ތަޖުރިބާ ފޯރުކޮށްދިނުމަށްޓަކައި އިންކްލޫސިވް ކެފޭ އަކާއި، ނުކުޅެދުންތެރިކަން ހުންނަ ފަރާތްތައް އުފައްދާ ތަފާތު ތަކެތި މާކެޓްކޮށް، އާންމުންނަށް ވިއްކުމަށް ހުޅުވޭ ފިހާރައެއްވެސް ހިމެނެއެވެ. އަދި ހަބްގެ ހަރަކާތްތަކުގައި ބައިވެރިވާ ފަރާތްތަކުގެ ޝައުޤުވެރިކަމާއި ގުޅުންހުރި އަދި ހުނަރު ތަރައްޤީކުރުމަށް ތަފާތު ޕްރޮގްރާމްތައް ހިންގުމަށް، ތިން ވޯރކްޝޮޕް ޖާގައެއްގެ އިތުރުން، ކޮމްޕިއުޓަރާއި އިންފޮމޭޝަން ޓެކްނޮލޮޖީގެ ތަމްރީން ދޭ ތަނެއް ހިމެނެއެވެ. މީގެއިތުރުން، ހަބްގައި އިޖުތިމާޢީ ގުޅުން ބަދަހިކުރުމަށް ތަފާތު ހަރަކާތްތައް ހިންގުމަށް އެކްޓިވިޓީ ރޫމް އަދި މަލްޓި މީޑިއާ ރޫމް އެއް ހުންނާނެ ކަމަށް އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ވަނީ ބުނެފައެވެ.
އަދި އެތަނުގެ ޚިދުމަތްތައް އަމާޒުކުރެވިފައިވަނީ 40-18 އަހަރާއި ދެމެދުގެ އުމުރުފުރައިގެ މީހުންނަށް ކަމަށާއި، އުންމީދަކީ، އެ މަސައްކަތުގެ ތެރެއިން، ގިނަ ބަޔަކަށް ވިޔަފާރި ކުރުމުގެ ފުރުޞަތު ހުޅުވިގެންދިއުމުގެ އިތުރުން، ނުކުޅެދުންތެރިކަން ހުންނަ މަސައްކަތްތެރިންނަށް ވަޒީފާގެ ފުރުޞަތުތައްވެސް އިތުރުވެގެންދިއުން ކަމަަށް ވެސް އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ވަނީ ބުނެފައެވެ. ހަމަމިއާއެކު، އެ މަރުކަޒުގެ ޒަރިއްޔާއިން ވިޔަފާރިތަކުގެ އުފެއްދުންތެރިކަން އިތުރުކޮށް، އިޖުތިމާޢީ ޒިންމާ އަދާކުރުމަށް ހިތްވަރު ލިބިގެންދިއުން ކަމަށް އެ ވުޒާރާއިން ބުނެއެވެ.