ވައްމުލައް ސިޓީގެ އެތެރޭގެ މަގުތައް ޑިޒައިންކޮށް ހެދުމުގެ ދެވަނަ ފިޔަވަހީގެ މަސައްކަތް ބާރަށް ކުރިއަށްދާ ކަމަށް، މި މަޝްރޫއުގެ މަސައްކަތް ހިންގަމުންދާ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން މިއަދު ހާމަކޮށްފިއެވެ. މި މަޝްރޫއަކީ ފުވައްމުލައް ސިޓީގެ ތަރައްޤީއަށްޓަކައި، އެ ސިޓީގެ ތާރު ނޭޅި ހުރި ކުދި މަގުތައް ތަރައްޤީކޮށް، ފެން ހިންދުމުގެ ދާއިމީ ހައްލެއް ހޯދައިދިނުމުގެ ގޮތުން ކުރިއަށްގެންދާ މުހިންމު މަސައްކަތެކެވެ.
މިހާރު އެ މަޝްރޫއުގެ ދަށުން، މަގުތަކުގެ ފެން ހިންދުމުގެ ނިޒާމް ބައްޓަން ކުރުމުގެ ގޮތުން ސެޓްލްމެންޓް ޓޭންކް ބެހެއްޓުމުގެ މަސައްކަތާއި، ކޭބަލް ޖަންކްޝަން (ކަރަންޓް ކޭބަލް ގުޅުވާލާ ހޮޅި) ބެހެއްޓުމުގެ މަސައްކަތުގެ އިތުރުން ޔޫޕީވީސީ ހޮޅި (ފެންހިންދާ ހޮޅި) އެޅުމުގެ މަސައްކަތް ދަނީ ކުރިއަށެވެ. މީގެ އިތުރުން މަގުތަކުގެ ދެފަރާތަށް ބަހައްޓާ ކާބްސްޓޯން އުފެއްދުމުގެ މަސައްކަތް ވެސް މިހާރު ދަނީ ބާރަށް ކުރިޔަށެވެ.
އެ މަޝްރޫއުގެ ދަށުން ރާއްޖޭގެ ތިން ވަނަ އަށް އެންމެ ބޮޑު ސިޓީ ކަމަށްވާ ފުވައްމުލަކުގެ ތާރު ނޭޅި ހުރި ކުދި މަގުތަކުގައި ތާރު އަޅާނެއެވެ. މިގޮތުން އެ މަސައްކަތުގެ ތެރެއިން 50 މަގެެއްްގައި ތާރު އެޅުމަށް ހަމަޖެހިފައިވާއިރު އެއީ 12.7 ކިލޯ މީޓަރު ސަރަހައްދެކެވެ.
ފުވައްމުލައް މަގު ހެދުމުގެ މަޝްރޫއުގެ ދެ ވަނަ ފިޔަވަހިގެ މަސައްކަތަކީ މިދިޔަ އަހަރުގެ ޖުލައި މަހުގެ ތެރޭގައި އެމްޓީސީސީއާ ހަވާލު ކުރު މަޝްރޫއެކެވެ. މިއީ ދެ އަހަރުގެ މުއްދަތުގެ ތެރޭގައި ނިންމުމަށް ހަމަޖެހިފައިވާ މަޝްރޫއަކަށްވާއިރު، މި މަޝްރޫއަށް 255.2 މިލިއަން ރުފިޔާ ހަރަދު ކުރާނެއެވެ.
މި މަޝްރޫއުގެ ދަށުން ފެން ހިންދާ ނިޒާމް ގާއިމު ކުރުމާއި 650 ކޭބަލް ޖަންކްޝަން ބޮކްސް ވަޅުލުމާއި 13،964 އަކަ މީޓަރުގެ ސަރަހައްދެއްގައި ޕޭވްމަންޓް ހެދުމާއި 24،345 މީޓަރުގެ ކަބް ސްޓޯން ހަރު ކުރުމާއި ގަސްހަރު ކުރާ ޕިޓްސް ވަޅުލުމް ހަމަޖެހިފައިވާ ކަމަށް އެމްޓީސީސީން މީގެ ކުރިން ވަނީ ބުނެފައެވެ. މި މަޝްރޫއު ނިމުމުން ފުވައްމުލައް ސިޓީގެ މަގުތަކަށް ދިމާވާ ފެންބޮޑުވުމުގެ މައްސަލަތަކަށް ދާއިމީ ހައްލެއް ލިބި، ރައްޔިތުންނަށް ފަސޭހަކަމާއެކު ދަތުރުފަތުރު ކުރުމުގެ މަގު ފަހިވެގެންދާނެއެވެ.