މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ފ. ނިލަންދޫ ބަނދަރު ތަރައްގީކުރުމުގެ މަސައްކަތް ބާރަށް ކުރިއަށް ގެންދަމުން އަންނައިރު، އެ މަސައްކަތުގެ މުހިންމު ގިނަ މަރުޙަލާތަކެއް މިހާރު ވަނީ ނިމިފައެވެ. މި މަޝްރޫޢަކީ ނިލަންދޫ ރައްޔިތުންނަށް ފަސޭހަ ބަނދަރެއް ޤާއިމުކޮށްދިނުމަށް ކުރިއަށްގެންދާ މަސައްކަތެކެވެ.
ފ. ނިލަންދޫގެ ރައްޔިތުންނަށް ދިގުދެމިހުންނާނެ، ބޭނުންތެރި ބަނދަރެއް ޤާއިމުކުރުމަށް ޓަކައި ކުރިއަށްގެންދާ މި މަޝްރޫޢުގެ ދަށުން ބަނދަރު ހެދުމަށް ބޭނުންވާ ފުރަތަމަ ބުރުގެ ހިލަ (ރޮކް ބޯލްޑާސް) މިހާރު ވަނީ މަސައްކަތް ކުރިއަށްދާ ސަރަޙައްދަށް ގެންގޮސްފައެވެ. މިއީ ބަނދަރުގެ ބިންގާ އެޅުމުގެ އެންމެ މުހިންމު އެއް މަރުޙަލާއެވެ.
މީގެ އިތުރުން، ބަނދަރުގައި ބޭނުންކުރާ ގޮނޑުދޮށް (ކުއޭ ވޯލް) ހެދުމުގެ މަސައްކަތާއި، ބަނދަރުގެ ސަރަޙައްދު ތެރޭގައި ތާރު އަޅައި ޕޭވްމަންޓް ހެދުމުގެ މަސައްކަތް ވަނީ އެއްކޮށް ނިމިފައެވެ. މި މަސައްކަތްތައް ނިމުމާއެކު ބަނދަރުގެ ބޭނުން ހިފުމަށް އިތުރު ފަސޭހަތަކެއް ލިބިގެންދާނެ ކަމަށް އެމްޓީސީސީން ބުނެއެވެ.
ހަމައެހެންމެ، ފަޅުތެރެ ފުންކުރުމުގެ (ޑްރެޖިންގް) މަސައްކަތް ވަނީ 60 އިންސައްތަ ނިމިފައެވެ. ފަޅު ފުންކުރުމަކީ ބޯޓުފަހަރަށް ފަސޭހަކަމާއެކު ބަނދަރަށް ވަދެ ނިކުތުމަށާއި، ބަނދަރު ބޭނުންކުރުމަށް ޓަކައި ކޮންމެހެން ކުރަންޖެހޭ މަސައްކަތެކެވެ. މި މަސައްކަތް ނިމުމުން ބޮޑެތި އުޅަނދުފަހަރަށް ވެސް ނިލަންދޫ ބަނދަރު ބޭނުންކުރަން ފަސޭހަވެގެންދާނެއެވެ.
އެމްޓީސީސީއަކީ ރާއްޖޭގެ ގިނަ ތަރައްގީގެ މަސައްކަތްތައް ރާއްޖޭގެ އެކި ކަންކޮޅުތަކުގައި ކުރިއަށް ގެންދާ ސަރުކާރުގެ ކުންފުންޏެކެވެ. ރާއްޖޭގައި ހިންގާ ކޮންސްޓްރަކްޝަން މަސައްކަތްތަކާއި އަދިވެސް އެހެނިހެން ބޮޑެތި މަސައްކަތްތައް ވެސް އެ ކުންފުނިން ކުރިއަށް ގެންދެއެވެ. އެގޮތުން ސްކޫލުތަކުގެ މަސައްކަތްތަކާއި، ސަރުކާރުގެ އެކިއެކި އިމާރާތްތައް އެޅުމާއި، ފަޅު ފުންކުރުން ހިމެނެއެވެ. އެމްޓީސީސީން ދަނީ ރާއްޖޭގެ ތަރައްގީއަށް މުހިންމު ގިނަ މަޝްރޫޢުތަކެއް ހިންގަމުންނެވެ.